¹ “Aya-wal oso-wal, hen bi-walkam dena, ee anik emsa ere mo timsi dikim golsriwen hap denaka tonbiridak.”
² Zen kim anakan sane daꞌak, “Zen nere mae mo olkam am nesa tonbiridaꞌara,” dekam zep tangan balk tasik. Zao zep tonbiridaka,
³ “Ëe an Yahudi wal. Asa anyan Kilikia mo langna Tarsusk jaha gwek. Hwena ee awee mam gwek. Ëe zebe Farisi walya Gamaliel Bak hon tawa gwek– kire enkam de neno mae mo auyan-aza mo titi tabin ol san ang gwe-gwen hap denaye. Ëe hen ama dawem tangankam de Alapsa betek gweblan hap alp gwe-gwek– ena in kirekam hen angkam lowehe gweꞌanke.
⁴ Yesus hup de tawa tabin sin men zen ang ta gwek, ee zebe desa karek ta gwibik, hen bwinak sesek gulin gwek– sap we, sap zi. Hen ahakon tameran habe golegu gwek.
⁵ Alap mo golak de teipsinni hen tingare Yahudi mo teipsin sinodenak dena, debarenak maka emsa nenbiridaꞌan, ‘In eiwa. Hom boton gweꞌara.’ Sap zen zen abe hap suratna nolblak– desa de Damsik mo but srem golak de mam-mam wenya kip goltreizimdin hipye. Zen sap dekam de Yesussu de taibliblan zisi an san dep tahyo halzan hap– awe de hwena karek tabin hip.
⁶ “Yakla bolak denaban kime Damsik golek de gweꞌak, mumuk ennak zep ngli nakore serkam de ngatanna asa wale tazak.
⁷ Dekam zebe kamanak zank. Dekon zebe ola salsek, ‘Saulus, Saulus, em ba habe Asa karek ta gweꞌara?’
⁸ “Ki zebe ding guk, ‘Bian, em nara?’ “Dekam zep ano ola insa ding gulku, ‘Ëe an Nazaret walya Yesus– insa em karek ta gweꞌarake.’
⁹ Mensae goleteꞌak, zen ngatan enna insa man hla nuk. Hwena ola in desa asa tonblaꞌanka, zen hom anakan tame nuk, ‘Kirekam tonblala.’
¹⁰ “Ki zebe taken seblak, ‘Bian, ee basa asa syal gwibir?’ “Ki zep asa ding gulbluka, ‘Em luwen, ki hendep Damsik hatana. Zen zao asa emsa gublul– syala mensae ep wei yul soneblaꞌanye.’
¹¹ “Dekon zep asa Damsik sin dep irik da song gwek, sap ano nwena mes dawemkam de ngatanna in hap dimin nek.
¹² Zini bosena Ananias zen zep asa duwebla zaka. Zini in enho zon tasiblinkam Musa mo titi tabin ol san ang gwe-gweka, hen tingare Damsik de Yahudi zini man blikip neisik gweblak.
¹³ Zen ano alp nakon zauꞌun zaka, dekon zep asa gubluka, ‘Ano oso Saulus, emki etan kara gwen!’ Hendep ki zebe zini insa hla tak.
¹⁴ “Ki zep asa gubluka, ‘Neno mae mo auyan-aza mo Alapna mes emsa dam tasiki– dekam de zeno dwam gwibin sin denaka tawa gwibin hip, hen dekam de zere mo zer sonen lalak Zini insa hla tan hap, hen zeno ol-gunsu de salblan hapye.
¹⁵ Mensa ena oranak hlaul zuka hen sane gweka, desa esa tingare zi hip golzim halada gwera.
¹⁶ Zep angkam em basae etan eissibiꞌira? Em luwen. Ëe asa emsa baptis tal, hen em kime Alapsa Yesus mo bosekam abe taꞌanka, Zen dekam sa eno karek-karekna ep ngan gulsublula.’
¹⁷ “Dekon kime etan an san dep lwa halzak, dekam kime Alap mo gola kon gu soneblaꞌak, dekam zep ano nwena ap lirisin neblak.
¹⁸ Bian Yesussue hla tak. Man asa gubluka, ‘Nabakam! Angkam hendep Yerusalemsa hli ta. Sap awe de Asa taibliblan srem zini an molya eno abe hap de aisili dokwak nuk.’
¹⁹ “Ki zebe ding gulbluk, ‘Bian, awe de zini an mes-am asa tawa neblak: Ëe ama but srem gol-gol san song gwe-gwek– dekam de Emsa de taibliblan zisi tangole gwibin hip, hen bwi san dep tahyohal gwen hap.
²⁰ Hen Stepanuꞌu kim ere mo bose hap de jal hap dak, ee hen dekam ama anakan ola mas guk, “Em ema sam lanan.” Hen men zen daꞌak, zeno mae mo tahan bajuna eye teirensizimꞌik. Zep Bian, Emsa de taibliblan srem wenya sa ano ola dokwak nul.’
²¹ “Ki zep Bian asa ding gulbluka, ‘Molya. Em song gwen. Sap Ëye emsa Yahudi srem zi mo lang san dep zer soneꞌan– zewe de zisi de tawa tabir song gwen hap.’”
²² Nongka sap dawemkam sane daꞌak, hwena anakan kim guku, “Yahudi srem zisi ekakim tawa tabir song gwe,” dekam zep ol alhapkam egu inek, “Zini an okamana an kon emki jek-jak tan! Zen de gwen hap hom dakastiꞌira!”
²³ In kim ol nop-nopkam egu anek, dekam zep hendep zere mae mo tahan bajuna dalwesiꞌik– kasokam dikim i tiblan hap. Ahakon sonsa gulk sun yal dase gweblaꞌak.
²⁴ Dekam zep jana nabare zi mo mamna in Paulussu de zere mae mo gol mwa san zertin hip gubiridaka– zao de dawemkam tangolen naban taken-taken gweblan hap, mae hap, “Zen ba hap kire tangankam emsa jal neblaꞌan?”
²⁵ Hwena kim kire naka de tangolen hap dahaleꞌak, Paulus dekam zep Yunani olkam jana nabare zi mo mamna in mo irgwa taha nakore naka takensiblika, “San ha dawemna? – em de Roma mo irik ginnik de zisi takensiblin sremkam tangolen naye.”
²⁶ Kirekam kim salblaka, dekam zep mam zem insa gublu hanaka, “Em basae goꞌara? Zini an Roma mo irik gin nikore nakake.”
²⁷ Mam zem in ki zep song gwe zaka, zao zep takensibli zaka, “Emki asa gublun: Em san ha eiwa Roma mo irik gin nikorena?” Ki zep ding gulbluka, “In eiwa.”
²⁸ Dekam ki zep etan ding gulbluka, “Em an sap Roma mo irik ginnik de zisi hom yap. Hwena Roma mo irik ginnik de syal ta gwen zi hip mes yabe te-alasa mamkam golzimki– dekam de Roma mo irik ginnik de tin hip de suratsa ebe hap golblan hap.” Paulus ki zep hwena ding gulbluka, “Kirekam hom. Ano bian swena hen Roma mo irik ginnik denakake.”
²⁹ Men zen sap taken-taken gweblan hap golek de daꞌanzak, dekam zep nabakam sekwak gwek. Hen mam zini in zena dekam zep airiꞌanka, sap zen mes gubiridaka– Roma mo irik ginnik de zisi de totoresa tahalen hap.
³⁰ Kaꞌankam ki zep jana nabare zi mo mamna in dekam de anakan tawa gweblan hap dwam gweꞌanka, “Yahudi zini in ba hap Paulussu de tan hap asas neblaꞌan?” Dekam zep gubiridaka– Alap mo golak de syal tan zi mo mam-mamna hen Yahudi zi mo teipsin sinodenak denaka de tagal gulsun hup– zen de hwena taken-taken gweblan hap. Desan dep zep Paulussu tahalen srem naka zerhal zaka.