Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iman nike dasar lẽman selapuq hal saq ite harepang dait bukti lẽman selapuq hal saq ndẽq ite serioq.

² Sẽngaq siq iman, dengan-dengan lẽq jaman laẽq tedemenang siq Allah.

³ Lantaran iman ite ngerti, bahwe alam semeste sampun tecipteang siq Manik Allah, sehingge napi saq ite serioq sampun telaksane lẽman napi saq ndẽq bau ite serioq.

⁴ Lantaran iman Habil sampun ngaturang tipaq Allah kurban saq solahan lẽman kurban saq teaturang siq Kain. Lantaran imanne nike, Habil teterimaq siq Allah jari dengan saq kenaq, sẽngaq nyate bahwe Allah nerimaq persembahanne. Habil sampun ninggal, laguq lantaran imanne nike, ie masih ngeraos.

⁵ Lantaran iman Henok kerangkatan, adẽq ie ndẽq ngalamin ninggal, dait ie ndẽq tedait, sẽngaq Allah sampun ngangkat ie. Sẽngaq sendẽqman ie kerangkatan, ie mauq kesaksian, bahwe ie nyenengang Allah.

⁶ Laguq lamun ndẽq bedowẽ iman ndẽqne mungkin dengan bau nyenengang Allah. Sẽngaq dengan saq parek tipaq Allah harus percaye bahwe Allah araq, dait bahwe Allah ngicanin upaq tipaq dengan saq pacu-pacu boyaq Ie.

⁷ Lantaran iman, make Nuh -- siq petunjuk lẽman Allah mengenai sopoq hal saq ndẽqman penggitan -- siq taat nyiepang kapal jari nyelametang keluargene; dait lantaran imanne nike dunie tehukum dait ie tetentuang jari nerimaq kebenaran, sesuai kance imanne.

⁸ Lantaran iman Ibrahim taat, sewaktu ie temanikang jari berangkat ojok negeri saq gen ie terimaq jari dowẽne, terus ie berangkat timaq ie ndẽq nenaoq taoq saq ie laiq.

⁹ Lantaran iman ie ndot jari dengan pendateng lẽq tanaq saq tejanjiqang siq Allah tipaq ie. Ibrahim ndot lẽq derike lẽq dalem kẽmah kance Ishak dait Yakub, saq milu jari ahli waris lẽq janji saq pade.

¹⁰ Sẽngaq Ibrahim kenyeke ngantos kote saq terencaneang dait tepiaq siq Allah kadu dasar saq kuat.

¹¹ Lantaran iman Ibrahim dait Sarah mauq kekuatan jari mauq keturunan, timaq ie pade sampun lingsir gati, sẽngaq ie pade nganggep Allah, saq ngicanin janji nike setie.

¹² Timaq lẽq waktu nike Ibrahim sampun lingsir gati jari bedowẽ bije, laguq ie mauq keturunan luwẽq gati, jangke ndẽqne bau terẽkẽng, maraq luwẽqne bintang lẽq langit dait gerẽs lẽq sedin segare.

¹³ Dalem iman, dengan-dengan nike selapuq sampun ninggal ndẽqne mauq napi saq tejanjiqang, laguq cume serioq dait nyambut ie lẽman jaoq. Ie pade ngakuq bahwe ie pade dengan-dengan pendateng dait musapir lẽq gumi niki.

¹⁴ Sẽngaq dengan-dengan saq bebase maraq nike setetune nyatayang bahwe ie pade kenyeke boyaq negerine mẽsaq.

¹⁵ Ndẽqne negeri saq sampun ie pade bilin nike saq ie pade pikirang. Sẽngaq lamun maraq nike, make ie pade bedowẽ luwẽq kesempatan jari tulak ojok negeri nike.

¹⁶ Laguq nyatene, ie pade angenang sopoq negeri saq solahan, nike negeri saq lẽq sorge. Keranaq nike Allah nẽnten ilaq lamun ie pade nyebut Ie jari Allah ie pade, sẽngaq Allah sampun nyedieang ie pade sopoq kote.

¹⁷ Lantaran iman make Ibrahim, sewaktu ie tecobe, ngaturang Ishak. Ie, saq sampun nerimaq janji nike, rẽde ngaturang bijene saq nunggal.

¹⁸ Timaq tipaq ie sampun tesampẽang: "Keturunan asalne lẽman Ishak nike saq gen tesebut keturunande."

¹⁹ Ibrahim yakin bahwe Allah sanggup ngidupang malik Ishak lẽman ninggal -- jari, bau teparan, Ibrahim sampun nerimaq malik Ishak lẽman ninggal.

²⁰ Lantaran iman make Ishak, sewaktu gen ninggal, ngicanin berkah tipaq Yakub dait Esau jari hal-hal saq gen dateng.

²¹ Lantaran iman, make sendẽqman Yakub ninggal, ie ngicanin berkahne tipaq bije-bije Yusup, sambil beselanggah lẽq otak tunjangne dait nyembah Allah.

²² Lantaran iman, make Yusup sewaktu gen ninggal bebadaq mengenai dengan-dengan Israel sugul lẽman Mesir, dait bepesen adẽq tolang-tolangne tejauq ẽndah.

²³ Lantaran iman make Musa, sesampun ie tebijeang, teseboq sengonẽq telu bulan siq dengan toaqne, sẽngaq ie pade serioq, bahwe kanak nike solah ruene dait ie pade ndẽq takut lẽq prẽntah raje.

²⁴ Lantaran iman make Musa, sesampun dẽwase, ndẽqne mẽlẽ tesebut bije lẽman putri Piraun.

²⁵ Ie senengan menderite bareng kance dengan-dengan saq tehususang bagi Allah, ketimbang sementare waktu ngeraseang kesenengan lẽman idup saq bedose.

²⁶ Ie nganggep penghinean sẽngaq Almasih nike belẽqan lẽman selapuq kesugihan Mesir, sẽngaq Musa harepang upaq lẽq jelo saq gen dateng.

²⁷ Lantaran iman make Musa sampun bilin Mesir dait ndẽqne beridap takut lẽq murke raje. Ie ngelanjutang tujuanne maraq ie sampun serioq napi saq ndẽq penggitan nike.

²⁸ Lantaran iman make ie ngaraqang Paskah dait ketisang daraq lẽq lawang balẽ dengan Israel adẽq Malaẽkat Maut ndaq nyematẽq bije-bije ie pade saq sengake.

²⁹ Lantaran iman make ie pade sampun mbelat Segare Bẽaq, maraqne ie pade lampaq lẽq atas tanaq saq gero, laguq dengan-dengan Mesir tegulung siq aiq segare nike, sewaktu ie pade ẽndah cobaq mbelat segare nike.

³⁰ Lantaran iman make tembok-tembok Yeriko ruk, sesampun kote nike tekiterin pituq jelo ngonẽqne.

³¹ Lantaran iman, make Rahab, dengan nine pelacur nike, ndẽqne milu binase bareng-bareng kance dengan-dengan durhake, sẽngaq ie sampun nerimaq secare solah mate-mate Israel.

³² Dait napi malik saq harus tiang sebut? Sẽngaq tiang gen kekurangan waktu, lamun tiang gen nyeriteang mengenai Gideon, Barak, Simson, Yepta, Daud, Samuel dait nabi-nabi,

³³ saq lantaran iman sampun naklukang kerajaan-kerajaan, ngamalang kebenaran, mauq napi saq tejanjiqang, nungkem biwih singe-singe,

³⁴ pedaqang api saq ngelaur, selamet lẽman gacukan klẽwang. Ie pade lemah, laguq jari kuat; ie pade perkase dalem peperangan sehingge ngalahang pasukan-pasukan bangse lain.

³⁵ Araq dengan-dengan nine saq nerimaq malik dengan-denganne saq sampun ninggal, lantaran teidupang. Laguq araq ẽndah saq tesiksaq dait ndẽqne mẽlẽ nerimaq pembẽbasan, lantaran mẽlẽ teidupang malik jari sopoq kehidupan saq solahan.

³⁶ Araq saq teoloq-oloq, tepecut, tetaliq kadu rantẽ dait saq tetamaqang ojok dalem bui.

³⁷ Ie pade tepelẽwas siq batu jangke ninggal, araq saq tepeleng kadu gergaji, dait saq tematẽq kadu klẽwang. Ie pade ngambar kadu kelambi saq tepiaq lẽman lẽndong dombe atao lẽndong bẽmbẽq; ie pade miskin, teaniaye dait tesiksaq.

³⁸ Dunie niki ndẽqne taoq saq pantes umaq ie pade, ie pade ngambar lẽq padang gurun dait lẽq bukit-bukit, dait ndot lẽq dalem goe-goe dait lẽq dalem loang-loang tanaq.

³⁹ Berembẽ belẽqne kemenangan saq temauq siq selapuq dengan nike lantaran iman ie pade! Laguq ie pade ndẽq nerimaq napi saq tejanjiqang siq Allah,

⁴⁰ sẽngaq Allah bedowẽ rencane saq solahan lẽq ite. Rencane-Ne nike bahwe cume bareng kance ite, ie pade gen jari sempurne.

Ibrani

Video Ibrani 11

Ikuti Kami:

KONTAK | PARTISIPASI | DONASI