Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ammantammi Yakub ri pa’rasangang Kanaan, iamintu pammantanganna manggena riolo.
2 Na iaminne riwaya’ kaluargana Yakub: Ri wattunna sampulo antuju taung umuru’na Yusuf, iamintu ana’na Yakub, sitabanna naparakai bembena siagang gimbala’na siagang ngaseng sari’battanna, iamintu ana’-ana’na Bilha siagang Zilpa, ruaya baine piarana manggena. Napabattui sikamma gau’ ja’dala’na daenna mae ri manggena.
3 Anjo Yakub la’bi nangaiangngangi Yusuf na sikamma ana’na maraenganga, lanri toami manggena nalassu’ anjo Yusuf. Ri se’reang allo napapparekangi Yusuf juba sannaka ga’gana.
4 Nacini’na sikamma daenna Yusuf angkanaya la’bi ningaiangngangi Yusuf ri manggena na kalenna ke’nanga, birisi’mi ke’nanga mae ri Yusuf. Sa’genna taerokami ke’nanga a’bicara baji’ mae ri ia.
5 Ri se’reang bangngi asso’nami Yusuf. Na ri wattunna nacarita anjo so’nana mae ri sikamma daenna, pila’ birisi’mi ke’nanga mae ri ia.
6 Iaminne nacaritaya Yusuf ri ke’nanga, "Pilangngeri sai!
7 Asso’na’ nia’ ngasengki’ ri kokoa anynyikko’ gandung. Nampa ammenteng nai’ nakke gandungku. Sikontu gandunnu ngaseng niaki ri tammulilina gandungku nampa su’ju’ ri ia."
8 Nipauammi ri sikamma daenna angkana, "Nukapangi angkana la’jari karaengko siagang lakoasako mae ri kambe?" Jari pila’ birisi’mi sikamma daenna lanri so’na-so’nana siagang lanri apa anjo nacaritaya.
9 Nampa asso’namo pole Yusuf, siagang nacaritami pole mae ri sikamma daenna angkana, "Asso’nama’ pole. Kuciniki mataalloa, bulanga siagang sampulo asse’re bintoeng su’ju’ mae ri nakke."
10 Nacarita tommi anjo so’nana mae ri manggena. Nanipauammo ri manggena angkana, "So’na apa anjo? Nupikkiriki angkanaya inakke siagang amma’nu kammayatompa sikamma sari’battannu labattu anynyomba ri kau?"
11 Sikamma daenna Yusuf angngiri mata ngasemmi. Mingka ia manggena, tuli nanawa-nawami anjo so’naya.
12 Ri se’reang allo, ri wattu a’lampana sikamma daenna Yusuf untu’ angkalawaki sikamma bembena siagang gimbala’na manggena ke’nanga,
13 nakanamo Yakub ri Yusuf, "A’lampako mange ri Sikhem, ri tampa’na sikamma daennu angkalawaki bembeta siagang gimbalatta." Appialimi Yusuf angkana, "Baji’mi, Bapa’."
14 Nakanamo manggena, "Ciniki antekamma kaadaanna sikamma daennu siagang bembeta kammayatompa gimbalatta, nampa ammoterekko mae ri nakke ampauanga’." Nalappassammi a’lampa Yusuf, ambokoi lappara’na Hebron. Tena nasallo, battumi Yusuf mange ri Sikhem.
15 Lalang a’jappana anrai’-kalau’ ri paranga, sibuntulu’mi siagang sitau bura’ne. Akkuta’nammi anjo taua ri ia angkana, "Apa nuboya?"
16 Appialimi Yusuf angkana, "Sikamma daengku. Nakalawaki ke’nanga bembena siagang gimbala’na ikambe. Kiassengi angkana kemae ke’nanga?"
17 Nakanamo anjo taua, "A’lampami ke’nanga battu anrinni. Kulangngereki nakana ke’nanga, angkana eroki ke’nanga a’lampa mange ri Dotan." A’lampami Yusuf ampinawangi ke’nanga siagang nagappami anjo sikamma daenna ri Dotan.
18 Battu bella nicini’mi Yusuf ri ke’nanga. Na ri tenanapa nabattu Yusuf mae ri ke’nanga, situru’ ngasemmi ke’nanga ero’ ambunoi Yusuf.
19 Massing nakanamo ke’nanga mae ri maraenganga, "Ciniki, anjo tukang so’naya niaki battu.
20 Umba nibunoi nampa nipasambila maya’na antama’ ri bungung kalotoroka. Nampa nipau sinampe’ angkana niallei ri olo’-olo’ sekkeka ri romanga. Nampa nicini’ sinampe’ angkana antekamma kajarianna anjo so’na-so’nana."
21 Nalangngere’mi Ruben anjo pattujunna ke’nanga. Usahami untu’ ampasalamaki Yusuf. Nakanamo, "Teako bunoi.
22 Nipela’ mami antama’ ri bungung niaka anrinni ri paranga. Mingka teako ba’ji yareka teako bokkaki." Kammaminjo kananna lanri ero’na napasalama’ anjo Yusuf, nampa nasuro ammotere’ ri balla’.
23 Ri wattunna battu Yusuf mange ri sikamma daenna, nikasarrimi nipasulukang anjo jubana sannaka ga’gana.
24 Nampa nire’resang ri ke’nanga na nipasambila antama’ ri bungung kalotoroka.
25 Ri wattunna angnganre ke’nanga, ti’ring nia’mo nacini’ ke’nanga siapa are jaina tu Ismael lalang pa’jappang battu ri Gilead mange ri Mesir. Sikamma untana ke’nanga angngerangi rampa-rampa siagang kismis.
26 Nakanamo Yehuda mae ri sikamma sari’battanna, "Apa matu-matunna nibuno anjo anditta nampa nirahasiakang anjo pammunoanga?
27 Umba nanibalukangi mae ri anjo tu Ismael. Tea’mi nipa’risi. Manna antekamma, kaia anditta tonji." Situju ngasemmi sikamma sari’battanna.
28 Na ri wattunna nia’ siapa are padanggang battu ri Midian allalo, nipasulu’mi Yusuf ri sikamma sari’battanna battu lalang ri anjo bungunga. Nampa nabalukang ke’nanga ri anjo tu Ismaelka. Na ia ballinna iamintu ruampulo doe’ pera’. Nampa nierammo Yusuf ri anjo sikamma padangganga mange ri Mesir.
29 Ri wattunna ammotere’ Ruben mange ri anjo bungunga nampa tanabuntulamo Yusuf anjoreng, nakekke’mi bajunna lanri si’nana nyawana.
30 Ammotere’mi mange ri sikamma sari’battanna nampa nakana, "Tenami anjo anaka anjoreng! Apa musti kugaukang kamma-kamma anne?"
31 Anynyamballemi ke’nanga sikayu bembe nampa natallangngang jubana Yusuf antama’ ri cera’na anjo bembea.
32 Nampa nasuro erang anjo jubaya mange ri manggena ke’nanga. Appasammi ke’nanga angkana, "Anne jubaya juba nagappa ikambe. Apaka jubana anatta anne Bapa’?"
33 Nabateimi Yakub anjo jubaya. Nampa nakanamo, "Kammatojengi, anne jubana anakku! Mattantu le’ba’mi nikanre ri olo’-olo’ sekkeka ri romanga. Kodong, anakku Yusuf matemi nibi’nya’-bi’nyara’ ri anjo olo’-oloka!"
34 Nakekke’mi pakeanna Yakub lanri si’nana nyawana, nampa ammake pakeang kasusaang. Siapa are allonna nakarruki anjo anaka.
35 Sikontu ana’na, baji’ bura’ne yareka bainea battu ngasemmi ansaleori, mingka taerokai nisaleori. Nakanamo, "Sa’gengku mate tuli lakukarrukinna anjo anakku." Kammaminjo tuli susana lanri ana’na Yusuf.
36 Na lalanna anjo wattua, le’ba’mi nibalukang Yusuf ri tu Midian ri butta Mesir. Nibalukangi mae ri Potifar, kapala pangawala’na karaenga ri balla’ karaenga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA