Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kalaparan e Kana’an sajan sara.

² Saellana gandumma Yakub ban la-balana se ollena melle dhari Messer rowa la tadha’ kabbi, Yakub adhabu ka tra-pottrana, "Kassa’, ra, entar ka Messer pole, melle gandum."

³ Atorra Yehuda ka eppa’na, "Gubennor Messer ampon apareng parengeddan kerras ja’ kaula sataretan ta’ kengeng abali ngadhep ka salerana mon ta’ ngeba ale’.

⁴ Mon bi’ sampeyan ale’ eparengngagi noro’, kaula sataretan entara ka’assa’ pole ngobangana gandum.

⁵ Tape manabi Benyamin ta’ eparengngagi noro’, kaula ta’ entara, sabab gubennor ka’issa’ ampon adhabu ja’ kaula padha ta’ kengeng ngadhep ka ka’issa’ mon ale’ ta’ noro’."

⁶ Dhabuna Yakub, "Arapa ba’na ma’ masossa sengko’, abala ka oreng jareya ja’ ba’na gi’ andhi’ ale’?"

⁷ Saodda tra-pottrana, "Oreng ka’issa’ ros-terrosan atanya parkara kaula sataretan, jugan parkara la-bala kaula, dhabuna, ‘Apa eppa’na ba’na gi’ odhi’? Apa ba’na ta’ andhi’ taretan lake’ laenna?’ Kaula sataretan tapaksa nyaot sabendherra. Dhari ka’imma kaula se onenga ja’ gubennor ganeka makona ngeba ale’ ka ka’assa’?"

⁸ Yehuda laju mator ka eppa’na, "Diggal, pona, Pa’, ale’ me’ olle noro’. Diggal kaula se nanggunga. Mon eparengngagi, kaula ban tan-taretan pas duliya mangkat, me’ olle padha tadha’ se mate kalaparan.

⁹ Kaula dibi’ se daddi tanggunganna. Mon bi’ kaula ale’ ta’ ekenneng giba abali ka ka’dhinto e dhalem kabadha’an salamet ta’ korang pa-ponapa, kaula nanggunga okomanna saomorra.

¹⁰ Ja’ sakenga ta’ abit parana se te’-nante’an, tantona kaula ban tan-taretan laenna ampon abali dhu kale dhari Messer."

¹¹ Eppa’na laju adhabu, "Mon pajat kodu kantha jareya, ba’na ngeba hasella nagara reya se paleng bagus: kismis, maddu, palappa, komere ban buwana badam.

¹² Ngeba keya pesse tekel dhuwa’, sabab pesse se etemmo e karongnga ba’na rowa kodu epabali. Pola jareya sakeng kalero.

¹³ La giba ale’na, tape duli abali, ya.

¹⁴ Moga-moga bi’ Allah Se Mahakobasa gubennor jareya eparengngana neser ka ba’na, sopaja Benyamin ban Simeyon epabaliya ka ba’na. Dineng sengko’ reya, mon pajat la kodu kaelangan tang na’-ana’, dhu baramma’a pole."

¹⁵ Daddi tan-taretanna Yusup jareya ngeba tor-ator jareya ban pesse se bannya’na tekel dhuwa’na; saellana laju mangkat ka Messer abareng Benyamin. Sanapa’na ka jadhiya laju ngadhep ka Yusup.

¹⁶ E bakto Yusup ngoladi Benyamin abareng ban tan-taretanna jareya, laju adhabu ka kabulana se ngapalae orosanna compo’na, "Giba reng-oreng reya ka tang bengko. Bi’ sengko’ epangakana abareng ban sengko’ dhaggi’ ban-aban. Daddi sambelli ebin settong, terros paranta."

¹⁷ Kabula gella’ ajalannagi apa se edhabuwagi Yusup, pas ngeba tan-taretanna Yusup jareya ka kalenggiyanna gubennor.

¹⁸ E bakto egiba ka kalenggiyanna Yusup, tan-taretanna padha katako’an ban apekker, "Sengko’ sataretan reya egiba dha’ enna’ kabbi polana pesse se etemmo badha e dhalem karong e bakto entar dha’ enna’ se jang adha’an rowa. Sengko’ sataretan kabbi tanto pas ejebbak daksakala; mar-hemar rowa tanto ekala’, dineng sengko’ sataretan tanto laju padha ekagabay dunor kabbi."

¹⁹ Daddi, sanapa’na ka labangnga kalenggiyanna Yusup, tan-taretanna jareya atanya ka oreng se ngapalae orosan compo’na Yusup gella’,

²⁰ "Ta’ langkong, guste. Kaula sataretan paneka gi’ dhimen oneng entar ka’anja ngobangana gandum.

²¹ E bakto palemana e tengnga lorong kaula sadaja ambu, kelemma. E bakto mokka’ karong baddhana gandum ka’issa’, neng-oneng kaula sataretan padha manggi pesse se epamajar gandum padha badha e attassa gandumma bang-sebang. Kaula padha ta’ oneng pasera se nyaba’ pesse ganeka. Samangken pesse ganeka bi’ kaula ebakta sadaja, ebajarragiya ka sampeyan. Laen dhari pesse ganeka, kaula jugan abakta pesse terro ngobangana gandum pole."

²² (43:21)

²³ Kabulana Yusup jareya ngoca’, "Ampon ta’ osa tako’. Ja’ kobater. Allahna sampeyan, Allah se epojja eppa’na sampeyan, ganeka se nyaba’ pesse ganeka e dhalem karongnga sampeyan. Kaula ampon narema pessena sampeyan se ekabajar gandum ka’issa’." Saellana jareya Simeyon epakalowar, pas egiba ka tan-taretanna;

²⁴ samarena, kabbi laju padha egiba ka dhalem bengko jareya. Reng-oreng jareya eberri’i aeng baccona soko; mar-hemarra eberri’i pakan.

²⁵ Saellana jareya, tan-taretanna Yusup nyadhiya’agi le-ollena se eatorragiya ka Yusup mon rabu e baja beddhuk, sabab reng-oreng jareya ebalai ja’ epangakana abareng ban Yusup.

²⁶ E bakto Yusup napa’ ka bengko jareya, tan-taretanna ngatorragi le-ollena sambi asojud e adha’anna.

²⁷ Yusup mareksane parkara kabadha’anna tan-taretanna jareya, pas adhabu, "Ba’na la nyareta’agi ka sengko’ parkara eppa’na se la towa rowa. Baramma kabadha’anna sateya? Apa gi’ odhi’? Ban baras?"

²⁸ Saodda tan-taretanna, "Abdiepon junandalem, eppa’ abdidalem, gi’ odhi’ sareng baras." Tan-taretanna jareya laju asojud e adha’na Yusup.

²⁹ E bakto ngoladi Benyamin, ale’na, Yusup adhabu, "Daddi reya ale’na ba’na se bungso se ecareta’agi ba’na rowa? Moga-moga Allah aberkadana ba’na, Na’."

³⁰ Panggaliyanna Yusup arassa seksek polana kerrong ka ale’na, sampe’ para’ ta’ kowada ngampet, daddi laju duli nyengga daksakala, maso’ ka kamarra pas molar e jadhiya.

³¹ Saellana jareya laju araop, pas kalowar pole; panggaliyanna ewat-kowattagi, sarta laju makon sopaja dha’arra eparanta.

³² Yusup epadha’ar e meja settong, dineng tan-taretanna e meja laen. Reng-oreng Messer se badha e jadhiya ngakan e meja laenna pole, sabab oreng Messer apangrasa apes mon ngakan apolong ban oreng Ibrani.

³³ Tan-taretanna se toju’ padha ngadhep ka Yusup, epajajar menorot gilirra omorra molae dhari se paleng towa sampe’ ka se paleng ngodha. E bakto nangale’e katoju’anna se egilir menorot omorra jareya, tan-taretanna Yusup padha saleng pandeng kaheranan.

³⁴ Tan-taretanna jareya engala’agi kakanan dhari mejana Yusup. Benyamin eberri’i lema kalena ka’-kaka’na. Reng-oreng jareya laju padha ngakan abareng sampe’ kennyang.

Kejadian

Video Kejadian 43

Ikuti Kami:

KONTAK | PARTISIPASI | DONASI