Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kinanak-kinanakku! Na petulu mula' rat arang muyuh sikal mangun ku guru, ngaceku muyuh kali' idi tau luk mangun ku guru ini ngalap ukum luk meluun berat.
2 Amung-amung tau megéi' mepesala' ku bala tau. Kudeng seburur lemulun na mepesala' ku balaneh, ieh ineh selemulun luk meriput idi luk miak ngimet amung bururneh.
3 Tau nganau' belawan bang tang kuda pad ieh maya' lawé tau, idi amung bururneh pana' miak tau ngeliud.
4 Ngerawé teh ratnan kapal, ieh pelaba rayeh idi kerungen bui luk metueh, idi uen ngeliud amé' iapeh-iapeh luk pian lemulun luk ngimet neneh dengan ulin luk isuut tu.
5 Kudeng ineh teh dila' ineh sebabpat uang luk isuut, iamo' ieh metueh ngerayeh bururneh. Siruh kudeng apeh rayehneh pulung kara miak sabpen apui luk isuut!
6 Idi dila' ineh sebuleng apui. Idi rat arang amung-amung babpat uang tau dila' ineh aceh tana' mepanu' ku luk dat. Ieh miak ngeraruh amung-amung burur, idi miak ngeseb amung-amung ulun tau, idi ieh sebuleng pana' miak sabpen bang apui.
7 Ngaceku amung-amung pung luk meliput, suit, menipeh, idi luk bang abpa' ineh pana' miak uen lemulun ngelayo;
8 iamo' na luk idi seburur pana' luk miak ngelayo dila' ineh. Ieh ineh aceh dereh luk na sikal ugka'. Ieh panu' ku galih luk ngaté.
9 Dengan dila' ineh tau ngubur Tuhan, ieh ineh Taman, idi dengan dila' ineh teh tau ngediman lemulun luk inau' maya' ayu Allah.
10 Ratnan tang ineh teh remuat ubur-ubur idi kediman. Amung-amung luk kudeng ineh, O kinanak-kinanakku, na mayu.
11 Inanké bued abpa' ngeruat abpa' luk metalang idi abpa' luk mepét ratnan bued abpa' luk sebuleng ineh teh?
12 O kinanak-kinanakku, miakké lawa gita' ngeruat bua' saitun, idi lawa anggur ngeruat bua' gita'? Idi bued abpa' luk mepaci' na miak ngeruat abpa' luk metalang.
13 Idéké rat arang muyuh luk mileh idi luk do' kali'? Do' ieh ngegala ilehneh ratnan ulunneh luk do', dengan kekamen luk do' luk ruen dengan mebeneh niat idi ileh.
14 Iamo' kudeng bang niat muyuh, muyuh temaruh, mét niat, idi ngedita' burur muyuh sebuleng, aleg muyuh medita' niat idi mebalih pa kiung luk matu ineh.
15 Idi ileh ineh baken ileh luk macing rat surga iamo' ratnan tana', ieh ineh luk macing ratnan pian burur idi pian Iblis.
16 Ngaceku su apeh inan temaruh idi ngedita' burur sebuleng, idi su ineh teh inan ria' idi amung-amung kekamen luk dat.
17 Iamo' ileh luk rat surga pun-pun meligan, pangeh ineh sikal pedo', do' buri', idi do' baya' ukum, idi panu' dengan éi' idi bua'-bua' luk do' dengan na metebaceng, idi dengan na naluk.
18 Idi bua'-bua'neh, ieh ineh luk matu, tinibu dengan pedo' ratnan amung-amung lemulun luk ngakem kekamen luk pedo'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA