Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Anggo galangan pardameian galangan ni sada halak, anjaha sihol galangkononni ai humbani lombu tunggal atap boru-boru, seng bulih martikas galangkononni ai hu lobei ni Jahowa.
2 Maningon tampeihononni do tanganni hu ulu ni galanganni ai anjaha sayatonni ma ai i lobei ni labah ni lampolampo partumpuan ai; anjaha maningon pispiskonon ni anak ni si Aron, malim-malim ai ma darohni ai hu anjapanjap ai inggot.
3 Anjaha humbani galangan pardameian ai, maningon galangkononni do bahen galangan apuy bani Jahowa,” taboh-taboh na manrongkob bituhani ronsi ganup taboh-taboh na i atas ni bituha ai;
4 sonai homa na dua piah-piah ampa taboh-taboh na longkot hujai, na bani binongei ai, sonai homa bongbong daroh na dalngop bani atei-atei, rap pakon piah-piah ma buatonni ai.
5 Anjaha maningon tutungon ni anak ni si Aron ma ai i atas ni anjapanjap, i atas ni soban pakon apuy, bahen galangan situtungon; galangan apuy ma ai, uap na misbou bani Jahowa.
6 Anggo humbani pinahan etek do galanganni ai bahen galangan pardameian bani Jahowa, tunggal atap boru-boru, maningon na so martikas do galangkononni ai.
7 Anggo anak ni biribiri do na sihol galangkonnonni ai, maningon boanonni do ai hu lobei ni Jahowa.
8 Tampeihononni ma tangannni hu ulu ni galanganni ai, anjaha sayatonni ma ai i lobei ni lampolampo partumpuan ai; tapi anggo daroh ni ai maningon pispiskonon ni anak ni si Aron ma ai hu anjapanjap ai inggot.
9 Humbani galangan pardameian ai maningon galangkononni do bahen galangan apuy bani Jahowa, “Taboh-taboh, ihurni ganup sirotapon dohor bani hayu tanggurungni, taboh-taboh na manrongkob bituhani ronsi haganup taboh-taboh na i atas ni bituhani ai:
10 sonai homa dua piah-piah ampa taboh-taboh na longkot hujai na bani binongei ai, sonai homa bongbong daroh na dalngop bani atei-atei ai, rap pakon piah-piah ma buatonni ai.
11 Maningon tutungon ni malim ma ai i atas ni anjapanjap bahen sipanganon ni galangan apuy bani Jahowa.
12 Anggo hambing galanganni, maningon boanonni do ai hu lobei ni Jahowa.
13 Tampeihononni ma tanganni hu uluni anjaha sayatonni ma ai i lobei ni lampolampo partumpuan ai; tapi anggo darohni ai maningon pispiskonon ni anak ni si Aron ma ai hu anjapanjap ai inggot.
14 Maningon buatonni do deba hunjai galanganni bahen galangan apuy bani Jahowa, ai ma taboh-taboh na manrongkob bituhani ronsi haganup taboh-taboh na i atas ni bituha ai;
15 sonai homa na dua piah-piah ampa taboh-taboh na longkot hujai na bani binongei ai, sonai homa bongbong daroh na dalngop bani atei-atei ai, rap pakon piah-piah ma buatonni ai.
16 Maningon tutungon ni malim ma ai i atas ni anjapanjap bahen sipanganon ni galangan apuy gabe uap na misbou bani Jahowa; sagala taboh-taboh Jahowa do simadasi.
17 Aturan na totap ma on sadokah ni dokahni ronsi ginomparnima bani ganup ianannima, sabonar seng boi do panganonnima taboh-taboh barang daroh.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA