Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I Yesus nompapola tesaNa, "Yakumo hii valaa *anggur nakana, bo TuamaKu tupu ntalua anggur haitu.
2 Tinggu-tingguKu anu ledo novua nikoto bo nitedakaNa. Tapi tinggu-tinggu novua nipegasaNa pakabelo-belo ala mantambai kadea vuana.
3 Komiu tu nagasamo sabana nipariaramiumo pepatuduki nitesaKu ka komiu.
4 Komiu kana maroo mosangu rara ante Yaku bo Yaku muni maroo mosangu rara ante komiu. Tinggu-tinggu nogaa lako ri batana ledo movua. Aga tinggu-tinggu anu nosintaka ri batana haitu movua. Ivesia muni komiu ledo movua ane komiu ledo maroo mosangu rara ante Yaku.
5 Yakumo hii valaa anggur bo komiu tutumo tinggu-tingguna. Ane komiu maroo mosangu rara ante Yaku bo Yaku maroo mosangu rara ante komiu, komiu movua madea. Tapi ane komiu mogaa lako nte Yaku, ledo rapakulemiu movia nuapa-nuapa.
6 Tona ledo naroo nosangu rara ante Yaku kana ratedeaka nasimbayu mpo tinggu nu valaa ratedeaka sampe mangau. Tinggu-tinggu nangau haitu aga rapasiromu ratedeaka riara apu bo rapalabu.
7 Ane komiu maroo mosangu rara ante Yaku bo tesaKu maroo riara ntaimiu, perapimo nuapa-nuapa nipokonomiu bo radekei ka komiu.
8 Ane komiu movua madea, natantu komiu mpuu-mpuu anaguruKu. Bo poviamiu haitu mompopakita kaoge nTuamaKu ka tona.
9 Yaku nompotove komiu nasimbayu mpo TuamaKu nompotove Yaku. Komiu kana maroo mosangu rara ante Yaku ala rarasaimiu pepotoveKu.
10 Ane raoseakamiu parenta-parentaKu, komiu bate-batena mombarasai pepotoveKu, nasimbayu mpo Yaku muni nangoseaka parenta nTuamaKu bo bate-batena nombarasai pepotoveNa.
11 Pura-pura hitu niuliKu ka komiu ala kadamba nu raraKu mamala muni rarasaimiu bo kadamba nu raramiu haitu ledo ria makura.
12 Ivei parentaKu: posimpotovemo, masimbayu mpo Yaku nompotove komiu.
13 Ane saito tona mamate manjambei vega-vegana, ia mpuu-mpuu nompotove vegana haitu. Ledo ria pepotove naogepa pade haitu.
14 Bo komiu mpuu-mpuu vegaKu ane komiu mangoseaka parenta-parenta nidekeiKu ka komiu.
15 Komiu domo Kuuli batua, sabana batua ledo nisanina nia nu madikana. Tapi hitupa komiu Kuuli vegaKu sabana pura-pura anu niepeKu lako nte TuamaKu, nitesaKu muni ka komiu.
16 Ledo komiu nompelisi Yaku, tapi Yaku nompelisi komiu bo nombatudu komiu hau movua madea, haitumo vua anu ledo maupu-upu. Ane komiu movua ivesia, nuapa-nuapa raperapimiu lako nte TuamaKu sabana komiu topangoseaka Yaku, kana radekeiNa ka komiu.
17 Jadi siimo parentaKu ka komiu: posimpotovemo."
18 I Yesus nompapola tesaNa ka ana-anaguruNa ivei: "Tona nadaa ri dunia, nompovuu mata komiu, tapi toramo, Yaku nokolupa nipovuu matara.
19 Ane rapana komiu nosangu pekiri ante tona ledo nomparasaya Yaku, natantumo rapotovera komiu sabana komiu roara mboto. Tapi komiu ledo nosangu pekiri ante ira, sabana Yaku nompelisi komiu bo nopatani komiu ka Yaku. Jadi haitu sampe komiu nipovuu matara.
20 Toramo tesa niuliKumo ka komiu: batua ledo naogepa pade madikana. Ane Yaku nipandasara, natantumo komiu muni rapandasara. Ane pepatudukiKu nioseakara, natantumo raoseakara muni pepatudukimiu.
21 Pura-pura haitu rapoviara ka komiu sabana komiu najadi topangoseaka Yaku, apa ledo nisanira mpuu Alatala anu nantudu Yaku.
22 Ane rapana Yaku ledo nakava bo ledo nompatuduki ka ira, tantu ira ledo rapakasala sabana dosara. Tapi nakavamo Yaku bo nipatudukimo ira. Jadi domo mamala raulira ledo nisanira pokainggura nadosa.
23 Isema-sema navuu matana nanggita Yaku, navuu muni matana nanggita TuamaKu.
24 Ane rapana ledo nipoviaKu kabaraka-kabaraka ri ngayora anu ledo sanggani nipovia ntona ntanina, ira ledo rapakasala sabana dosara. Tapi nikitaramo kabaraka-kabaraka haitu bo ira batena navuu matara nanggita Yaku bo TuamaKu muni. Jadi ira kana rapakasala sabana dosara haitu.
25 Haitu najadi ala madupa tesa nitulisi riara Buku Gasa ivei: 'Ira navuu matara nanggita Yaku nau ledo naria sabana.'
26 Kutudu Topetulungi lako nte TuamaKu ka komiu, haitumo Nosa Gasa nu Alatala anu mompopaisani anu nakana. Tempo makava Ia, Iamo mompopaisani Yaku ka komiu.
27 Bo komiu muni mompopaisani Yaku ka todea sabana komiu nosanggani-nggani ante Yaku lako ri pamula panggaviaKu riara dunia hitu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA