Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari-puari! Dang lamon-lamon jak hantaramu sai haga jadi guru. Keti pandai bahwa ram sai jadi guru haga lebih keras diadili jak ulun bareh.

² Ram sunyin risok nyani kesalahan. Kidang jelma sai mak pernah nyani kesalahan jama cawa-cawani, ia jelma sai sempurna, sai dapok nguasai seluruh dirini.

³ Kik ram masang kekang di banguk kuda in ia nutuk kehaga ram, maka ram dapok ngendaliko sunyin badan kuda udi.

⁴ Akuk juga kapal sebagai cuntoh. Walaupun kapal sai hal sai balak nihan rik diusung ulih angin sai keras, kidang ia dikendaliko ulih kemudi sai lunik nihan, nutuk kehagani juru mudi.

⁵ Injuk reno muneh jama ema ram; walaupun ema ram ano lunik, kidang ia dapok ngemungahko diri tentang hal-hal sai balak-balak. Bayangko hara balakni pulan sai dapok disuah ulih apui sai lunik nihan!

⁶ Ema gegoh jama apui. Di badan ram, ia ngerupako sumber kejahatan sai nyebarko kejahatan mik sunyinni diri ram. Jama apui sai asalni jak neraka, ia ngemutungko sunyinni hurik ram.

⁷ Sunyin macam binatang buas, burung, binatang melata rik iwa dapok dijinakko, rik radu muneh dijinakko ulih manusia.

⁸ Kidang emani manusia mak dapok dijinakko ulih sai jelma pun. Ema ano jahat rik mak dapok dikuasai; latap racun sai mematiko.

⁹ Ram ngegunakoni untuk ngucapko terima kasih jama Tuhan rik Bapa ram, kidang juga untuk ngutuk peperda manusia, sai radu diciptako nutuk rupa-Ni Allah.

¹⁰ Jak banguk sai gegoh luah cawa-cawa terima kasih rik juga cawa-cawa kutukan. Seharusni mak injuk reno!

¹¹ Api wat mata way sai ngemancarko way tawar rik way pahik jak sumber sai gegoh?

¹² Batang ara, Puari-puariku, mak dapok ngehasilko uah zaitun, rik batang anggor mak dapok ngehasilko uah ara. Mata way sai asin mak dapok juga ngeluahko way tawar.

¹³ Kik di hantaramu wat jelma sai bijaksana rik berbudi, hagani ia nunjukkoni jama hurik betik rik ngelakuko hal-hal sai betik, sai ditutuk kerendahan hati rik bijaksana.

¹⁴ Kidang kik keti sesera, sakik hati, rik mementingko diri tenggalan, dang ngebanggako kebijaksanaan seno, mani injuk reno keti mutar balikko kabar sai benor jak Allah.

¹⁵ Kebijaksanaan injuk reno mak asalni jak surga. Ia asalni jak dunia, jak nafsuni manusia, rik jak sitan!

¹⁶ Di dipa wat sesera rik sifat mementingko diri tenggalan, di dudi juga wat kerusuhan rik sunyin macam perbuatan sai jahat.

¹⁷ Kidang jelma sai ngedok kebijaksanaan sai asalni jak atas, ia mula-mula nihan murni, kak raduni gering bedamai, peramah, rik penutuk. Ia risok ngeni rasa kesian rik ngehasilko perbuatan-perbuatan sai betik. Ia mak memihak rik mak bepura-pura.

¹⁸ Sangun kebetikan iado hasil jak bibit damai sai ditabor ulih jelma sai cinta damai.

Yakobus

Video Yakobus 3

Ikuti Kami:

KONTAK | PARTISIPASI | DONASI