Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pado suatu ari, kiro-kiro pukua tigo sanjo, si Petrus jo si Yahya payi ka Rumah Tuhan, iyolah pado wakatu untuak badowa.

² Tibo disinan, di pintu kaporo nan dinamokan "Pintu Rancak", ado surang laki-laki nan lumpuah sajak dari layie. Satiyok ari inyo dibawok kasinan, untuak mintak sidakah kabake urang-urang nan masuak ka Rumah Tuhan.

³ Kutiko inyo manampak si Petrus jo si Yahya sadang masuak ka Rumah Tuhan, mako inyo mamintak kabake nan baduwo ko, supayo inyo dibari sasuatu.

⁴ Mako mancaliaklah si Petrus jo si Yahya kabake inyo, kudian si Petrus bakato, "Mancaliaklah ka kami!"

⁵ Mako inyo caliaklah si Petrus jo si Yahya, jo caliak nan manganduang arok, saraso inyo ka mandapek sasuatu.

⁶ Mako bakatolah si Petrus kabake inyo, "Ambo sadang indak bapitih. Tapi, apo nan ado di ambo, itu nan ka ambo agiahkan kabake angkau: Jo kuwaso Isa Almasih urang Nazaret tu, bajalanlah!"

⁷ Sudah tu si Petrus mamacikkan tangan suwok urang nan lumpuah tu, sambia manolong inyo untuak tagak. Sakutiko itu juwo kakinyo lansuang cegak, mato kakinyo manjadi kuwaik.

⁸ Mako inyo malompek tagak, inyo muloi bajalan kian kumari. Kudian inyo masuak ka Rumah Tuhan, samo-samo jo si Petrus sarato jo si Yahya bagai, sambia bajalan jo malompek-lompek inyo mamuji Allah.

⁹ Kasadonyo urang nan manampak inyo bajalan, sato pulo mamuji-muji Allah.

¹⁰ Sasudah tu, barulah urang-urang tu bi tawu, baraso inyo tu lah urang mintak sidakah, nan biasonyo duduak di "Pintu Rancak" di Rumah Tuhan. Urang-urang tu bi sangaik eran, inyo bi tacangang dek maliyek apo nan tajadi di diri urang nan lumpuah tu.

¹¹ Urang lumpuah nan lah cegak tu, taruih juwo manuruikkan si Petrus jo si Yahya. Kutiko nan batigo ko sampai di barando nan dinamokan "Barando Nabi Sulaiman", kasadonyo urang bi tibo ba uruang kabake inyo, dek karano urang-urang tu sangaik tacangang.

¹² Kutiko si Petrus manampak urang-urang nan ba uruang tu, mako bakatolah inyo kabake urang nan banyak tu, "Oih urang-urang Israel, baa mangko angku-angku bi tacangang maliyek kajadian ko? Baa mangko angku-angku taruih juwo bi mancaliak kabake kami? Apo angku-angku sangko dek karano ado kuwaso di kami, atau dek karano kami patuah kapado Allah, mangkonyo urang ko dapek bajalan?

¹³ Allah nan disambah dek Nabi Ibrahim, dek Nabi Ishak, dek Nabi Yakub, Allah niniak muyang kito, Allah itu pulolah, nan lah mamuliekan Pisuruah-Nyo, iyolah Isa Almasih. Isa Almasih itu pulolah nan angku-angku sarahkan kabake pihak panguwaso, angku-angku lawan di adok-an Pilatus, di kutiko Pilatus baniyaik nak ka malapehkan Baliau.

¹⁴ Baliau suci sarato jo elok, tapi angku-angku manantang Baliau, angku-angku ansik Pilatus, supayo inyo namuah malapehkan surang pambunuah, untuak mampalakukan kandak angku-angku.

¹⁵ Angku-angku bunuah Baliau, padohal nan sabananyo, Baliaulah nan tampaik asa iduik kasadonyo urang. Allah lah ma iduikkan Baliau baliak sasudah mati. Kami lah mancaliak sandiri kajadian tu.

¹⁶ Angku-angku lah maliyek, lah manampak apo nan lah tajadi di urang lumpuah ko. Inyo lah manjadi kuwaik, lah siyaik baliak, dek karano inyo picayo kabake Isa Almasih sarato jo kuwaso Baliau. Dek karano picayo kabake Isa Almasih, mako urang ko lah siyaik baliak di adok-an angku-angku kasadonyo.

¹⁷ Sudaro-sudaro! Kiniko ambo lah tawu, baraso, apo nan angku-angku pabuwek jo pamimpin-pamimpin angku-angku, taradok kabake Isa Almasih, adolah dek karano angku-angku indak mangarati apo nan dipabuwek, itu mangkonyo angku-angku karajokan nan bakcando itu.

¹⁸ Dek karano itu, mako basuwoanlah apo nan lah di agiah tawu dek Allah sa isuak, malalui kasadonyo nabi-nabi-Nyo, baraso Rajo Panyalamaik nan dijanjikan tu, musti manangguangkan sansaro.

¹⁹ Dek karano itu sudaro-sudaro, batobaiklah dari doso angku-angku, babaliaklah kapado Allah, supayo buliah Baliau apuihkan sagalo doso angku-angku.

²⁰ Tuhan ka datang kabake angku-angku, angku-angku ka marasokan rohani nan dipabarui. Tuhan ka manyuruah Isa Almasih datang kabake angku-angku, dek karano Baliau lah ditantukan dek Allah manjadi Rajo Panyalamaik untuak angku-angku.

²¹ Baliau musti tingga di sarugo dulu, sampai Allah manjadikan sagalo sasuatu baru, samo jo bakcando nan lah dikatokan dek Allah malalui nabi-nabi-Nyo di jaman sa isuak.

²² Nabi Musa panah mangatokan, 'Allah, Tuhan angku-angku tu, Baliau ka ma utuih kabake angku-angku, surang nabi dari banso angku-angku sandiri, samo jo bakcando Baliau ma utuih ambo. Angku-angku musti ma iyokan sagalo sasuatu, apo nan dikatokan dek nabi tu.

²³ Urang nan indak mamparatikan apo nan dikatokan dek nabi tu, mako urang tu ka disisiahkan dari umaik Allah, sarato ka dibinasokan.'

²⁴ Nabi-nabi nan lah panah manyampaikan barito dari Allah, muloi dari Nabi Samuel, sarato jo nabi-nabi lainnyo nan tibo kudian, kasadonyo tu mambaritokan tantang jaman nan kiniko.

²⁵ Sagalo janji Allah nan disampaikan dek nabi-nabi tu, adolah untuak angku-angku. Dalam pajanjian nan dipabuwek dek Allah jo niniak muyang angku-angku, Allah mangatokan kabake Nabi Ibrahim bakcando iko, 'Dari katurunan angkau Aden ka mambarakaik-i sagalo banso di muko bumi.' Pajanjian tu adolah untuak angku-angku juwo.

²⁶ Itulah sababnyo Allah mamiliah Pisuruah-Nyo, mako disuruah-Nyo lah Pisuruah tu datang kabake angku-angku talabiah dawulu, supayo buliah Baliau mambarakaik-i angku-angku. Caro Baliau mambarakaik-i iyolah, Baliau jadikan kasadonyo angku-angku batobaik dari caro iduik angku-angku nan jahek."

Kisah Para Rasul

Video Kisah Para Rasul 3

Ikuti Kami:

KONTAK | PARTISIPASI | DONASI