Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Melkisedek inji iado raja jak Salem rik imam Allah Sai Mahatinggi. Waktu Abraham muloh jak peperangan ngalahko raja-raja, Melkisedek ratong nyambut ia rik ngeberkati ia.

² Maka Abraham ngeniko jama Melkisedek sepersepuluh jak sunyin api sai direbutni. (Gelar Melkisedek retini, mula-mula, "Raja Keadilan"; rik mani ia raja jak Salem, maka gelarni retini juga "Raja Sejahtera".)

³ Tentang Melkisedek inji mak ngedok keterangan di dipa pun bahwa ia ngedok bak atau emak atau nenek muyang; mak ngedok juga keterangan tentang kelaheranni, ataupun kematianni. Ia gegoh injuk Anak Allah; iado imam sai abadi.

⁴ Jadi, ram liak di dija hara balakni Melkisedek inji; reno balak ia sehingga Abraham, bak nenek muyang bangsa ram, ngeniko jama ia sepersepuluh jak sunyin hal sai didapokni jak pertempuran udi.

⁵ Di delom hukum agama Yahudi ditantuko bahwa imam-imam keturunan Lewi harus memungut sepersepuluh jak penghasilan umat Israel, yakdo puari-puari tian tenggalan, walaupun tian jama-jama keturunan Abraham.

⁶ Melkisedek lain keturunan Lewi, kidang ia nerima juga sepersepuluh jak sunyin sai direbut Abraham, rik ngeberkati muneh Abraham sai justru radu nerima janji-janji jak Allah.

⁷ Sangun mak dapok dibantah bahwa jelma sai diberkati yakdo lebih rendah jak jelma sai ngeberkati ia.

⁸ Imam-imam sai nerima pungutan sepersepuluh bagian ano iado jelma sai dapok mati. Kidang nutuk Alkitab, Melkisedek sai nerima pengenian sepersepuluh bagian ano iado jelma sai tetap hurik.

⁹ Ngasi diucakko, bahwa Lewi -- sai keturunanni memungut sepersepuluh bagian jak umat Israel -- ngebayar juga bagian udi liwat Abraham, waktu Abraham ngebayarni jama Melkisedek.

¹⁰ Walaupun Lewi makkung laher, kidang ngasi diucakko ia radu wat delom badan Abraham nenek muyangni, waktu Melkisedek betungga jama Abraham.

¹¹ Di debah pimpinan imam-imam Lewi, hukum agama Yahudi dikeniko jama umat Israel. Mani imam-imam Lewi tumbai udi mak dapok ngelakuko jama sempurna api sai harus diguaiko, maka harus wat imam bareh, yakdo sai injuk Imam Melkisedek, rik lain jak golongan Imam Harun lagi!

¹² Nah, kik kedudukan imam-imam berubah, hukum agama Yahudi pun harus berubah muneh.

¹³ Sai dimaksud di dija iado Tuhan ram: Ia jak suku bareh rik makkung pernah sai jelma pun jak suku-Ni betugas sebagai imam.

¹⁴ Sunyinni jelma pandai bahwa Tuhan ram asalni jak suku Yehuda; rik Musa mak pernah nyebut udi sewaktu ia cawa tentang imam-imam.

¹⁵ Hal sai dikicikko inji jadi lebih jelas lagi, jama munculni sai imam bareh injuk Melkisedek.

¹⁶ Ia diangkat jadi imam, mawat bedasarko atoran-atoran manusia, melainko bedasarko hurik-Ni sai bekuasa rik sai mak ngedok akherni.

¹⁷ Mani di delom Alkitab diucakko, "Nikudo imam selama-lamani, injuk Imam Melkisedek."

¹⁸ Jadi, tano atoran sai saka radu disingkerko, mani mak kuat rik mak beguna.

¹⁹ Hukum agama Yahudi mak dapok nyani sai hal pun jadi sempurna. Udi sebabni ram tano dikeni suatu harapan sai lebih betik; cara injuk reno ram dapok ngeredik Allah.

²⁰ Lagi muneh, sunyinni ano ditutuk jama sumpah jak Allah. Mak ngedok sumpah injuk seno waktu imam-imam sai bareh udi diangkat.

²¹ Kidang Isa diangkat jadi imam pakai sumpah, waktu Allah cawa jama Ia, "Tuhan radu besumpah, rik Ia mak haga ngerubah pendirian-Ni, 'Nikudo imam selama-lamani.'"

²² Jama inji juga Isa jadi jaminan untuk suatu perjanjian sai lebih betik.

²³ Wat lagi sai hal: imam-imam sai bareh udi wat lamon, mani tian masing-masing mati sehingga mak dapok nerusko jabatanni.

²⁴ Kidang Isa hurik selama-lamani, jadi jabatan-Ni sebagai imam mak malih jama jelma bareh.

²⁵ Ulihni seno untuk selama-lamani Isa dapok nyelamatko jelma-jelma sai ratong jama Allah liwat Ia, mani Ia hurik selama-lamani untuk ngajuko permohonan jama Allah bagi jelma-jelma udi.

²⁶ Jadi, Isa udido Imam Agung sai ram perluko. Ia suci; jama Ia mak didapok kesalahan atau dusa api pun. Ia dipisahko jak ulun-ulun bedusa, rik dicakakko sampai mik rang sai lebih langgar jak sunyin langit.

²⁷ Ia mak injuk imam-imam agung sai bareh, sai unggal rani harus mempersembahko kurban mani dusa-dusani tenggalan tumbai, ampai mani dusa-dusa umat. Isa mempersembahko kurban angkah sekali gaoh untuk selama-lamani, waktu Ia mempersembahko diri-Ni tenggalan sebagai kurban.

²⁸ Hukum agama Yahudi ngangkat jelma sai mak sempurna jadi imam agung. Kidang kak raduni jak hukum udi, Allah nyani janji jama sumpah bahwa Ia ngangkat sebagai Imam Agung, Anak sai radu dijadiko Penyelamat sai sempurna untuk selama-lamani.

Ibrani

Video Ibrani 7

Ikuti Kami:

KONTAK | PARTISIPASI | DONASI