Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai idilo Jahowa ma si Musa anjaha nini ma dompaksi humbani lampolampo partumpuan ai,
2 “Patugah ma hubani halak Israel anjaha hatahon ma hubani sidea, anggo adong atap ise humbennima na sihol manggalangkon galangan hubani Jahowa, maningon humbani pinahan do, humbani lombu barang humbani biribiri do galangkononnima galangannima ai.
3 Anggo humbani lombu do galangan situtungon na sihol galangkononni ai, maningon jonggi na lang martikas do galangkononni, maningon boanonni do ai bani labah ni lampolampo partumpuan ai, ase jumpahan idop ni uhur ia i lobei ni Jahowa.
4 Dob ai tampeihononni ma tanganni hu ulu ni galangan situtungon ai, jadi jaloon ma ai halani ia, bahen pardearan bani.
5 Dob ai maningon sayatonni ma jonggi ai i lobei ni Jahowa; anjaha maningon bobanon ni anak ni si Aron, malim-malim ai ma daroh ai anjaha pispiskononni ma daroh ai hu anjapanjap ai inggot, ai ma na i lobei ni labah ni lampolampo ai.
6 Dob ai maningon bobakonni ma galangan situtungon ai anjaha toktokanni ma ai martoktok-toktok.
7 Anjaha pagaraon ni anak ni si Aron, malim-malim ai ma apuy i atas ni anjapanjap ai, anjaha nahkononni ma soban hu atas ni apuy ai.
8 Baturon ni anak ni si Aron, malim-malim ai ma sagala tinoktokni, uluni pakon taboh-tabohni ai hu atas ni soban pakon apuy na i atas ni anjapanjap ai.
9 Tapi anggo bituha-bituhani pakon hae-haeni maningon burihanni do ai bani bah, dob ai itutung malim ai ma ganupan ai i atas ni anjapanjap ai; galangan situtungon ma ai, galangan apuy, gabe uap na misbou bani Jahowa.
10 Anggo humbani pinahan etek do galangan situtungon na sihol galangkononni ai, humbani biribiri atap hambing, maningon tunggal na so martikas do galangkononni.
11 Maningon sayatonni do ai i lobei ni Jahowa, i lambung ni anjapanjap ai hampit utara, anjaha maningon pispiskonon ni anak ni si Aron, malim-malim ai ma darohni ai hubani anjapanjap ai inggot.
12 Dob ai toktokanni ma ai martoktok-toktok, pakon uluni ampa tabohni, anjaha maningon baturonni ma ai hu atas ni soban pakon apuy na i atas ni anjapanjap ai.
13 Anggo bituha-bituhani pakon hae-haeni maningon burihanni ai bani bah, dob ai maningon galangkonon ni malim ai ma haganup ai anjaha tutungonni i atas ni anjapanjap ai; galangan situtungon ma ai, galangan apuy, gabe uap na misbou bani Jahowa.
14 Anggo humbani manuk-manuk do galangan situtungon sigalangkononni ai hubani Jahowa, maningon galangkononni do ai humbani kuhuy barang humbani anak ni asas.
15 Maningon bobanon ni malim ai ma ai hu anjapanjap ai, puloskononni ma uluni anjaha tutungonni ma ai i atas ni anjapanjap ai, anjaha darohni ai patirisonni ma hu lambung ni anjapanjap ai.
16 Maningon padaohonni do buluranni pakon imputni anjaha sampakkonnonni ma ai hu lambung ni anjapanjap ai hampit hapoltakan hubani ianan ni abuan.
17 Dob ai bolahanni ma ai bani parhabonganni, tapi seng bulih sirangonni; jadi tutungon ni malim ai ma ai i atas ni anjapanjap ai bani soban na bani apuy ai; galangan situtungon ma ai, galangan apuy, uap na misbou bani Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA