Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma moi ge'ena 'o lahidoa ma 'orasi ge'ena la 'o takoro sa'ange 'o wange 'imasiniporoko, de 'o Petrus de 'o Yohanes yosikaie ma Jo'oungu ma Dutu 'awi Woade.

² Kadoka 'o ngorana ma amokoka gee yosironga "'O Ngorana 'Isure-sure", ge'enaka wimoi wolugu-lugu kawosidoboanosi. 'O nyawa gu'una 'o wange 'isinoimi wi'asaka ge'enaka la 'o pipi womaga-ga'asoko 'o nyawa-nyawaka gee yowosama ma Jou 'awi Woaka.

³ Gedagee wakimake 'o Petrus de 'o Yohanes yowosamou ma Jou wi Woaka, de 'o pipi woga'asoko.

⁴ So 'ona widi-diriidi de 'o Petrus wongose, "Nomalega ngomino!"

⁵ Ge'enaka de 'o nyawa gu'una wakilega-lega de womangano-nganono 'ato dua 'o kianikia wikula.

⁶ Ma 'o Petrus wongose 'unaka, "To ngoi 'ai pipi ka ma eta ma koi'iwa. Ma 'okia naga de ma 'ena ngoioka, ge'ena tonikula: So de ma Yesus Kristus 'o Nazaret ma nyawa gu'una 'awi kuasa, ngoi tonisuloko noma'okode la notagi!"

⁷ Ge'enaka de wolugu-lugu gu'una wi giama ma giniraika 'o Petrus wa'ao de wiriwo wi'oko de kaisigilakau 'ikuata 'o nyawa gu'una 'awi dou de 'awi pupuungu.

⁸ Ge'enaka de 'una woma'okode womatebu-tebulu, de wokurue wokadagi waika waino. Deika 'una de 'o Petrus de 'o Yohanes yomasidowosama ma Jou wi Woaka, 'ena wotagi ma de womapa-palitanga de ma Jo'oungu ma Dutu wisiare-arene.

⁹ De 'o nyawa 'iodumu wimake 'una wotagi-tagi ma de wisiare-arene ma Jo'oungu ma Dutu.

¹⁰ Ge'enaka de 'ona yonganonino 'una ge'ena wotabaga'asoko biasa wogogerie "'O Ngorana 'Isure-sureka" ma Jou wi Woaka. 'Ona kayoki-kiliri gee yamake 'okia naga 'idadiokau 'unaka.

¹¹ 'O nyawa gu'una kawakimote-motekosi 'o Petrus de 'o Yohanes. De gedagee 'ona yaruange ya'adonika 'o ngii moioka gee yosironga "'O Salomo wi Surabi", 'o nyawa yoodumu yakidolomu kayomasisisuou sababu yoherangi ma sala.

¹² Gedagee 'o Petrus wakimake 'o nyawa-nyawa go'ona, de wongose, "Ee 'Esa moi 'o Israel ma nyawa-nyawa, 'ido'oa so nioherangi 'okia naga gee 'idadiokau ne'ena de kanioungini ngomino, 'isoka kogee 'o nyawa nu'una 'idadi wotagi sababu ka to ngomi 'amia kuasa de mia 'ahu 'itiai?

¹³ Ma Jo'oungu ma Dutu gee 'o Abraham de 'o Ishak de 'o Yakub wisuba-suba, to ngone nanga edete de nanga dotumu wisuba-suba, 'unau ge'ena wisitedenokau 'o Yesus, to 'una 'awi Ro-riwo wosingou-ngounu gee ngini winisisarakaniokau yopa-paretaka, de gee ngini winiitomo 'o Pilatus wi bionoka gedagee 'o Pilatus womau wipidili.

¹⁴ 'Una wotiai de 'awi sowono koi'iwa ma de wo'ahu duga kawileleani ma Jo'oungu ma Dutu, ma ngini kawiniitomo de niogegoto la 'o Pilatus wipidili woto-to'oma wimoi.

¹⁵ Nginiou, 'Esa moi, winito'oma 'o Yesus, 'ena momongo 'unau ge'ena 'o nyawa 'iodumu ma 'ahu ma titi. De ma Jo'oungu ma Dutu wisimomikokau ngaro wosongenokau ma. Ngomi ma sirete miasakisii ge'ena.

¹⁶ 'Unau ge'ena wisi'aikokau wolugu-lugu de nginiou niosakisii. De sababu 'o ngo-ngaku ma ngale 'o Yesus de 'awi kuasa, ge'enau so wolugu-lugu gu'una wosanangiokau 'isoka gee ngini niamakekau ne'ena.

¹⁷ Aa, 'Esa moi! Ngoi tanako 'okia naga gee ngini de nia balu-balusu niodi-diai 'o Yesusika, ge'ena ma sababu ngini konianakowa 'okia niodiai.

¹⁸ De ge'enau so 'idadi mita 'okia naga gee ma Jo'oungu ma Dutu wosidemokau ma sirasi 'awi nabii yoodumika ge'ena la 'o Koana 'o Nyawa Wosilaha-laha gee ma Jo'oungu ma Dutu wosijajiokau salingou wosangisara.

¹⁹ Sababu ge'ena 'Esa moi, niotoba 'o sowono niodiai de niolio ma Jo'oungu ma Dutuka la 'ania so-sowono wa'ikiri.

²⁰ La ma Jo'oungu ma Dutu winidoboa de winisisanangi, de wosuloko 'o Yesus 'asa woboa nginika, sababu 'una ma Jo'oungu ma Dutu wiirikokau ma ngale wodadi Koana Winisilaha.

²¹ 'Una salingou wogogere 'o sorogaaka sigado ma Jo'oungu ma Dutu 'okia sonaa 'iodumu wadiai ma sungi, 'isoka ma Jo'oungu ma Dutu wongosekau 'awi nabiika so yositotarokau ma sirasi.

²² Ma nabii Musa wosidemokau 'ato, 'Ma Jo'oungu ma Dutu to ngini nia Jou 'asa wigoraka 'o nabii moi naga nginino, 'isoka ngoioli woigoraka. Ngini salingou niosigisene 'okia naga 'iodumu gee wosidemo nginika.

²³ Nago'ona koyosigisenuwa 'okia naga gee 'o nabii gu'una wosidemo-demo, 'ona 'asa yakitingaka ma Jo'oungu ma Dutu wi kawasaka de yakibinasa!'"

²⁴ Ge'enaka de 'o Petrus wongoseli, "'O nabii gee yositotarokau 'o habari ma Jo'oungu ma Dutuno, 'ikurue ma Nabii Samueloka de ino 'o nabii 'iregu-regu yotu-tu'uruno, yoodumu go'ona yosidemokau ma sirasi ma ngale 'o 'orasi ne'ena.

²⁵ Ma Jo'oungu ma Dutu 'awi jaji moi-moi gee 'o nabii yosidemo-demokau, ge'ena ma dumutu nginika. 'O jaji gee ma Jo'oungu ma Dutu wodiaiokau 'ania edete de nia dotumika, ge'ena dau ma dodaka ma Jo'oungu ma Dutu wongose 'o Abrahamuka konee: 'Ma ngale 'ani ngowaka de ni dangonuku, ngoi 'asa tosibarakati 'o sagala nyawa 'o duniaka.' "'O Petrus wongoseli, "'O jaji ge'ena ma dumutu nginika mita.

²⁶ Sababu ge'ena ma Jo'oungu ma Dutu wigoraka 'awi Ro-riwo wosingou-ngounu, de wisuloko wosirano nginino la winisibarakati. Winisibarakati ma ngekomo winisi'asa niomaogoro 'o dorou niodiai de niolio ma Jo'oungu ma Dutuka."

Kisah Para Rasul

Video Kisah Para Rasul 3

Ikuti Kami:

KONTAK | PARTISIPASI | DONASI