Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Melkisedek ineh raca' Salem idi imam Allah luk Meluun Dita'. Ieh nepapu' ni Ibrahim kareb Ibrahim nuli' ratnan ngelaya' raca'-raca', idi Melkisedek nengeperuan neneh.
2 Idi Ibrahim nemaré kuanneh babpat pulu' ratnan luk tibanneh. (Ilung ngadan Melkisedek ineh "Raca' ratnan Luk Matu." Idi ngaceku ieh raca' Salem, ngadanneh teh Raca' Pedo'.")
3 Na luk inayud ratnan taman-tinan idi tepun Melkisedek. Idi teh na luk inayud ratnan aco lukinanneh tinganak, idi aco aténeh. Ieh mepad kudeng Anak Allah, idi ieh mangun ku imam ruked-ruked.
4 Siruh kudeng peh rayehneh! Tepun tau Ibrahim nemaré babpat pulu' ratnan amung-amung luk tiban bang bunu' ineh.
5 Maya' Ukum Musa amung-amung inul Liwi luk mangun ku imam miak ngalap babpat pulu' rat nelun Israil, ieh ineh ratnan kinanak-kinanakdeh, sagan pana' ideh ineh inul Ibrahim teh.
6 Melkisedek baken inul Liwi. Iamo' ieh nengalap babpat pulu' rat ni Ibrahim, idi ieh nengeperuan neneh luk nengalap pejani' Allah ineh.
7 Kali' rungen lemulun luk ngeperuan meluun rayeh ratnan lemulun luk ngalap peruan.
8 Imam-imam luk ngalap babpat pulu' ineh maté, iamo' maya' kudeng luk inayud, Melkisedek luk nengalap babpat pulu' ineh mulun ruked-ruked.
9 Idi teh miak belén, kareb Ibrahim nemayar babpat pulu' ineh, idi Liwi nemayar teh (sagan pana' inulneh ngalap babpat pulu' teh.)
10 Ngaceku Liwi nateh tinganak kareb Melkisedek nepapu' ni Ibrahim. Iamo' ieh bang burur tepunneh.
11 Ukum ineh biré nelun Israil luun diri imam-imam Liwi. Kudeng kekamen imam-imam Liwi meriput, na petulu inan imam baken maya' ayu Melkisedek, idi baken maya' ayu Arun.
12 Ngaceku kareb lun imam-imam linibal na miak na Ukum ineh pana' pelibal teh.
13 Ngaceku amung-amung ineh pangeh bila ratnan Tuhan tau luk ratnan inul baken, idi ratnan pupu ineh seburur pana' nateh nangun ku imam luk ngakem iring bubpun.
14 Ngaceku pangeh megala' ratnan Ieh tinganak ratnan pupu Yahuda, idi Musa na nepebala ratnan pupu ineh kareb ieh nemada' ratnan imam.
15 Idi meluun gala' nekini; seburur imam pangeh nacing luk mepad kudeng Melkisedek.
16 Na Ieh mangun ku imam maya' ukum idi lawé lemulun, iamo' maya' lalud ulun luk meruked.
17 Ngaceku pangeh inayud, "Iko ini Imam luk ruked-ruked, maya' dalan Melkisedek."
18 Dengan luk kudeng ini ukum luk atun ineh pangeh tila' ngaceku melaya' idi na ulekneh.
19 Ngaceku Ukum Musa ineh na miak ngeriput anun-anun pana'. Idi nekini aceh rapet luk meluun do' pangeh icing, luk nguit netau amé' muneng nan Allah.
20 Idi teh inan bulung Allah. Na luk idi bulung kareb lun baken ineh mangun ku imam.
21 Yésus mangun ku imam dengan aceh bulung, areb Allah nepebala Neneh, "Tuhan pangeh nepebulung, idi na Ieh nginuud: 'Iko ini Imam luk ruked-ruked.'"
22 Kudeng ineh teh Yésus mangun ku etu pejani' luk meluun do'.
23 Idi teh mula'deh nangun ku imam, ngaceku ideh maté idi na miak ngakem meruked.
24 Iamo' Yésus mulun ruked-ruked, mangun ku Imam luk ngakem dengan na libal-libal.
25 Idi Ieh melalud ngulun idi ngeligan amung-amung lemulun luk amé' matun Allah lemaba Neneh, ngaceku Ieh megéi' mulun idi mutuh ngaceku ideh.
26 Yésus ineh Imam Rayeh luk miak ngedengan netau. Ieh ineh meligan, idi na mesala'; Ieh pitad ratnan lemulun luk mesala', idi inau' medita' ratnan amung-amung langit.
27 Na Ieh mepad kudeng imam baken; idi na ulek kuanNeh maré luk barén anid-anid aco luun bubpun, pun-pun ngaceku sala'Neh, idi muci ngaceku sala' pupu ineh. Yésus pangeh nemaré baré sekua' mo' kuan amung-amung, kareb Ieh nemaré bururNeh sebuleng.
28 Ukum Musa ineh nengeletep lemulun luk melaya' mangun ku imam-imam rayeh, iamo' jani' Allah dengan bulung ineh, luk muci ratnan Ukum Musa ineh nengeletep seburur Anak ineh luk pangeh riniput macing ruked-ruked.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA