Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gee 'ito'ingo de kayokudai monga yongaku-ngaku 'o Yesusika. Ma 'orasi ge'ena 'o Yahudioka gee 'o Yunani ma demo yopake-pake koyosanangiwau 'o Yahudi totoka. Ma Yahudioka gee 'o Yunanioka ma demo yopake-pake go'ona kayongosekau, "To ngomi 'amia nge-ngeweka gee yobao-baokou 'ona koyodaenuwa manga bo-bula gee yakisiriwo-riwo manga paraluu 'o wange 'isinoi-noimi."

² Ge'enau so 'o su-suloko yamogiooko de modidi go'ona, yakitoomuno 'o nyawa gee yomote-moteke de de 'ona de kayongosekau 'onaka, "Koisurewa nako ngomi miomaogoro miositotara ma Jo'oungu ma Dutu 'awi demo ma sababu ka 'o 'inomo miosigogokoka.

³ So 'Esa moi, yaowa niakiiriki yatumudiingi naga nginioka gee manga ronga yaowa-owa de 'o Ngomasa 'Itebi-tebini yakipa-paretano de yoba-barija, gee 'idadioka miakisimanarama ma ngale ya'ao 'o manarama ge'ena.

⁴ La ngomi 'amia singina 'iriidi miolahidoa de miosihabari ma Jo'oungu ma Dutu 'awi demo."

⁵ 'Ona yoodumu yosimoteke 'o su-suloko manga demo ge'ena. Ge'enaka de yakiiriki 'o Stefanus, 'una wi ngo-ngaku 'ikua-kuata 'o Yesusika de 'o Ngomasa 'Itebi-tebini wiparetano. De 'o Filipus, 'o Prokhorus, 'o Nikanor, 'o Timon, 'o Parmenas de 'o Nikolaus 'o Antiokhia ma nyawa. 'O Nikolaus 'una ko 'o Yahudiwa ma nyawa, ma wowosamokau 'o Yahudioka manga 'agamaka.

⁶ Yatumudiingi go'ona yaki'asa 'o su-sulokika, ge'enaka de 'o su-suloko yakisilahidoa de manga giama yakidetedene yakidaga'asoko ma Jou wi barakati.

⁷ 'O Habari ma Jo'oungu ma Dutuno koge'enau kaisidagi monga, de yongaku-ngaku 'o Yerusalemuoka yodogo kaikudai monga. De manga gudai mita 'o 'imam-'imam yongaku 'o Yesusika.

⁸ 'O Stefanus 'una de wi kuasa ma Jo'oungu ma Dutuno, sigado wodiai 'o gudai 'o no-nako 'ihera-herangi de 'o hali 'ila-laagomo 'o kawasa manga bionoka.

⁹ Ma naga munuka wiributu; 'ona ge'ena 'o lo-lomu ma woa ma dutu gee yosironga Koyoyongo-yongosuawau manga Lo-lomu ma Woa. Ma lo-lomu ma woa ma dutu 'ona ge'ena 'o Yahudioka ma nyawa 'o Kireneno de 'o Aleksandriano. 'Ona de 'o Yahudi ma nyawa 'o Kilikiano de 'o Asiano, yomakaributu de 'o Stefanus.

¹⁰ Ma 'ona koya'akunuwa yaributu 'okia naga gee 'o Stefanus wongose, sababu 'o Ngomasa 'Itebi-tebini wikulaka 'o barija ma ngale wobicara.

¹¹ Ge'enau so yamuruo naga yaki'urubokunu la yosidemo 'ato, "Ngomi mio'isene 'o nyawa gu'una 'o Musa de ma Jo'oungu ma Dutu wakisiti-tingoono!"

¹² Koge'enau 'ona yosisau-sauku 'o nyawa-nyawaka, de 'o Yahudioka ma balu-balusika, de mita 'o 'agamaka yodoto-dotoika. Ge'enaka de 'ona witagoko 'o Stefanus so wi'asa wisitaari 'o Yahudioka manga 'Agamaka ma Hakimika.

¹³ De ma sakisii mita yaki'asano, so 'o Stefanus wikadengeluku. 'Ona yongose 'ato, "'O nyawa nu'una wositi-tingoono ma Jo'oungu ma Dutu wi Woa 'Itebi-tebini, de wositi-tingoono ma Jo'oungu ma Dutu wi besesongo gee 'o Musa wositota-totara.

¹⁴ 'Una watagali nanga 'adati gee 'o Musa wokulakau ngoneno! De ngomi mio'isenokau 'una wongose 'ato 'o Yesus 'o Nazaretino dua wapiakoro ma Jou wi Woa ne'ena."

¹⁵ 'O nyawa yoodumu gee yoboa-boano ge'ena 'o 'Agamaka ma Hakimi ma lo-lomuoka, wiriungini 'o Stefanusika, de 'o Stefanus wi biono yamakeka 'iletongo 'isoka 'o mala'ekati ma biono.

Kisah Para Rasul

Video Kisah Para Rasul 6

Ikuti Kami:

KONTAK | PARTISIPASI | DONASI