Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat ni Paulus, rasul Keristus Yésus maya' pian Allah, idi rat ni Timotius, kinanak tau—
2 Kuan amung-amung lun manu idi kinanak luk lutep bang Keristus luk déi' Kolosé: Do' katu idi awang ratnan Allah Taman tau temurun kuan muyuh.
3 Kai megéi' maré ubur kuan Allah, Taman Tuhan tau Yésus Keristus, kareb kai sembayang kuan muyuh.
4 Ngaceku kai pangeh neninger ratnan anu muyuh inan Keristus Yésus idi awa muyuh kuan amung lun manu.
5 Kareb Bala luk Do', ieh ineh bada' luk matu ineh nacing nemuyuh atun, muyuh neninger ratnan rapet luk barénneh. Anu idi awa muyuh tipin luun luk inan muyuh merapet ineh luk dinug kuan muyuh déi' surga.
6 Bala luk Do' ineh ngacing peruan idi mepiar aput tana', mepad kudeng luk pangeh nepiar arang muyuh rat pun aco muyuh neninger ratnan éi' Allah idi nekali' ratnan katu Allah dengan matu.
7 Muyuh pangeh nesibada' rat ni Epapras lun dengan kai luk inan mawa, luk lutep ngakem bang ngadan kai kuan Keristus.
8 Ieh nemada' nekai ratnan awa luk biré Roh nemuyuh.
9 Ngaceku ineh, kareb kai neninger ratnan muyuh, kai megéi' sembayang kuan muyuh. Kai mutuh Allah pad muyuh uen manu' ku ileh ratnan pianNeh, dengan namung ileh idi do' kali' luk barén RohNeh,
10 pad ulun muyuh petulu dengan pinian Tuhan idi muyuh perurum denganNeh bang luk amung-amung, idi ngeruat bua' bang anid-anid kekamen luk do', idi pad ileh muyuh ratnan Allah amé'-amé' rayeh.
11 Do' muyuh uen ngetueh dengan amung tueh luk macing ratnan lalud Allah luk rayeh pad muyuh miak tuman dengan mulai niat bang luk amung-amung.
12 Idi do' muyuh maré ubur kuan Taman tau luk nenganau' nemuyuh mayu ngalap babpat ratnan luk tinina' Allah kuan lun manu bang imet acang ineh.
13 Ieh nemuit netau ratnan lalud dacem idi nemubuh netau amé' bang imet Anak luk inanNeh mawa.
14 Idi rat Neneh ineh inan uli' kuan tau, ieh ineh tau ngalap do' ratnan sala' tau.
15 Idi Keristus luk mangun ku ayu Allah luk na sinier ineh, ieh ineh Anak luk Atun ratnan amung-amung luk pinudut.
16 Ngaceku bang Keristus ineh pangeh nangun luk amung-amung, luk bang langit idi luk bang tana' pana', idi luk melagan idi luk na melagan pana', do' lalud-lalud roh, idi luk nguyut, do' luk ngimet ukum, idi luk ngimet lalud, idi luk amung-amung pangeh inau' rat Neneh idi kuan-Neh.
17 Ieh pangeh idi kareb nateh luk amung-amung idi, idi amung-amung pangeh inau' lutep bang Neneh.
18 Idi Ieh luk mangun ku uluh burur, ieh ineh sidang; Ieh luk pun-pun, idi mangun ku Anak luk Atun rat arang lun naté, pelé bang luk amung-amung Ieh luk mangun ku luk meluun rayeh.
19 Ngaceku pangeh nepetulu dengan pian Allah, ratnan amung-amung luk meligan ineh inau' pamung bang Anak ineh.
20 Idi ratnan Anak ineh luk amung-amung inau' Allah pedo' dengan bururNeh, do' luk bang tana' ini idi luk bang langit pana', kareb Ieh pangeh nengacing pedo' ratnan dara' Keristus luun kayuh salib.
21 Atun muyuh mado ratnan Allah. Muyuh ineh bunu'Neh ngaceku kekamen idi terawé muyuh luk dat.
22 Iamo' nekini Ieh pangeh nenganau' nemuyuh pedo' dengan até AnakNeh luk bang burur lemulun, pad nguit nemuyuh amé' matun luk meligan dngan na melutak idi mesala' pa kiung Allah,
23 kudeng muyuh lutep bang anu, idi meraben, pad muyuh na miak bebuen ratnan rapet bang Bala luk Do', luk pangeh pindenger muyuh, idi luk pangeh bida' kuan amung-amung pudut luk pa liang langit. Idi ui ini Paulus luk pangeh nangun ku lun luk mada' ineh.
24 Idi nekini ui kali' mawang niat ratnan amung-amung dereh luk ilapku ngaceku muyuh, pad ui ngabud luk ketecan ratnan dereh Keristus bang bururku, ngaceku bururNeh, ieh ineh sidang.
25 Idi ui pangeh inau' ku lun ngasa' sidang ineh, maya' kekamen Allah luk pangeh biréNeh kuanku ngaceku muyuh, pad ngacing bala Allah,
26 ieh ineh luk inalum idi luk inapung ratnan amung-amung kareb idi amung-amung inul lemulun, iamo' nekini pangeh ginala' kuan amung-amung lun manu.
27 Idi kuan lemulun ineh Allah sikal maré kali' kudeng apeh do'neh, rayeh luk inalum ineh kuan lemulun luk na maya': ieh ineh Keristus luk bang nemuyuh, Keristus luk inan merapet ngalap rayeh.
28 Idi Keristus luk badén kai ineh, idi kai periteteng kuan anid-anid burur mada' anid-anid lemulun dengan ileh, pad kai miak naped anid-anid lemulun ineh pa kiung Tuhan dengan ligandeh bang Keristus.
29 Idi ini punneh ui merur teh, idi mekél dengan matu, maya' tueh Keristus luk ngakem bang negku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA