Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wongose 'awi do-domoteika, "'Uwa nia singina 'isusa. Salingou niongaku ma Jo'oungu ma Dutuka de mita ngoino.

² 'Ai Dea 'awi woaka 'o ngii pomanoa-noa 'o gudaioka. Ngoi totagi ge'enaka ma ngale takalari to ngini 'ania ngii. Ngoi ma rai kotinidongosewa nako la ge'ena ko ma gounguwa.

³ 'Ania ngii takalari 'iduanga, 'asa tainoli tini'ese, la kiaka naga ngoi, ngini mita ge'enaka.

⁴ 'O ngii kiaka ngoi totagi, ngini niosikanako ma ngekomo."

⁵ Ge'enaka de 'o Tomas kawongosekau 'o Yesusika, "Jou, ngomi komiosidongoowa kiaka notagi, de kokia ngomi miosikanako ma ngekomo?"

⁶ De 'o Yesus wosango, "Ngoi ne'ena 'o ngekomo ma ngale 'o nyawa winako 'itiai ma Jo'oungu ma Dutu, de yamake 'o 'ahu 'ika-kakali. Komoiwa moi 'idadi yaika ma Jo'oungu ma Dutuka, nako ko de de ngoiwa.

⁷ Nako ngini ninako ngoi, ma raiokau ngini wininako 'ai Dea mita. Ma 'orasi ne'ena ngini wininakokau 'una, de winimakekau."

⁸ So 'o Filipus kawongosekau 'o Yesusika, "Jou, minisidumutino 'ani Dea ma Jo'oungu ma Dutu gu'una, la ngomi miosanangi."

⁹ Ma 'o Yesus wosango, "Ee Filipus, koge'enau ma do'ingo ngoi de de ngini, de konoinakowasi? 'O nyawa gee 'imakekau ngoi, ge'ena wimakekau 'ai Dea. De kokia so nongose 'ato, 'Minisidumutino 'o 'Aba gu'una'?

¹⁰ Filipus, ngona konongakuwa? 'ato ngoi de 'ai Dea ge'ena ka moi, 'imatero de ka 'o singina moi. 'Okia naga gee tangose-ngose ngonaka ge'ena ko to ngoiwa ma sirete 'ai mau. 'Okia naga gee tongose-ngose ngonaka, ge'ena ko to ngoiwa ma sirete 'ai singinano 'isupu. Ma 'ai Dea gee ka moi de de ngoi, 'una womanarama 'iodumu ge'ena.

¹¹ Kanoingaku bato, ngoi de 'ai Dea ge'ena ka moi, de koge'enali mita 'una de de ngoi. Bolo yaino ma kurangi ge'ena salingou noingaku sababu 'okia naga todiaiokau.

¹² Ma gou-goungu 'itiai 'ai demo ne'ena: 'O nyawa gee yongaku-ngaku ngoino, 'asa yadiai 'o manarama gee ngoi tadi-diai, de 'ona 'asa yadiai 'ifoloiosi 'ila-laagomo, sababu ngoi totagiou 'ai Deaka.

¹³ De 'okia naga bato nioga'asoko de to ngoi 'ai pareta, ge'ena 'asa tinileleani, la ma ngekomo ngoi ma Jo'oungu ma Dutu 'awi Ngowaka, 'o nyawa 'asa wisitedene 'ai Dea.

¹⁴ 'Okia naga bato nioga'asoko de to ngoi 'ai pareta, 'asa tadiai."

¹⁵ 'O Yesus wongoseli, "Nako ngini nisibosono ngoi, ngini 'asa niamoteke 'iodumu gee tosulo-suloko nginika.

¹⁶ De ngoi 'asa toga'asoko 'ai Deaka, la winikula 'o Ro-riwo moioli, gee dua 'imanoa nginioka kaisi'ado-'adonika.

¹⁷ 'Ena ge'ena 'o Ngomasa 'Itebi-tebini gee dua nisidumutu 'iti-tiai ma ngale ma Jo'oungu Dutu. 'O nyawa 'o duniaka gee koyongaku-ngakuwa, 'ona koyadawonguwa 'o Ngomasa 'Itebi-tebini sababu 'ona koyamakewa bolo koyanakowa. Ma ngini nianako, sababu ge'ena 'ena naga de de ngini, de dua 'ena 'imanoa 'ania singinaka.

¹⁸ Ngoi 'asa kotinisidamadakawa ka nginioka 'isoka 'o go'osisi. Ngoi 'asa tolioli nginino.

¹⁹ Ka 'o 'orasi moiou de 'o nyawa 'o duniaka dua koimakewau. Ma ngini 'asa nimakeli ngoi. De sababu ngoi to'ahu, so ngini mita 'asa nio'ahu kaisi'ado-'adonika.

²⁰ Nako ma wange ya'adono to'ahuoli, ngini 'asa nianako 'ato ngoi ka moi de 'ai Dea, de ngoi de de ngini pomarimoi.

²¹ 'O nyawa gee yadawongo de yoduaka yadiai 'okia naga gee tosulo-suloko, 'ona ge'ena 'isibosono ngoi. 'Ai Dea 'asa wakisibosono 'o nyawa gee 'isiboso-bosono ngoi, ngoi mita 'asa takisibosono 'o nyawa go'ona, de tomasidumutu 'onaka."

²² 'O Yudas gee ko 'o Yudas Iskariotuwa wosano 'o Yesusika wongose 'ato, "Jou, 'ido'oa so konomasidumutuwa 'o nyawa 'ireguka 'o duniaka ne'ena so ka ngomino?"

²³ 'O Yesus wosango, "'O nyawa gee ma gou-goungu 'isibosono ngoi, 'asa yamoteke 'ai do-dotoko. 'Ai Dea 'asa wakisibosono 'ona, de 'una de de ngoi 'asa mioboa 'onaka de miomanoa de de 'ona.

²⁴ 'O nyawa gee koisibosonuwa ngoi, 'ona koyamotekuwa 'ai do-dotoko. 'O do-dotoko gee ngini nio'ise-'isene, ge'ena ko ngoinowa, ma 'ena 'ai Deano gee woisulo-suloko.

²⁵ 'Iodumu ge'ena tosidemo nginika, ma 'orasi ngoi ka de de nginiosi.

²⁶ Ma 'o Ngomasa 'Itebi-tebini, 'o Ro-riwo gee dua 'ai Dea wosidingoto ma ngale 'ai dagali, 'ena 'asa nisidotoko 'o sagala moi-moi, de nisinganono 'okia naga tosidemokau nginika.

²⁷ Ngoi ne'ena 'o sanangi ma titi. Ngoi tinikula 'o sanangi la niosangani 'isoka ngoioli. Gee tinikula-kula nginika ge'ena 'isoka 'o nyawa 'o duniakawa nikula-kula. 'Uwa nia singina 'isusa, 'uwa nimodongo.

²⁸ Ngini nio'isenokau tinisidemo konee: 'Ngoi 'asa totagi, ma 'asa toboali nginino.' Nako ngini nisibosono ngoi, ngini dua niomorene ngoi totagi 'ai Deaka, sababu 'una 'ifoloi woamoko de de ngoi.

²⁹ Ma 'orasi ne'ena, 'iodumu ge'ena koidadiwasi 'ena tinisidemokau. La nako gee dua 'idadi, ngini 'asa niongaku.

³⁰ Ngoi dua koikudaiwau tobicara de de ngini, sababu ma 'orasi ya'adonokau 'o duniaka 'ipa-pareta ge'ena la 'o Tokata ma Koana ge'ena 'iboau. Ma 'ena koi'akunuwa 'ipareta ngoi.

³¹ Ma ge'ena 'iodumu salingou 'idadi la 'o nyawa 'o duniaka yasahe 'ato ngoi towisibosono 'ai Dea, de tadiai 'o sagala moi-moi gee 'ai Dea wosulo-suloko. Aa, nou ngone pomagoraka ne'enaka!"

Yohanes

Video Yohanes 14

Ikuti Kami:

KONTAK | PARTISIPASI | DONASI