Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Battu ri KemaNa, Nakioki Batara anjo Musa nampa Nasare paratorang-paratorang,
2 ia mustia naturuki tu Israel. Punna nia’ tau assare olo’-olo’ untu’ koro’bang nitunu mae ri Batara, akkullei assare sapi, gimbala’ yareka bembe.
3 Punna sapi napassareang, musti lakia siagang tenaya callanna. Anjo sapia musti naerangi mange ri pakke’bu’ KemaNa Batara, sollanna mangngellai Batara mae ri anjo taua.
4 Nampa musti napadongkoki limanna irate ri tompo’ ulunna anjo olo’-oloka, na Natarimamo Batara anjo passarena untu’ nipammopporang dosana.
5 Nampa anjo sapia musti nisamballei ri dallekang pakke’bu’na Kemaya. Cera’na musti napassareangi sikamma imang jari-jarina Harun mae ri Batara, nampa napatiri’ anjo ceraka mae ri appaka sa’rinna anjo tampa’ pakkoro’bangnganga ri dallekang pakke’bu’na Kemaya.
6 Nampa anjo taua musti napasuluki kukkulu’na siagang nakere’-kere’ anjo olo’-oloka.
7 Sikamma imanga musti apparinrai pepe’ irate ri anjo tampa’ pakkoro’bangnganga nampa nasusung kayu tunuanga irateanna.
8 Kere’-kere’na koro’banga, kammayami ulunna siagang jannana, musti napadongkoki irate ri pepeka.
9 Anjo taua musti nabissai bone parru’na siagang bongganna anjo sapia; nampa imang tugasaka musti natunu ngasengi anjo ri tampa’ pakkoro’banga. Rasanna anjo koro’banga lanapakasannangi nyawaNa Batara.
10 Punna gimbala’ yareka bembe napassareang, musti lakia siagang tenaya callanna.
11 Anjo taua musti nasamballei anjo olo’-oloka ri bageang warakkanna anjo tampa’ pakkoro’bangnganga; nampa imang-imanga musti napatiriki cera’na anjo olo’-oloka mae ri appaka sa’rinna anjo tampa’ pakkoro’bangnganga.
12 Le’baki nikere’-kere’ anjo olo’-oloka, sikontu anjo le’baka nikere’-kere’, kammayami ulunna siagang jannana musti nipadongkoki ri imanga irateanna anjo tampa’ pakkoro’bangnganga.
13 Nampa anjo taua musti nabissai bone parru’na siagang bongganna anjo olo’-oloka. Nampa musti napassareang ngaseng imanga mae ri Batara, na natunu irate ri tampa’ pakkoro’bangnganga. Rasanna anjo koro’bang nitunua lanapakasannangi nyawaNa Batara.
14 Punna jangang-jangang anjo napassareanga, musti bukkuru’ yareka jangang-jangang bodobangkeng rungkaya.
15 Musti naerangi imanga anjo jangang-janganga mae ri tampa’ pakkoro’bangnganga, nampa naputara’ kallonna na natunu ulunna irate ri tampa’ pakkoro’bangnganga. Cera’na anjo jangang-janganga musti nipaccoki assulu’ mae ri sa’rinna tampa’ pakkoro’bangnganga.
16 Parru’ pammoneang kanrena siagang sikontu bonena musti nipasulu’ ngasengi, nampa nipela’ ri pammoneang aua ri rayanganna anjo tampa’ pakkoro’bangnganga.
17 Nampa musti nikekke’ ri poko’ ka’nyi’na, mingka takkulleai sa’genna tassa’la’ anjo ka’nyi’na. Nampa musti nitunu anjo jangang-janganga irate ri tampa’ pakkoro’bangnganga. Rasanna anjo koro’bang nitunua lanapakasannangi nyawaNa Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA