Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa bemanik malik, "Tiang lolo anggur saq sejati, dait Bapa Tiang nike penggarapne.

² Sebilang pẽmpang saq araq lẽq Tiang saq ndẽq bebuaq, peleng-Ne dait sebilang pẽmpang saq bebuaq tekurangin daunne dait persiq-Ne adẽq luwẽqan malik buaqne.

³ Side pade sampun bersi lantaran manik saq Tiang sampẽang lẽq side pade.

⁴ Tetep ndot lẽq dalem Tiang dait Tiang ẽndah tetep ndot lẽq dalem side pade. Pade maraq pẽmpang ndẽqne iniq bebuaq lẽman diriqne mẽsaq, kecuali lamun ie tetep lẽq lolone. Maraq nike ẽndah halne side pade ndẽq gen bebuaq, lamun side pade ndẽq ndot lẽq dalem Tiang.

⁵ Tiang niki lolo anggur, dait side pade pẽmpang-pẽmpangne. Dengan saq tetep ndot lẽq dalem Tiang, dait Tiang lẽq dalem ie, ie bebuaq luwẽq; sẽngaq lamun ndẽq lẽq dalem Tiang, side ndẽq tao piaq napi-napi.

⁶ Dengan saq ndẽq tetep ndot lẽq dalem Tiang, gen tetetẽh maraq pẽmpang, beterus jari gero. Pẽmpang-pẽmpang saq maraq nike gen tekumpulang dait tetetẽh ojok dalem api, beterus tesedut.

⁷ Lamun side pade ndot lẽq dalem Tiang dait manik Tiang ndot lẽq dalem side, pade tunas napi juaq saq side mẽlẽ, dait side gen nerimaq ie.

⁸ Lamun side pade bebuaq luwẽq, Bapa Tiang temulieang; dait siq care nike side tetu-tetu pengiring Tiang.

⁹ Maraq Bapa ngasihin Tiang, maraq nike ẽndah Tiang ngasihin side pade, pade ndot lẽq dalem kasih Tiang nike.

¹⁰ Lamun side pade turut prẽntah-prẽntah Tiang, side pade gen ndot lẽq dalem kasih Tiang, pade maraq Tiang sampun turut prẽntah-prẽntah Bapa Tiang dait ndot lẽq dalem kasih-Ne.

¹¹ Selapuqne niki Tiang sampẽang tipaq side pade, adẽq sukecite Tiang araq lẽq dalem atẽnde, dait sukecitende jari sempurne.

¹² Niki prẽntah Tiang: Pade kasihin sopoq kance saq lain, pade maraq Tiang ngasihin side pade.

¹³ Ndẽq araq kasih saq belẽqan lẽman kasih sopoq dengan saq rẽde nyerahang nyawene umaq sahabat-sahabatne.

¹⁴ Side pade sahabat-sahabat Tiang lamun side pade ngelaksaneang napi saq Tiang prẽntahang tipaq side pade.

¹⁵ Side pade ndẽq Tiang sebut hambe malik, sẽngaq hambe ndẽq nenaoq napi saq tepiaq siq majikanne. Side pade Tiang sebut sahabat, sẽngaq selapuq saq Tiang dengah lẽman Bapa Tiang, sampun Tiang sampẽang lẽq side pade.

¹⁶ Ndẽq side pade saq milẽq Tiang. Laguq Tiang saq milẽq side pade dait Tiang sampun netepang side pade lumbar dait ngasilang buaq dait buaqde nike ndẽq iniq binase, adẽq napi saq side tunas tipaq Bapa kadu aran Tiang, icanin-Ne tipaq side.

¹⁷ Niki prẽntah Tiang lẽq side: Pade kasihin sopoq kance saq lain."

¹⁸ "Lamun dunie meriq lẽq side pade, pade inget bahwe Tiang sampun juluan temeriq siq dunie.

¹⁹ Seandẽne side pade lẽman dunie side pade gen tekasihin siq dunie jari dowẽne. Laguq Tiang sampun pilẽq side pade lẽman dunie niki, jari side pade ndẽqne malik dowẽn dunie. Keranaq nike dunie meriq lẽq side pade.

²⁰ Pade inget napi saq sampun Tiang sampẽang lẽq side pade, 'Hambe ndẽqne belẽqan lẽman majikanne.' Lamun ie pade sampun nganiaye Tiang, make ie gen nganiaye side pade. Lamun ie pade turut manik Tiang, make ie pade ẽndah gen turut basen side pade.

²¹ Laguq selapuqne nike gen ie pade laksaneang lẽq side pade lantaran aran Tiang, sẽngaq ie pade ndẽq kenal Allah saq sampun ngutus Tiang.

²² Seandẽne Tiang ndẽq dateng dait ndẽq nyampẽang lẽq ie pade, make ie pade ndẽq bedose. Laguq mangkin ie pade ndẽq bedowẽ alasan malik siq dose ie pade.

²³ Dengan saq meriq lẽq Tiang, ie ẽndah meriq lẽq Bapa Tiang.

²⁴ Seandẽne Tiang ndẽq ngelaksaneang karye lẽq tengaq-tengaq ie pade maraq saq ndẽq uwah telaksaneang siq dengan lain, pasti ie pade ndẽq bedose. Laguq mangkin timaq ie pade sampun serioq selapuqne nike, tetep doang ie pade meriq lẽq Tiang dait Bapa Tiang.

²⁵ Laguq manik saq sampun araq tetulis lẽq dalem Kitab Suci Taurat ie pade harus telaksane, 'Ie pade ndẽq bedowẽ alasan napi-napi ie meriq lẽq Tiang.'

²⁶ Tiang gen ngutus tipaq side Penulung saq asalne lẽman Bapa, nike Roh Kebenaran saq dateng lẽman Bapa. Lamun Roh nike dateng, Ie gen besaksi mengenai Tiang.

²⁷ Dait side pade ẽndah harus besaksi mengenai Tiang, sẽngaq side pade sampun bareng kance Tiang lẽman penembẽqne.

Yohanes

Video Yohanes 15

Ikuti Kami:

KONTAK | PARTISIPASI | DONASI