Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tangihon ma on, ale ginompar ni Jakob, na marpanggoranan bani Israel, na luar humbani bah ni Juda, na marbija ibagas goran ni Jahowa, anjaha na manaksihon Naibata ni Israel, tapi seng ibagas hasintongan atap hapintoron.
2 Tongon, marpanggorankon huta na pansing ai do sidea, anjaha marpangunsandeian bani Naibata ni Israel; Jahowa Zebaot do goran-Ni.
3 Na dob masa in, humbani sapari do in Hupatugah, humbani pamangan-Ku do ai luar, anjaha Ahu do na pabogeihon ai. Sompong do ai masa Hubahen, gabe saud do ai.
4 Halani Hubotoh, tendel do uhurmu, tangkuhukmu songon urat-urat humbani bosi anjaha pardompakanmu songon tombaga,
5 halani ai Hupabotohkon do ai bam humbani na basaia, paima masa ai, domma Hupabogeihon ai bam, ase ulang ihatahon ho, “Sisombahonku do na mambahen ai, gana-gana na huuhir ampa gana-gana na hutuang do na mamarentahkon ai.”
6 Domma itangar ho, torih ma ganupan ai! Ai seng baritahononnima ai? Pabotohkonon-Ku do bannima na baru humbani sonari ampa na ponop, na so binotohnima.
7 Sonari do ijadihon ai, seng na ijia, seng ibogei ho ai hinan, ase ulang ihatahon ho, “Tonggor ma, domma hubotoh ai hinan.”
8 Seng ongga ibogei ho, seng ongga ibotoh ho, humbani sapari seng buha ope pinggolmu. Ai Hubotoh sipangosei-osei do ho anjaha margoran siparbalik humbani partapaan nari.
9 Halani goran-Ku do ase Hutahan ringis-Ku, anjaha halani hamuliaon-Ku do ase marulak-ulakan uhur-Hu mangidah ho, ase lang Huboiskon ho.
10 Tonggor ma, domma Hupapitah ho, tapi seng songon pirak, domma Huuji ho bani pamurunan hadoyukon.
11 Halani Ahu, halani Ahu do, ase Hubahen sonai, ase ulang sambor goran-Ku; seng Hubere hasangapon-Ku bani na legan.
12 Tangihon ma Ahu, ale Jakob, ampa Israel, na dob Hudilo in! Ahu do in, Ahu do na Parlobei anjaha Ahu do na Parpudi.
13 Tongon, tangan-Ku do na pajonam tanoh on, anjaha tangan siamun-Ku paherbang langit. Dilo-dilo Ahu bani sidea, jadi jongjong ma sidea ganup.
14 Martumpu ma hanima haganup anjaha tangar ma! Ise humbani sidea na patugahkon ai? Ia, na hinaholongan ni Jahowa, Ia do na pasaudkon rosuh ni uhur-Ni dompak Babel, anjaha tangan-Ni ai do mangimbang halak Kasdim.
15 Ahu, Ahu do tongon na dob marsahap, Ahu do na mandilosi, Ahu do na parohkonsi, anjaha Ahu do na manumpaki dalanni.
16 Padohor hanima ma bangku, tangihon ma on! Humbani mungkahni seng marponop-ponop Ahu marsahap, humbani ari parjadini ai ijai do Ahu. Tapi sonari isuruh Tuhan Jahowa pakon Tonduy-Ni do ahu.
17 Sonon do hata ni Jahowa, na paluahkon ho, Na Pansing ni Israel, “Ahu do Jahowa Naibatamu, na mangajari ho ase martuah ho, na manogu ho bani dalan na patut sidalananmu.”
18 Ambit itangihon ho ma namin titah-Ku, tontu songon bah mardalan ma hatuahonmu, anjaha hapintoronmu songon gilumbang ni laut,
19 anjaha ginomparmu, songon horsik na i topi ni laut, anjaha tunasmu na luar humbani badanmu songon bueini ai; seng sasap anjaha seng magou be goranmu hun lobei-Hu.
20 Luar ma hanima hun Babel, maporus ma hun Kasdim! Patugah ma ai marsora olob-olob, pabotohkon ma ai, anjaha sar ma ai bahen hanima das hu ujung ni tanoh on! Hatahon hanima, “Domma ipaluah Jahowa juakjuak-Ni si Jakob.”
21 Seng horahan sidea sanggah na binobahon-Ni ai sidea hun halimisan. Ibahen do bah mabaor humbani dolog batu bani sidea, batu gingging ibolah, gabe marbaoran ma bah.
22 Tapi bani halak parjahat, nini Jahowa, seng dong hadameion.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA