Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Surat enda i bas aku nari, Paulus rasul Kristus Jesus erdandanken ipilih Dibata, ras i bas seninanta Timotius nari.
2 Man perpulungen i Kolose: e me senina-senina si tutus erkiniteken man Jesus Kristus. Ngarap kami maka Dibata Bapanta, mereken lias ate ras kemalemen ate man bandu.
3 Adi kami ertoto kerna kam, ikataken kami bujur man Dibata, Bapa Tuhanta Jesus Kristus,
4 sabap nggo ibegi kami berita kam tek man Kristus Jesus janah keleng atendu anak-anak Dibata.
5 Kam tek dingen keleng atendu, sabap lit pengarapenndu kerna kai si nggo isikapken Dibata man bandu i Surga. Nggo ibegindu kerna si e, sanga Berita Si Mehuli i bas Dibata nari ipeseh man bandu. Berita e berita si tuhu-tuhu.
6 Berita Si Mehuli e tetap maba pasu-pasu janah nggo mbar i tengah-tengah doni enda, bagi mbarna i tengah-tengahndu. Tangtangna kin nai ibegindu lias ate Dibata, mulai kin nai iangkandu, geluhndu pe nggo ipasu-pasu Dibata.
7 Si enda ibegindu i bas Epapras nari teman si ikelengindu. Ia kalak tutus erdahin i bas dahin Kristus guna nampati kami.
8 Iturikenna man kami kerna keleng ate si ibereken Kesah Dibata man bandu.
9 Erdandanken si e me, maka mulai kin ibegi kami kerna kam, rusur kam itotoken kami man Dibata. Ipindoken kami man BaNa gelah banci ietehndu kerina sura-SuraNa, alu pemeteh ras kepentaren si ibereken KesahNa.
10 Alu bage ngasup kam nggeluh bagi si ngena ate Tuhan dingen erbahan meriah UkurNa. Seh maka kegeluhenndu erbuahken perbahanen si mehuli, janah erbagesna pe penandaindu Dibata.
11 Mbera-mbera reh gegehna kam ibahan gegeh si reh i bas KuasaNa si mbelin e nari, gelah megenggeng kam i bas kai pe.
12 Katakenlah bujur man Bapa alu meriah ukur, sabap Ia me si erbahanca kam metunggung dat bagin i bas si nggo IsikapkenNa man anak-AnakNa, i bas Kerajan Terang.
13 Kita nggo ipulahi Dibata i bas kuasa si gelap nari. IbabaNa kita ku bas Kinirajan Anak KekelengenNa.
14 Erdandanken AnakNa maka kita nggo itebusi, dosa-dosanta nggo ialemi Dibata.
15 Dibata la teridah, Kristus nge rupa Dibata si teridah. Ia lit ope denga ijadiken kerina si nasa lit.
16 Sabap arah Ia Dibata njadiken kerina si nasa lit subuk i Surga bage pe i doni, barang si teridah bage pe barang si la teridah, ikut pe kerina kesah si erkuasa ras merentah. Kerina si nasa lit ijadiken Dibata arah Kristus guna Kristus.
17 Leben nge Kristus lit asangken kerinana, janah i bas persadan ras Ia kerina si nasa lit e ndatken inganna si payo.
18 Ia me takal KulaNa, e me kepala Gereja. Ia me ulu kegeluhen KulaNa. Ia me si tangtangna ipekeke Dibata i bas si mate nari gelah Ia ngenca banci ngaloken ingan si mehergana i bas kai pe.
19 Arah peraten Dibata i bas diri AnakNa ringan alu serta si lit i bas diri Dibata.
20 Arah Ia me pe itetapken Dibata ndameken kerina si nasa lit ras DiriNa. Dibata mereken perdamen arah kematen AnakNa i kayu persilang, gelah kerina si nasa lit, subuk i doni bage pe i Surga mulihken man BaNa.
21 I bas sada paksa nai, sirang kam ras Dibata. Kam jadi ImbangNa erdandanken perbahanen ras perukurenndu si jahat.
22 Tapi genduari, erdandanken kematen kula AnakNa, iperdameken Dibata kam ras DiriNa, gelah kam badia, bersih dingen la erpandangen i adep-AdepenNa.
23 Erdandanken si e patut kam tetap patuh i bas palas si nteguh, janah ula pulahi pengarapen si nggo idatndu asum tangtangna nai ibegindu Berita Si Mehuli i bas Dibata nari e. Sabap Berita Si Mehuli i bas Dibata nari nggo mbar ku belang-belang doni enda. E me sabapna maka aku, Paulus nggo jadi sekalak si erdahin.
24 Genduari meriah ukurku ngenanami kiniseran guna kam. Sabap arah kiniseran kulangku, kudungi dahin si arus idahiken Kristus alu kiniseran guna KulaNa, e me perpulungen.
25 Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta,
26 e me rahasia si ibuniken Dibata nai-nai nari man kerina manusia, tapi genduari IpetangkasNa man anak-AnakNa.
27 Sura-sura Dibata mpetangkasken RahasiaNa man anak-AnakNa, uga ulina dingen belinna RahasiaNa e man kalak si labo Jahudi pe. Rahasia e, e me: Kristus lit i bas kam, janah mereken pengarapen maka kam dat bagin i bas kemulian Dibata.
28 Kristus kap si ipembarken kami man kerina manusia. Kerina ipersingeti dingen iajari kami alu kepentaren, gelah ibaba kami ngadap man Dibata bagi kalak si nggo dewasa i bas persadan ras Kristus.
29 Guna si enda me aku latih dingen erbebe alu gegeh ras kuasa si ibereken Kristus, si erdahin i bas aku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA