Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa,
2 “Marsahap ma ho pakon halak Israel, hatahon ma hubani sidea, ʻOn ma panorang pesta bani Jahowa, sitingtingkononnima, gabe partumpuan na mapansing, on ma panorang pesta Bangku:
3 Ibagas na onom ari ma ihorjahon sagala horja, tapi anggo ari papituhon ai ari Sabat siparsaranonkon ma ai, ari partumpuan na mapansing; horja aha pe lang boi horjahononnima ijai bani haganup ianannima, ai ari Sabat do ai bani Jahowa.ʼ
4 On do ari raya bani Jahowa, ari partumpuan na mapansing in, sitingtingkononkon bani panorang na dob tinontuhon hinan.
5 Bani bulan sada, ari sapuluh ompat, marayak bodari, ijai ma pesta Paskah bani Jahowa.
6 Anjaha bani ari sapuluh lima bulan ai, ai ma pesta ruti na so niigaran bani Jahowa, pitu ari dokahni, maningon ruti na so niigaran do panganonnima.
7 Ari na parlobei ari partumpuan na mapansing do ai bennima; horja ari-ari aha pe lang bulih horjahononnima bani ari ai.
8 Maningon galangkononnima do galangan bani Jahowa pitu ari torus; ari papituhon ai ari partumpuan na mapansing do homa ai bennima, horja ari-ari aha pe lang bulih horjahononnima ijai.”
9 Dob ai roh ma hata ni Jahowa hubani si Musa,
10 “Marsahap ma ho hubani halak Israel, hatahon ma hubani sidea, ʻAnggo das ma hanima hu tanoh ai, na sihol bereonkon-Kai bennima, anjaha marpariama hanima ijai, maningon boanonnima do radeannima na parlobei bani malim,
11 anjaha ia ma na manatang radean ai i lobei ni Jahowa, ase gabe harosuh hanima marhitei ai, bani ari dob ari Sabat do tatangan ni malim ai.ʼ
12 Anjaha bani ari panatangonnima bani radean ai, maningon galangkononnima do sada anak ni biribiri na so martikas, na marumur satahun bahen galangan situtungon bani Jahowa,
13 rap pakon galangan sipanganon hasomanni ai; dua parsapuluh efa itak na lumat, na niagu pakon minak bahen galangan situtungon, uap na misbou bani Jahowa, anjaha galangan siinumon hasomanni ai, ai ma anggur saparompat hin.
14 Anjaha seng bulih panganonnima ruti atap pinahpah, atap niitak pe das bani ari ai, das bani na iboan hanima galangannima ai bani Naibatanima; aturan na totap ma ai, torus marsundut-sundut bani haganup ianannima.
15 Dob ai maningon hiraonnima do olat ni ari dob Sabat ai, olat ni ari dob iboan hanima radean tatangan ai; maningon gok do ai pitu minggu.
16 Das bani ari dob ari Sabat na papituhon ai lima puluh ari ma ai hiraonnima; jadi maningon galangkononnima do galangan sipanganon na baru bani Jahowa.
17 Maningon boanonnima do humbani ianannima dua ruti sitatangon, dua parsapuluh efa itak lumat ma ai, imasak marhasoman na migar, gabe limbuah bani Jahowa.
18 Anjaha maningon galangkononnima do hasoman ni ruti ai, pitu anak ni biribiri na so martikas, na marumur satahun, ampa sada anak ni lombu ampa dua biribiri tunggal; gabe galangan situtungon ma ai bani Jahowa, rap pakon galangan sipanganon ampa galangan siinumon pangkasomani ai, sada galangan situtungon uap na misbou bani Jahowa.
19 Ambahni ai maningon galangkononnima do sada hambing tunggal bahen galangan pardousaon ampa dua anak ni biribiri na marumur satahun bahen galangan pardameian.
20 Anjaha maningon tatangon ni malim ai ma ai rap pakon ruti limbuah ai bahen galangan sitatangon i lobei ni Jahowa rap pakon anak ni biribiri na dua ai; maningon papansingon do ai bani Jahowa, anjaha gabe rupei ni malim do ai.
21 Maningon sitingtingkononnima do ari na sasada ai, maningon mambahen ari partumpuan na mapansing do hanima, horja ari-ari aha pe lang bulih bahenonnima ijai; aturan na totap ma ai lalap bani haganup ianannima torus marsundut-sundut.
22 Anggo ipariamai hanima jumanima, ulang ma pariamai hanima jumanima ai das ronsi duruni, anjaha ulang ma turiangi hanima panabiannima, maningon tadingkonon do ai bani na miskin ampa bani halak dagang, Ahu do Jahowa Naibatanima.”
23 Dob ai nini Jahowa ma hubani si Musa,
24 “Hatahon ma hubani halak Israel, bani bulan pitu, bani ari parlobei ni bulan ai, maningon marpesta do hanima ijai, sada pardingatan marhasoman sora ni tarompit, sada ari partumpuan na mapansing.
25 Seng bulih horjaonkon barang horja aha ari-ari ijai, anjaha galangonkon do galangan situtungon bani Jahowa ijai.”
26 Dob ai roh ma hata ni Jahowa hubani si Musa,
27 “Bani ari sapuluh bulan pitu ai do ari pardearan, ari partumpuan na mapansing ma ai bennima, anjaha maningon unduk do hanima anjaha maningon galangkononnima do galangan situtungon bani Jahowa.
28 Horja aha pe lang bulih horjahononnima bani ari ai, ai ari pardearan do ai, laho mambahen pardearan bennima i lobei ni Jahowa, Naibatanima.
29 Tongon, ise na so paundukkon dirini bani ari ai, maningon siapkononkon do ia hun tongah-tongah ni bangsani.
30 Anjaha barang ise na mangkorjahon horja aha pe bani na sadari ai, agouhonon-Ku do ia hun tongah-tongah ni bangsani.
31 Horja aha pe seng bulih horjahononnima. Aturan na totap ma in bennima torus marsundut-sundut bani haganup ianannima.
32 Ari Sabat parsaranan na mapansing ma in bennima, anjaha maningon paundukonnima do uhurnima; bani ari pasiahkon bani bulan ai, mulai humbani marayak bodari das hubani bodari patarni ai, ijai ma marari Sabat hanima.”
33 Dob ai roh ma hata ni Jahowa hubani si Musa,
34 “Hatahon ma hubani halak Israel, bani ari sapuluh lima bulan pitu, ijai ma pesta parlampolampoan bani Jahowa, pitu ari dokahni.
35 Bani ari parlobei, ai ma pesta partumpuan na mapansing, horja ari-ari aha pe lang bulih horjahononnima ijai.
36 Pitu ari padodot maningon galangkononnima galangan situtungon bani Jahowa; ari paualuhkon pesta partumpuan na mapansing do ai bennima, anjaha maningon galangkononnima do galangan situtungon bani Jahowa. Partumpuan na majombut do ai, aha pe lang horja ari-ari bulih horjahononnima ijai.
37 In ma mata ni pesta bani Jahowa, sitingtingkononnima gabe ari partumpuan na mapansing laho manggalangkon bani Jahowa, galangan apuy, galangan situtungon ampa galangan sipanganon, galangan sisayaton ampa galangan siinumon, ganup bani panorangni bei,
38 sobali ari Sabat bani Jahowa, anjaha sobali sibere-berenima ampa nionjar ni uhurnima, na binerenima bani Jahowa.
39 Halani ai bani ari sapuluh lima bulan pitu, anggo domma ipatumpu hanima gogoh ni tanoh in, maningon bahenonnima do pesta bani Jahowa, pitu ari dokahni, ari parlobei ari parsaranan na majombut do ai, ari paualuhkon pe ari parsaranan na majombut do ai.
40 Bani ari parlobei maningon buatonnima do buah ni hayu na madear, ranting ni palem, dangkah ni hayu na tabun ampa baringin, anjaha marmalas ni uhur ma hanima i lobei ni Jahowa pitu ari dokahni.
41 Maningon pestahononnima do ai bani Jahowa pitu ari ibagas satahun; aturan na totap ma ai bani ginomparnima torus marsundut-sundut, anjaha bani bulan pitu do pestahononnima ai.
42 Pitu ari dokahni marianan hanima ibagas lampolampo, sagala partanoh Israel maningon do marianan ibagas lampolampo,
43 ase ibotoh ginomparnima, na dob hubahen halak Israel marianan ibagas lampolampo, sanggah na hupadarat sidea hun tanoh Masir, Ahu do Jahowa Naibatanima.”
44 Jadi ipatugah si Musa ma hubani halak Israel pasal panorang pesta ni Jahowa ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA