Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi rap tangkog ma si Petrus ampa si Johannes hu rumah panumbahan pukul tolu, bani panorang martonggo.
2 Anjaha adong ma sada halak na repat humbani partubuhni iboan halak hujai. Ganup ari do itaruhkon sidea ia hu lambung ni horbangan ni rumah panumbahan ai, na margoran Horbangan Na Jenges, laho mangindo sibere-bere humbani halak na masuk hu rumah panumbahan ai.
3 Jadi sanggah ididah halak na repat ai si Petrus ampa si Johannes sihol masuk hu rumah panumbahan ai, ipindo ma sibere-bere.
4 Tapi ikawahkon si Petrus ampa si Johannes ma ia, nini sidea ma, “Tonggor ma dompak hanami!”
5 Jadi ikawahkon ma sidea, iarap uhurni adong jaloonni humbani sidea atap aha.
6 Tapi nini si Petrus ma, “Pirak pakon omas seng dong bangku, tapi na dong bangku ai ma hubere bam: Marhitei goran ni Jesus Kristus na hun Nasaret in, mardalan ma ho!”
7 Lanjar itangkap ma tanganni siamun, laho pajongjongkonsi, jadi mintor totap ma hae-haeni ampa towodni.
8 Mintor ijongjongkon ma lanjar mardalan, masuk ma ia rap pakon sidea hu rumah panumbahan ai mangentes-entes anjaha mirjak-irjak lanjar mamuji Naibata.
9 Ididah haganup halak na mabuei ai do ia, na mardalan anjaha na mamuji-muji ai bani Naibata.
10 Tapi ibotoh sidea do, ia do na hundul mangindo-indo i lambung ni Horbangan Na Majenges ai; longang do sidea anjaha himong mangidah na masa bani ai.
11 Tapi halani na sai odor ai ia pakon si Petrus ampa si Johannes, marurup ma roh haganup halak na mabuei ai bani sidea, bani ianan na margoran surambih ni si Salomo, halani longang ni uhur ni sidea.
12 Mangidah ai si Petrus, nini ma dompak halak na mabuei ai, “Nasiam halak Israel, mase longang uhur nasiam pasal on, mase ma sai hanami ikawahkon nasiam, songon gogohnami sandiri atap hadaulatonnami mambahen na mardalan halak on?
13 Na ipasangap Naibata ni si Abraham, si Isak ampa si Jakob, Naibata ni ompungta in do Jesus juakjuakni in, na iondoskon anjaha na iparsilangkon nasiam in i lobei ni si Latus, age pe paluahon do Ia namin mangihutkon timbanganni.
14 Iparnalang nasiam do Na Pansing anjaha Na Pintor in, tapi ipindo nasiam do paluahon bani nasiam pamunuh in.
15 Pambobai hu hagoluhan do ibunuh nasiam. In ma na dob ipapuho Naibata humbani na matei, anjaha hanami do saksi pasal ai.
16 Halani haporsayaon bani goran-Ni do, ase ipargogohi goran-Ni halak on, songon na nididah, anjaha na tinanda nasiam on; ibere haporsayaon na humbani Tuhan in do hamalumon bani i lobei nasiam haganupan.
17 Ai pe, nasiam sanina, huahap, na hurang mambotoh do nasiam, ase ihorjahon nasiam in, sonai age pangintuai nasiam.
18 Tapi na ipasaud do na dob pinatugahni hinan marhitei pamangan ni ganup nabi, ai ma: Sitaron na marsik do Kristusni.
19 Ase paubah nasiam ma uhur nasiam, anjaha mulak ma nasiam, ase tarsasap dousa nasiam,
20 andohar roh panorang malas ni uhur hun lobei ni Tuhan in, anjaha ase isuruh bani nasiam Jesus Kristus, songon na dob sinurahon-Ni hinan,
21 ai ma na dob ijalo nagori atas lobei, paima roh panorang parsuang ni haganup, na dob hinatahon ni Naibata humbani na hinan marhitei pamangan ni nabi-Ni na pansing in.
22 Ai ihatahon si Musa do, ʻPajongjongon ni Tuhan Naibata do sada nabi humbani sanina nasiam songon ahu on, Ia do sitangihonon nasiam pasal haganup sihatahononni bani nasiam.ʼ
23 Tapi sagala na so manangihon nabi ai, boiskononkon do humbani bangsa in!
24 Anjaha sagala nabi na ongga marsahap, mamungkah humbani si Samuel ampa na i pudini ai, pasal ari on do ibaritahon sidea.
25 Nasiam do anak ni nabi-nabi ai anjaha parrupei bani padan na binahen ni Naibata bani ompungta, sanggah na hinatahon-Ni ai bani si Abraham, ʻAnjaha marhitei ginomparmai dapotan pasu-pasu do haganup bangsa na i tanoh on.ʼ
26 Bani nasiam do parlobei ipapuho Naibata juakjuak-Ni, anjaha isuruh do ia, mamasu-masu nasiam, sagala na mulak humbani hajahatonni bei.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA