Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mon oreng ngeba’a tor-ator sape menangka kurban salameddan, sapena olle lalake’, otaba babine’, tape ta’ olle badha calena.
2 Oreng jareya kodu nompangngagi tanangnga e attassa cethagga sapena, ban sape jareya kodu esambelli e adha’anna labangnga Kemah Socce. Mam-imam toronanna Harun kodu nyerammagi dharana ka sakalenglengnga penggirra mezba.
3 Kaangguy kurban salameddan ka PANGERAN imam kodu ngatorragi sape jareya bagiyan gajina se notobi essena tabu’na,
4 bingselan ban gajina ban bagiyanna atena se paleng bagus.
5 Jareya kabbi kodu eobbar e mezba, papolong ban kurban obbaran laenna. Bauna kurban kakanan jareya masenneng panggaliyanna PANGERAN.
6 Mon se egabaya tor-ator kaangguy kurban salameddan jareya dumba otabana embi’, dumba otaba embi’na olle lalake’ otabana babine’, tape ta’ olle badha calena.
7 Mon oreng ngatorragiya dumba, dumba jareya kodu egiba ka Kemah Socce.
8 E jadhiya oreng jareya kodu nompangngagi tanangnga e attassa cethagga dumbana, ban dumba jareya pas kodu esambelli e adha’na Kemah. Mam-imam kodu nyerammagi dharana dumba jareya ka sakalenglengnga penggirra mezba.
9 Kaangguy kurban salameddan ka PANGERAN, mam-imam kodu ngatorragi dumba jareya ka PANGERAN, iya areya bagiyan gajina, sakabbinna bunto’na se badha gajina se eketthok e seddi’anna tolang balikadda, gaji se notobi essena tabu’na,
10 bingselanna ban gajina ban bagiyanna atena se paleng bagus.
11 Imam se atugas kodu ngobbar jareya kabbi e attassa mezba menangka kurban kakanan se eatorragi ka PANGERAN.
12 Mon se eatorragi menangka kurban jareya embi’, oreng se ngatorragi kodu ngeba embi’ jareya ka Kemah Socce.
13 E jadhiya oreng jareya kodu nompangngagi tanangnga e attassa cethagga embi’na, se pas kodu esambelli e adha’anna Kemah. Mam-imam kodu nyerammagi dharana ka sakalenglengnga penggirra mezba.
14 Menangka kurban kakanan ka PANGERAN mam-imam kodu ngatorragi embi’ jareya, iya areya bagiyan gajina se notobi essena tabu’na,
15 bingselan ban gajina, ban bagiyanna atena se paleng bagus.
16 Imam se atugas kodu ngobbar jareya kabbi e attassa mezba. Bauna kurban kakanan jareya masenneng panggaliyanna PANGERAN. Gajina keban jareya kabbi kaagunganna PANGERAN.
17 Oreng Isra’il ta’ olle ngakan gaji otaba dhara; atoran jareya kodu ejalannagi salanjangnga ban kodu etoro’ bi’ saneyap oreng Isra’il e dhimma’a bai kennengnganna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA