Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yakub neptep alenggi e nagara Kana’an, kalenggiyanna eppa’na.
2 Areya’ caretana kalowargana: E bakto Yusup, pottrana Yakub, aomor petto bellas taon, lakona ngowan embi’ ban dumba abareng ban ka’-kaka’na, iya areya na’-ana’na Bilha ban Zilpa, sellerra eppa’na. Yusup mamadul ka eppa’na parkara tengka polana ka’-kaka’na se juba’.
3 Yakub aneserran ka Yusup etembang ka tra-pottrana se laen, sabab Yusup jareya lahir e bakto Yakub la seppo. Bi’ Yakub Yusup ebadhiyagi juba se ce’ bagussa.
4 E bakto tan-taretanna tao ja’ eppa’na aneserran ka Yusup etembang ka tra-pottrana se laen, tan-taretanna jareya laju ce’ baji’na ka Yusup sampe’ ta’ endha’ acaca manes sakale ka ale’na jareya.
5 E settong malem Yusup amempe, ban e bakto mempena jareya ecareta’agi ka tan-taretanna, tan-taretanna jareya sajan ce’ baji’na ka Yusup.
6 Ca’na Yusup, "Mara edhingngagi, ya; sengko’ amempe.
7 Pangrasana sengko’ ban ba’na kabbi badha e teggal agintel gandum. Tang gintelan sodek, dineng gintelanna ba’na kabbi badha e sakalenglengnga tang gintelan, padha mennot akantha se asojud ka tang gintelan jareya."
8 "Pangrasana ba’na daddiya rato, marenta’a tan-taretanna kabbi?" ca’na tan-taretanna jareya. Daddi tan-taretanna jareya sajan atamba baji’ ka Yusup polana mempe jareya ban polana sabarang se ecareta’agi parkara tan-taretanna jareya ka eppa’na.
9 Yusup pas amempe pole, sarta laju acareta ka tan-taretanna, "Sengko’ amempe pole; pangrasana sengko’ nangale’e are, bulan ban bintang sabellas meggi’ asojud ka sengko’."
10 Mempe jareya bi’ Yusup ecareta’agi keya ka eppa’na. Bi’ eppa’na Yusup edukane, dhabuna, "Mempe apa jareya? Pangrasana ba’na, sengko’ ban ebuna ban tan-taretanna ba’na entara asojud ka ba’na?"
11 Yusup ekadenggi’i bi’ ka’-kaka’na, tape parkara jareya kabbi bi’ eppa’na terros esempen e dhalem panggaliyanna.
12 E settong are, e naleka ka’-kaka’na Yusup entar ka Sikhem ngowana embi’ ban dumbana ramana,
13 Yakub adhabu ka Yusup, "Kassa’, ra, ba’na entar ka Sikhem, ka’-kaka’na ba’na ngowan dumba e dhissa’." Sambidda Yusup, "Enggi, Pa’."
14 Dhabuna eppa’na, "Tenggu, apa ka’-kaka’na ban ba-dumbana padha ta’ nemmo aral pa-apa kabbi; mon la mare pas mole, sengko’ balai." Daddi bi’ eppa’na Yusup eater sampe’ gan Cora Hebron. Yusup napa’ ka Sikhem,
15 laju ajalan ka bara’ ka temor ta’ etemmo tojjuwanna. Pas badha oreng lalake’ nangale’e Yusup se kantha jareya. Oreng jareya atanya, "Sampeyan nyare ponapa?"
16 "Nyare ka’-kaka’ kaula, ngowan dumba," ca’na Yusup. "Ponapa sampeyan nengale, ba’ badha e ka’imma, gi’?"
17 Ca’na oreng gella’, "Gella’ pajat badha e ka’iya, samangken pon tadha’. Pangedhingnga kaula ca’epon entara ka Dotan." Daddi Yusup pas nyosol ka’-kaka’na ban etemmo e Dotan onggu.
18 Dhari jauna Yusup la etangale’e bi’ tan-taretanna. Sabellunna Yusup napa’ ka jadhiya, tan-taretanna padha asakongkel sarta motose mateyana Yusup.
19 Ca’na tan-taretanna jareya, "Abas, wa, tokang mempe rowa entar dha’ enna’.
20 Mara pate’e, mayyidda pas ontallagi ka dhalem sala settongnga somor se kerreng. Ka eppa’ kabala ekakan burun alas. Mara pas tenggu, baramma daddina pe-mempena rowa."
21 Ruben ngedhing cacana tan-taretanna jareya, laju aehteyar nolonga Yusup. "Ella, ja’ pate’e," oca’na.
22 "Cabbur ka somor e ra-ara reya bai, tape ja’ pokol ban ja’ paloka." Ruben ngoca’ kantha jareya polana andhi’ karep nolonga Yusup dhari somor jareya, pas egiba’a mole ka eppa’na.
23 E baktona Yusup napa’ ka kennengngan gella’, bi’ tan-taretanna jubana se ce’ bagussa laju ebit-sebbit.
24 Saellana jareya Yusup laju ecabbur ka somor se kerreng gella’.
25 Teppa’na tan-taretanna Yusup jareya ngakan, laju nangale’e badha kafilahna oreng Isma’il se dhateng dhari Gileyad entara ka Messer. Ta-ontana ebuwa’i palappa ban kismis.
26 Ca’na Yehuda ka tan-taretanna, "Apa gunana mate’e ale’ sarta notobi roseya jareya?
27 Mara ale’ juwal ka reng-oreng Isma’il rowa bai. Daddi ale’ ta’ osa esake’e; sabab maske baramma’a Yusup jareya gi’ taretanna sengko’ ban ba’na, dhara ban daging dibi’." Tan-taretanna saroju’,
28 ban e bakto badha gar-sodagar Midian lebat e jadhiya, Yusup epakalowar bi’ ka’-kaka’na dhari somor gella’ laju ejuwal ka reng-oreng Isma’il. Argana dhu polo pesse salaka. Saellana jareya Yusup laju egiba ka Messer.
29 Ruben abali ka somor gella’, maksodda makalowara Yusup. Tape Yusup la tadha’ e somor jareya. Daddi Ruben pas nyebbit kalambina menangka tandha sossana atena.
30 Saellana jareya Ruben pas abali ka kennengnganna tan-taretanna, laju ngoca’, "Ale’ tadha’ e somor rowa! Pas baramma sateya?"
31 Tan-taretanna Yusup pas nyambelli embi’ settong; jubana Yusup ecabbur ka dharana embi’ buru.
32 Juba se la buddhak bi’ dhara jareya egiba ka eppa’na, atorra, "Kaula manggi juba paneka. Ponapa paneka gadhuwanna pottrana sampeyan?"
33 Yakub emot ka juba jareya, dhabuna, "Iya, bendher! Tantona tang ana’ ekakan burun alas. Tang ana’ Yusup la ebit-sebbit burun alas!"
34 Yakub nyebbit rasoganna, laju ngagem rasogan karong menangka sossana panggaliyanna. Sampe’ abit Yakub se molar polana pottrana jareya.
35 Tra-pottrana lake’ bine’ padha nyander alepora panggaliyanna, tape Yakub ta’ kasokan elepor oreng. "Sampe’ mate sengko’ ta’ kera ambu se nangese tang ana’." Daddi Yakub sossa terros polana kaelangan pottrana jareya.
36 Sabatara jareya, e Messer, bi’ reng-oreng Midian rowa Yusup ejuwal ka Potifar, parwirana rato, se daddi kapalana pangawalla karaton.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA