Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo Petrus dait Yahya lumbar ojok Gedẽng Allah jam telu kebian, nike wayene dengan gen mulai bedo'e.

² Lẽq derike, lẽq jebak saq tesebut, "Lawang Solah", araq sopoq dengan mame saq kẽpaq lẽman tebijeang. Sebilang jelo dengan nike tejauq ojok derike jari mekir lẽq dengan-dengan saq tame ojok Gedẽng Allah.

³ Sewaktu dengan nike serioq Petrus dait Yahya kenyeke tame ojok Gedẽng Allah, ie nunas sedekah lẽq ie pade.

⁴ Make Petrus dait Yahya perhatiang ie, beterus Petrus bebase, "Serioq andang tiang pade!"

⁵ Beterus dengan nike merhatiang ie pade, siq harepan gen mauq sedekah lẽman ie pade.

⁶ Laguq basen Petrus lẽq ie, "Tiang tetu-tetu ndẽq bedowẽ kẽpẽng. Laguq napi saq araq lẽq tiang nike gen tiang bẽng lẽq side: Siq pesẽngan Deside Isa Almasih dengan Nazaret nike, silaq lampaq!"

⁷ Terus Petrus tegel ime kanan dengan kẽpaq nike dait tulung ie ures. Langsung naẽn dengan nike dait mate naẽne jari kuat.

⁸ Terus ie nyelontak nganjeng, dait mulai lampaq ketoq-ketẽq. Beterus ie tame ojok Gedẽng Allah, sambil lampaq dait nyelontak-lontak dait memuji Allah.

⁹ Selapuq dengan serioq ie lampaq dait memuji-muji Allah.

¹⁰ Terus ie pade sadar bahwe ie tukang mekir saq biase tokol lẽq "Lawang Solah" lẽq Gedẽng Allah. Ie pade bengaq gati dait takjub serioq napi saq telaksane lẽq dengan nike.

¹¹ Dengan nike tetep doang turut Petrus dait Yahya. Dait sewaktu ie pade dateng lẽq sesangkok saq tesebut "Sesangkok Sulaiman", selapuq dengan ngerimpun ie pade lantaran takjub.

¹² Sewaktu Petrus serioq dengan-dengan nike, ie bebase lẽq ie pade, "Hai dengan-dengan Israel, kembẽq side pade bengaq lẽq hal niki? Kembẽq side pade tetep merhatiang tiang pade? Napi side pade paran dengan niki tao lampaq lantaran tiang pade bedowẽ kuase, atao lantaran tiang pade taat tipaq Allah?

¹³ Allahne Ibrahim, Ishak, Yakub, Allahne leluhurte, Allah nike sampun ngemulieang Hambe-Ne, Deside Isa. Deside Isa nike saq side pade serahang ojok penguase dait side pade lawan lẽq arepan Pilatus, sewaktu Pilatus gen bẽbasang Ie.

¹⁴ Laguq side pade nentang Ie Saq Suci dait Kenaq dait nuntut adẽq Pilatus bẽbasang sopoq dengan tukang nyematẽq tipaq side pade.

¹⁵ Side pade nyematẽq Ie, padahal setetune Ie sumber idup tipaq selapuq dengan. Dait Allah sampun ngidupang Ie malik lẽman ninggal. Tiang pade sampun nyaksiang mẽsaq hal nike.

¹⁶ Side pade sampun serioq dait nyaksiang napi saq telaksane lẽq dengan kẽpaq niki. Ie sampun jari kuat dait sẽhat malik sẽngaq ie percaye dalem pesẽngan Deside Isa dait kuase-Ne. Lantaran percaye lẽq Deside Isa make dengan niki bau sẽhat malik lẽq julun side pade selapuq.

¹⁷ Semeton-semeton senamian! Mangkin tiang nenaoq bahwe napi saq side pade dait pemimpin-pemimpinde laksaneang tipaq Deside Isa, nike side pade laksaneang sẽngaq side pade ndẽq nenaoq napi saq side pade kenyeke laksaneang.

¹⁸ Dait siq care nike telaksane ẽndah napi saq sampun temanikang siq Allah laẽq langan selapuq nabi-nabi-Ne, bahwe Almasih saq tejanjiqang nike harus menderite.

¹⁹ Keranaq nike, semeton-semeton senamian, pade tobat lẽman dose-dosende dait tulak tipaq Allah, adẽq Allah ngapus dose-dose side pade,

²⁰ adẽq Tuhan datengang waktu kelepasan, dait ngutus Deside Isa, saq lẽman penembẽqne tetetepang tipaq side sebagẽ Almasih.

²¹ Almasih harus meneng lẽq sorge jangke Allah nulakang selapuq-lapuqne, maraq saq temanikang siq Allah langan nabi-nabi saq suci lẽq jaman laẽq.

²² Nabi Musa sampun bebase, 'Allah, Tuhande gen ngutus tipaq side sopoq nabi lẽman bangsende mẽsaq, maraq Ie ngutus tiang. Side harus dengah selapuq saq tesampẽang siq nabi nike tipaq side.

²³ Dengan saq ndẽq perhatiang napi saq tesampẽang siq nabi nike, dengan nike gen tesingkirang lẽman dengan-dengan saq tehususang bagi Allah dait tebinaseang.'

²⁴ Nabi-nabi saq sampun nyampẽang berite lẽman Allah, mulai lẽman nabi Samuel, dait nabi-nabi lainne saq dateng mudian, selapuqne beriteang mengenai jaman niki.

²⁵ Janji-janji lẽman Allah saq tesampẽang siq nabi-nabi, nike umaq side pade. Dalem perjanjian saq Allah piaq kance leluhurde, Allah bemanik tipaq Ibrahim maraq niki, 'Lẽman keturunande Tiang gen ngebẽng berkah tipaq selapuq bangse lẽq gumi.' Perjanjian nike umaq side pade ẽndah.

²⁶ Jari, umaq side penembẽqne Allah ngidupang Hambe-Ne dait ngutus Ie tipaq side, adẽq Ie ngicanin side pade berkah siq care miaq side pade sopoq-sopoq bebalik lẽman selapuq kejahatan side pade."

Kisah Para Rasul

Video Kisah Para Rasul 3

Ikuti Kami:

KONTAK | PARTISIPASI | DONASI