Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Napassareangi Batara mae ri Musa
2 paratorang-paratorang allo lompona agamaya, ia musti nipa’la’banga a’jari allo lompo untu’ anggaukangi ibadaya.
3 Annang allo sallona taua anjama, mingka ri allo makatujua, iamintu Allo Pammari-marianga, iami allo pammari-mariang nisa’laka untu’ mae ri Batara. Ri anjo alloa musti apparekko passibuntulang untu’ asse’re anggaukangi ibadaya siagang takkulleako anjama.
4 Iaminne allo-allo lompo Napattantua Batara siagang mustia nipa’la’bang ri wattu le’baka nipattantu.
5 Allo Lompo Paska ia nipakasuaraka untu’ ampakala’biriki Batara, appakkaramulai ri wattu labuna alloa ri tanggala’ sampulo angngappa’ bulang se’re.
6 Ammukona, tanggala’ sampulo allima, appakkaramulami Passua’-suarrang Roti Tenaya Nammake Pa’gambang, siagang lalanna tuju alloa takkulleai taua angnganre roti ammakea pa’gambang.
7 Lalanna anjo tuju alloa musti assareko koro’bang kanre-kanreang mae ri Batara. Ri allo makase’rea siagang makatujua ri anjo passua’-suarranga musti asse’re ngasengko untu’ anggaukangi ibadaya siagang takkulleako anggaukangi jama-jamang battalaka.
8 (23:7)
9 Punna battu mako sallang mange ri pa’rasangang Napassareanga Batara mae ri kau siagang nupasse’re wassele’ buttanu, basse gandung bungasaka nukatto musti nierangi mange ri imanga.
10 (23:9)
11 Ri allo le’ba’namo Allo Pammari-marianga, imanga musti napassareangi anjo gandunga salaku passare nipappicinikang mae ri Batara, sollanna sannang Batara mae ri kau.
12 Ri allo nupassareanna anjo gandunga, musti assare tongko untu’ koro’bang nitunu iamintu sikayu gimbala’ laki umuru’ sitaunga siagang tenaya callanna.
13 Untu’ koro’bang kanre-kanreang assareko labu’ rua kilo ia nipasileoka siagang minynya’ zaitun. Rasanna anjo koro’banga lanapakasannangi nyawaNa Batara. Pasiagang tongi silitere’ je’ne’ anggoro’ anjo passarenu.
14 Ri wattu tenanapa nuerangi anjo passarea mae ri Batara, takkulleai nukanre anjo gandung berua manna pole sike’de’, baji namataya, kammayatompa nilanggaya yareka nitunua nipa’jari roti. Anne paratoranga musti nituruki ri sikontu jari-jarinu sa’genna satunggu-tungguna.
15 Appakkaramula ri le’ba’namo allo Pammari-marianga, ri wattu nupassareanna mae ri Batara wassele’ basse gandung bungasa’nu, musti nurekengi pintuju tattujua allo.
16 Ri allo makalimampuloa, iamintu ri le’ba’na Allo Pammari-mariang makatujua, musti angngerangko koro’bang nipatala mae ri Batara.
17 Tunggala’ kaluargaya musti assarei ruang batu roti untu’ passare nipappicinikang mae ri Batara. Tunggala’ rotia musti nipareki battu ri ruaya kilo labu’ alusu’ ammakea pa’gambang siagang musti nipassareangi mae ri Batara salaku passare wassele’ butta bungasaka.
18 Siagang anjo rotia musti assare tongi tu Israel tuju kayu ana’ gimbala’ umuru’ sitaunga, sikayu sapi laki rungka na ruang kayu bembe. Yangasenna takkulleai niaka callanna siagang musti nipassareangi untu’ koro’bang nitunu mae ri Batara, siagang koro’bang nipatala kammayatompa koro’bang je’ne’ anggoro’. Rasanna anjo koro’banga lanapakasannangi nyawaNa Batara.
19 Passareang tongi sikayu bembe laki untu’ koro’bang pammopporang dosa siagang ruang kayu gimbala’ laki umuru’ sitaunga untu’ koro’bang passiamakkang.
20 Anjo rotia siagang ruang kayua gimbala’ musti nipassareangi ri imanga salaku passare nipappicinikang mae ri Batara siagang iaminjo a’jari bageanna imanga. Anjo sikamma passarea matangkasaki.
21 Ri anjo alloa musti asse’reko untu’ anggaukangi ibadaya siagang takkulleako anggaukangi jama-jamang battalaka. Anjo paratoranga musti nituruki ri jari-jarinu sa’genna satunggu-tungguna, manna pole kemae ke’nanga ammantang.
22 Punna akkattoko, teako kattoi gandung niaka ri biring-biring kokonnu siagang teako ammotereki ampasse’rei gandung niaka tassesa ri wattu le’ba’namo pakkattoanga. Lappassammi anjo naalle tu kasi-asia siagang bansa maraenga. Batarami Allata’alanu.
23 Tanggala’ se’re bulang tuju musti nipakalompoi salaku allo nipattantua untu’ ammari-mari. Pammateinna anjo alloa iamintu sa’ra tarompe’, siagang musti asse’reko untu’ anggaukangi ibadaya.
24 (23:23)
25 Assareko koro’bang kanre-kanreang mae ri Batara siagang teako gaukangngi jama-jamang battalaka anjo alloa.
26 Tanggala’ sampulo bulang tuju iamintu allo upacara taung-taung untu’ nipammopporanna dosana bansa Israel. Ri anjo alloa musti appuasako siagang asse’reko untu’ anggaukangi ibadaya kammayatompa assare koro’bang kanre-kanreang mae ri Batara.
27 (23:26)
28 Teako anjamai, nasaba’ anjo alloa iami allo nipammopporanna dosaya, sollannu nipammopporang ri dallekanNa Karaeng Allata’alanu.
29 Inai-nai angnganre apa-apa anjo alloa, tenamo nanibilangi umma’Na Allata’ala.
30 Siagang inai-nai anjama anjo alloa, nihukkungi ri Batara iamintu hukkungang mate.
31 Anjo paratoranga tappakei untu’ sikontu jari-jarinu manna pole kemae ammantang.
32 Appakkaramula ri wattu labuna alloa ri tanggala’ salapang anjo bulanga sa’genna labu alloa ri tanggala’ sampulo, musti nupakalompoi anjo Allo Pammari-marianga, iamintu allo le’baka nisa’la’ untu’ pammari-mariang. Sikabusu’na anjo alloa musti appuasako.
33 Allo Lompo Pa’ballakang Leko’-leko’ Kayua appakkaramulai ri tanggala’ sampulo allima bulang tuju na sallona iamintu tuju allo.
34 (23:33)
35 Ilalanna anjo tuju alloa, tunggala’ allo musti assareko koro’bang kanre-kanreang. Ri allo makase’rea siagang makasagantujua musti asse’reko untu’ anggaukangi ibadaya siagang assare koro’bang kanre-kanreang mae ri Batara. Teako anjama battalaki anjo alloa.
36 (23:35)
37 Iaminjo allo-allo lompo agamaya, ia Napattantua Batara siagang musti nupa’la’bang nupappiassengang. Ri anjo wattu passua’-suarranga musti nupakalompoi Batara iamintu asse’reko untu’ anggaukang ibadaya kammayatompa assare koro’bang kanre-kanreang, koro’bang nitunu, koro’bang nipatala, koro’bang olo’-olo’ siagang koro’bang je’ne’ anggoro’, ia jaina iamintu situru’ niparalluang allo-alloa.
38 Anjo passua’-suarranga a’jari pannambai mae ri allo-allo Pammari-mariang biasaya; jari sikamma anjo koro’bang passarea a’jari tongi pannambai mae ri passarenu biasaya, ri koro’bang untu’ anrupai tinja’nu, yareka koro’bang ero’ kalennu ia nupassareanga mae ri Batara.
39 Ri le’ba’na pakkattoanga, appakkaramula ri tanggala’ sampulo allima bulang tuju, musti nugaukangi passua’-suarranga lalang tuju allo. Allo makase’rea siagang makasagantujua iamintu allo le’ba’ nisa’la’ untu’ pammari-mariang.
40 Ri allo makase’rea musti nuallei rappo-rappoang kaminang bajika battu ri kokonnu, kammayatompa leko’-leko’ pandanga siagang tangke-tangke battua ri poko’ kayu copponga leko’na, nampa nupakaramulai passua’-suarrang karannuanga untu’ ampakalompoi Karaeng Allata’alanu.
41 Anjo passua’-suarranga musti nugaukangi tuju allo sallona. Anjo paratoranga musti nigaukangi ri jari-jarinu sa’genna satunggu-tungguna.
42 Tuju allo sallona musti ammantangi sikontu bansa Israel lalang ri pa’balla’-ballakang leko’-leko’ kayua,
43 sollanna nanaasseng jari-jarinu angkanaya Batara assuroi bansa Israel ammantang lalang ri balla’-balla’ leko’ kayu biasaya, ri wattunna Naerang ke’nanga assulu’ battu ri butta Mesir. Iami Karaeng Allata’alanu.
44 Kammaminjo nanapabattumo Musa mae ri bansa Israel sikamma paratoranga ri passala’na antekamma carana nigaukang sikamma passua’-suarranga untu’ ampakalompoi Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA