Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Na mio teh kareb anak-anak sekola' Yésus iuk amé' mula', idi lun Yahudi rat bawang Grika ngedureng nelun Yahudi ngaceku decur tinula'deh na ngalap babpat usin anid-anid aco.
2 Ngaceku ineh pulu' dueh rasul ineh nengamung amung-amung anak sekola' idi nepebala nedeh, "Na kai miak ugka' mada' bala Tuhan idi ngimet usin sidang.
3 Ngaceku ineh, O kinanak-kinanak, mili' rat arang muyuh tudu' burur luk buren idi luk mepanu' ku Roh Meligan idi ileh, luk miak uen kai ngeletep kuan kekamen ini.
4 Iamo' kai ini lutep bang kekamen sembayang idi mada' bala Tuhan."
5 Idi baladeh ini petulu dengan pian lun mula' ineh, idi ideh nemili' Stepanus, ieh ineh selemulun luk panu' dengan anu idi Roh Meligan, idi teh Pilipus, Prokorus, Nikanor, Timon, Parmenas, idi Nikolaus, seburur lun pupu baken rat Antiokia luk nemaya' sembayang lun Yahudi atun.
6 Idi tudu' burur ineh inuitdeh iné matun rasul-rasul; idi rasul-rasul ineh nesembayang idi nengerareng ticu'deh luundeh.
7 Idi bala Tuhan nepiar; pad anak-anak sekola' déi' Yerusalim mula' tu-tu; idi imam pana' mula' tu-tu nemaya' sembayang ineh.
8 Stepanus luk mepanu' ku katu idi ku lalud ineh teh nenganau' tuda'-tuda' kekamen luk nan mawa idi tanu'-tanu' arang pupu ineh.
9 Iamo' tuda'-tuda' lemulun sikal metueh rat neneh. Lemulun ineh ratnan ruma' sembayang, luk titen ruma' sembayang Lun luk Pinuit, ieh ineh lun Yahudi rat Kiréni idi Iskandria. Idi ideh neperurum nelun Yahudi rat Kilikia idi Asia nepesaad ni Stepanus.
10 Iamo na ideh miak metueh ratnan luk bila Stepanus dengan ileh luk ratnan Roh.
11 Idi ideh nenuap tuda'-tuda' lemulun pad ideh pebala, "Kai pangeh neninger neneh makai bala luk nguyo ni Musa idi Allah pana'."
12 Idi ideh nengacing aceh ria' kuan pupu ineh, pad lun mula' dengan lun rayeh-rayeh, idi guru-guru Ukum pelaba' useh. Idi ideh nenaban ni Stepanus idi nenguit neneh amé' matun tebubpun besara'.
13 Idi ideh nenguit tuda'-tuda' lemulun pad ideh mebalih, kebaladeh, "Lemulun ini na ugka' nguyo Ruma' Allah idi Ukum Musa pana'.
14 Kai neninger neneh pebala, idi Yésus lun Nasarét ineh sikal ngusag Ruma' Allah idi ngisu' adat luk biré Musa netau."
15 Idi amung-amung lemulun luk tudo bang tebubpun ineh nenutong Stepanus, idi kiungneh sinierdeh kudeng ayu kiung melaikat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA