Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Raja joo Melkisedek jio kota Salem tonna anu' na imang tooi to nnurusu' kamassompan lako Puang Allataala to kaminang mala'bih. Ia tonna polemo Nabi Ibrahim mangrari ntalo ba'tu pira-pira raja, malemi imang Melkisedek ntammuii nabarakka'ii.

² Nabenni Nabi Ibrahim tawa sangpulona sininna to apa narampa. (Ia to imang Melkisedek disanga "Raja Kamarurusan", sanga ia to kada melkisedek battuananna raja kamarurusan. Disanga tooi "Raja Kasikalinoan", sanga rajai jio kota Salem, na salem battuananna kasikalinoan.)

³ Ia tee imang Melkisedek te'da bang apa diissen to jiona kalena, la tomatuanna ba'tu nunnungan nenena, te'da ia pamulanna, na te'da too cappa'na to katuoanna. Susii Anak Allataala, sanga tatta'i imang te'da cappa'na.

⁴ Jaji, lan ntee tanii nnissenni kumua tomatande tee imang Melkisedek. Ia to Nabi Ibrahim tomatande too, nasaba' iamo to napuambe' sininna to-Israel. Moi nasusi joo naangga' Nabi Ibrahim to imang Melkisedek anna benni tawa sangpulona sininna to apa narampa lan kapararian.

⁵ Situru' atoranna Nabi Musa, ia to imang bati'na Lewi la nnampa' tawa sangpulona assele'na to-Yahudi, moi napada-padai bati'na Nabi Ibrahim.

⁶ Apa ia to imang Melkisedek tangngia bati'na Lewi. Moi nasusi joo nnampa' toda tawa sangpulona to apa narampa Nabi Ibrahim. Puang Allataala mpau basse-Na lako Nabi Ibrahim. Moi nasusi joo ia to Nabi Ibrahim nabarakka'i imang Melkisedek.

⁷ Sininna tau nnissenni kumua matande ia to tomangbarakka'i na ia to todibarakka'i.

⁸ Ia to imang bati'na Lewi, to ntarima passompan tawa sangpulona, la mate sanga tolino biasai. Apa ia to imang Melkisedek, to ntarima toda passompan tawa sangpulona, tuo tarruhhi ia situru' Sura' Allataala.

⁹ Wa'ding dipau kumua, ia tonna mamajah Nabi Ibrahim tawa sangpulona lako imang Melkisedek, meccoe' todami mamajah Lewi sola bati'na, to la nnampa' tawa sangpulona assele'na padanna to-Israel.

¹⁰ Wa'ding dipau susi joo, sanga ia tonna sitammu imang Melkisedek to Nabi Ibrahim, lanmo batang kalena Nabi Ibrahim to Lewi, moi te'dapa najaji.

¹¹ Ia tonna benni Puang Allataala to atoran agama lako to-Yahudi, naangka' tooi to bati'na Lewi menjaji imang nnajahhi tau nturu'i joo atoran. Jaji, den kasiumputanna imang na atoran agama to-Yahudi. Apa te'da nakullei to imang bati'na Lewi mpupenjaji tomelo tau. Iamo joo parallu den imang laen susi imang Melkisedek to te'da napole jio mai bati'na Lewi susi imang Harun.

¹² Jaji, ia ke ia to imang bati'na Lewi mangka disullei imang laen, ia to atoran agama to-Yahudi la disulle toda ia.

¹³ Na Puangta'mo tee kusanga. Iamo to disanga imang laen, to pole jio mai pangrapuan laen. Na ia joo pangrapuan laen te'da naden bati'na menjaji imang.

¹⁴ Naissen ngasan tau kumua ia to Puangta' pole jio mai pangrapuanna Yehuda, na te'da naden napaui Nabi Musa kumua la den bati'na Yehuda menjaji imang.

¹⁵ Manassamo kumua te'da nakullei to imang bati'na Lewi mpupenjaji tomelo tau, sanga naangka'mo Puang Allataala to mesa' imang laen susi imang Melkisedek.

¹⁶ Te'da nadiangka' situru' atoran tolino, apa diangka'i sanga kuasa katuoan-Na to te'da cappa'na.

¹⁷ Sanga den diuki' lan Sura' Allataala kumua, "Ikomo to imang te'da cappa'na, susi imang Melkisedek."

¹⁸ Susimi joo natangdipuinawamo to atoran jolo, to tanglakomo na te'damo bua'na,

¹⁹ sanga ia to atoranna Nabi Musa te'da nakullei mpupenjaji melo tau, moi mesa'. Na ia to tarannuan tee too la'bi melo na ia to dirannuan jolona, antabarani mangngolo lako Puang Allataala.

²⁰ Apa pole'pi, den sapah-Na Puang Allataala anna menjaji imang to Puang Isa. Te'da namassapah tonna diangka' to imang laen.

²¹ Apa massapah Puang Allataala anna diangka' Puang Isa menjaji imang. Ia joo wattu nakuanni Puang Allataala, "Aku' Puang massapahmo, na te'da kulassullei kadang-Ku', 'Ikomo to imang te'da cappa'na.'"

²² Pajanmo lan joo sapah kumua Puang Isamo mpasijajianni to basse la'bi melo.

²³ Na sitarruhna, budai joo imang bati'na Lewi, sanga pada matei anna te'da nakullei mpatarruhhi to jamanna.

²⁴ Na ia to kaimangan-Na Puang Isa te'da nadiben tau laen, sanga tuoi te'da cappa'na.

²⁵ Iamo joo na te'da lalo natorroii mpasalama' tau to mangngolo lako Puang Allataala mpau sangan-Na, sanga tuo tarruhhi la mpangkadananni lako Puang Allataala.

²⁶ Jaji, iamo Imang Lompo taparallui to Puang Isa. Tomelo Ia, te'da sala-Na ba'tu kakurangan-Na. Todipatorro leko' jio mai tomadosa, na dipaendek de' la'bi majaona na ia to langi'.

²⁷ Te'da nasusi to Imang Lompo laen, to allo-allo mangkaroba jolo' meta'da nadidampangan, namane' mpangkaroban tobuda. Na ia to Puang Isa pissenri mangkaroba lako Puang Allataala, iamo to mpangkaroban batang kale-Na.

²⁸ Situru' atoranna Nabi Musa ia to tolino biasa diangka' menjaji Imang Lompo moi naden caccana ba'tu kakuranganna. Apa ia to sapah-Na Puang Allataala, to dipau undi na ia to atoranna Nabi Musa, nnangka'i joo Anak to te'da caccana ba'tu te'da kakuranganna menjaji Imang Lompo. Ia joo Anak mangkamo napupenjaji Tomangpasalama' te'da cappa'na.

Ibrani

Video Ibrani 7

Ikuti Kami:

KONTAK | PARTISIPASI | DONASI