Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pila’ sarrimmi kacipuranga ri Kanaan.
2 Na ri wattunna la’busu’mo gandunna kaluargana Yakub, ia le’baka naballi ri Mesir, nakanamo Yakub ri sikamma ana’na, "A’lampamako pole mange anjoreng na nupammalliangki’ gandung."
3 Nakanamo Yehuda ri ia, "Le’ba’ maki’ napakainga’ guburnurka ri Mesir angkanaya tena sikali nikkulle mange andallekang punna tena naerangi andi’na ikambe.
4 Punna kipa’bianji amminawang andi’na ikambe, ero’ji ikambe mange anjoreng ammalli apa lanikanre.
5 Mingka punna tena nakipa’biangi Benyamin amminawang, taerokai ikambe a’lampa. Nasaba’ le’ba’mi napau anjo guburnurka angkanaya takkulleai ikambe mange andallekang punna tena namminawang andi’na ikambe."
6 Nakanamo Yakub, "Angngapa nanususaia’ lanri nupauanna anjo taua angkana nia’ ija andi’nu?"
7 Appialimi ke’nanga angkana, "Katena tappu’na akkuta’nanga tojeng anjo taua mae ri kambe siagang ri passala’na kaluargata. Akkuta’nangi angkana, ‘Apaka attallasa’ iji manggenu? Apaka nia’ija andi’nu bura’ne maraeng?’ Jari takkulleami tanipiali pakkuta’nanna. Antekamma lakkulle naasseng ikambe angkanaya lanasuroi ikambe angngerangi anjo andi’na ikambe?"
8 Nampa nakanamo Yehuda, "Kipa’biammi amminawang anjo anaka. Inakke lantanggongi. La’lampami ikambe linta’ sollanna tena kinia’ mate cipuru’.
9 Inakke antanggongi siagang akkullei kituntu’ ri nakke. Punna tena kuerangi ammotere’ siagang salama’, inakke antanggongi hukkunganna lalang sikontu tallasakku.
10 Ebara’ angkana tena nisallo kamma attayang, mattantu pinruammi ammotere’ ikambe."
11 Jari nakanamo manggena ke’nanga, "Punna memang musti kammai, erangi wassele’ kaminang bajika anrinni ri pa’rasanganga nampa nupantama’ ri karunnu, nanusare hadia anjo guburnurka, iamintu: Kismis, je’ne’ bani, rampa-rampa, rappo sapiri siagang rappo badang.
12 Angngerangko a’lappi rua jaina doe’, nasaba’ anjo doe’ nugappaya lalang ri massing karunnu musti nupoterangi. Gassingka nia’naja tau lingu anjo wattua.
13 Erang tommi anjo andi’nu, siagang lintakko ammotere’.
14 Poro Allata’ala Kaminang Koasaya ampagioki atinna anjo guburnurka, natu’guru’ mangngamaseang mae ri kau ngaseng, sa’genna napoterang Benyamin siagang Simeon mae ri kau ngaseng. Ia inakke anne, punna paleng musti tappelaki ana’-anakku, tanjeng mama’ ri Allata’ala."
15 Nampa a’lampamo anjo sikamma sari’battanna Yusuf. Naerammi ke’nanga anjo sikamma hadiaya siagang pole doe’ a’lappi rua jaina. A’lampami ke’nanga mange ri Mesir siagang Benyamin. Battuna ke’nanga mange anjoreng, mangemi ke’nanga andallekang ri Yusuf.
16 Ri wattunna nacini’ Yusuf anjo Benyamin siagang sikamma daenna, nakanamo ri kapala palayanna ri balla’na, "Erangi anjo taua mange ri ballakku. Langnganrei ke’nanga siagang nakke anne alloa. Jari ammolongko olo’-olo’ piara nampa nupatala."
17 Nagaukammi palayanga anjo apa naparentakanga Yusuf. Naerammi anjo sikamma sari’battanna Yusuf antama ri balla’na guburnurka.
18 Ri wattunna nierang ke’nanga antama’ ri balla’na Yusuf, a’jari malla’mi ke’nanga. Nakanamo ri nawa-nawana ke’nanga, "Nierangki’ mae anrinni kapassala’ anjo doe’ nigappaya lalang ri karunta ri wattu battu riolota pirangalloang. Lanajakkala’ silalonna maki’ ke’nanga, na naalle keledaita, nampa napa’jariki’ atanna ke’nanga."
19 Lanri kammana, ri wattunna nia’ ke’nanga ri ampi’ pakke’bu’ balla’na Yusuf, akkuta’nammi ke’nanga ri kapala ruma tanggaya,
20 nakana, "Kipammopporanga’ karaeng; le’ba’mi ikambe battu mae anrinni untu’ ammalli apa lanikanre.
21 Lalang ri pa’jappanna ikambe ammotere’, ri ero’na ikambe a’bangngi, nisungkemi karunna ikambe. Apaji nania’ ngaseng anjo sikontu doe’ lanipabayaraka lalang ri tompo’na gandunga. Tanaassengai ikambe angkana inai ampantamaki anjo doeka. Kamma-kamma anne niaki naerang ikambe ammotere’ anjo doeka. Pantaranganna anjo nia’ pole doe’ naerang ikambe untu’ ammalli pole apa lanikanrea."
22 (43:21)
23 Nakanamo anjo palayanga, "Teako mallakki. Teako bata-batai. Allata’ala, iamintu Allata’ala napakalompoa manggenu, iami ampantamaki anjo doeka ri karunnu. Le’ba’mi kutarima pa’bayara’nu untu’ anjo gandunga." Le’baki anjo naerammi Simeon mae ri ke’nanga.
24 Nampa naantara’ ke’nanga antama’ ri balla’. Nasaremi ke’nanga je’ne’ pa’bissa bangkeng. Kammayatompa keledaina ke’nanga nasaremi kanre.
25 Le’baki anjo napasadiami ke’nanga hadia naeranga ke’nanga untu’ napassareang mae ri Yusuf punna nia’ battu ri wattu tangngana alloa. Nasaba’ le’ba’mi nipauang ke’nanga angkana lasipangnganreangi ke’nanga siagang Yusuf.
26 Ri wattunna battu Yusuf mae ri balla’, napassareammi ke’nanga anjo hadiaya mae ri Yusuf, nampa su’ju’ ke’nanga.
27 Akkuta’nammi Yusuf ri passala’na kaadaanna ke’nanga. Nampa nakana, "Le’baki nucarita mae ri nakke ri passala’na manggenu toa duduamo. Antekamma kaadaanna? Baji’-baji’ji?"
28 Appialimi ke’nanga angkana, "Anjo atanta, manggena ikambe, baji’-baji’ji." Nampa su’ju’ ke’nanga ri ia.
29 Ri wattunna nacini’ Yusuf anjo Benyamin, iamintu andi’na, nakanamo, "Jari iaminne anjo andi’nu bungkoa, le’baka nupau ri nakke? Poro Nabarakkakiko Allata’ala, na’."
30 Tanatahangngami pa’mai’na Yusuf napakamma nakku’na siagang mangngamaseanna ri andi’na. Sike’de’ mami tanakullea naparrangngi kalenna. Jari sikali a’lampami linta’ battu ri anjo tampaka, nampa antama ri kamara’na angngarru’.
31 Le’baki anjo appira’nyu’mi, nampa assulu’ poleang. Naparrangngi dudumi pa’mai’na nampa nasuro patala kanrea.
32 Yusuf angnganrei ri meja maraenga, na sikamma sari’battanna ri meja maraeng todong. Sikamma tu Mesirka ri meja maraeng todong pole, lanri nakanai kalenna tuna ke’nanga punna sipangnganreang siagang tu Ibrani.
33 Sikamma sari’battanna Yusuf assidallekangi mejanna siagang mejanna Yusuf. Nisusungi ke’nanga ammempo situru’ massing umuru’na ke’nanga. Appakaramula ri kaminang toaya sa’genna ri bungkoa. Nacini’na ke’nanga antekamma carana niatoro’ anjo kammaya, assicini’-cinikimi ke’nanga siagang lannasa’.
34 Nisarei ke’nanga kanre battu ri mejanna Yusuf, nampa Benyamin a’lappi limai batena nilayani na sikamma daenna maraenga. Nampa angnganremo siagang angnginummi ke’nanga siagang Yusuf sa’genna bassoro’ ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA