Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Famati andrõ eluahania no fa'aro dõdõ sindruhundruhu ba ngawalõ nidõnadõna; ba fa'afaduhu dõdõ ba ngawalõ zi lõ oroma.
2 Bõrõ wamati, wa niha ba ginõtõ fõna I'omasi'õ Lowalangi.
3 Bõrõ wamati, aboto ba dõdõda wa õlia andre ni'a'asogõ daroma li Lowalangi; tobali, hadia ia zoroma, tumbu moroi ba zi lõ oroma.
4 Bõrõ wamati, wa ibe'e zumange Habeli khõ Lowalangi, sumange sabõlõ sõkhi moroi ba zumange nibe'e Ga'ino. Bõrõ wamatinia andrõ ba Itema Lowalangi Habeli si mane niha si sõkhi; bõrõ da'õ wa Itema zumangenia andrõ Lowalangi. No mate Habeli, ba bõrõ ba wamatinia andrõ wa fahuhuo ia nasa irugi iada'e.
5 Bõrõ wamati, wa lõ mate Henokhi, no tefazaw̃a ba te'ohe khõ Lowalangi. Samõsa lõ gõi si tola mamalukhaisi ya'ia, bõrõ me no Ifazaw̃a ia Lowalangi. Bakha ba Mbuku Ni'amoni'õ no tesura wa fatua lõ mufazaw̃a Henokhi, no somasi dõdõ Lowalangi ia.
6 Ba na lõ famati, samõsa lõ gõi si tola mangomusoi'õ tõdõ Lowalangi. Me niha si mõi khõ Lowalangi lõ tola lõ faduhu dõdõnia wa so Lowalangi, ba wa Lowalangi zanulõni ba niha sangalui Ya'ia.
7 Bõrõ wamati, wa itema Noakhi wamangelama nibe'e Lowalangi khõnia sanandrõsa ba ngawalõ zalua aefa da'õ, si lõ nasa oroma khõnia. Ba bõrõ da'õ gõi i'o'õ Li Lowalangi Noakhi irege ifazõkhi sambua nowo, ba wangorifi ya'ia ba si sambua omo ya'ira, oroma da'õ ba gafuriata. Lualuania ya'ia wa nihuku gulidanõ andre, ba Noakhi samõsa Iforoma'õ Lowalangi hulõ si mane niha si sõkhi bõrõ wamatinia.
8 Bõrõ wamati, wa i'o'õ li Lowalangi Aberahamo me luo Ikaoni ia Lowalangi wanaw̃a tanõ nifabu'u Lowalangi khõnia. Awena mofanõ Gaberahamo ba zi lõ aboto ba dõdõnia heza isaw̃a.
9 Bõrõ wamati khõ Lowalangi, torõi Gaberahamo hulõ niha si fatewu ba danõ nifabu'u Lowalangi khõnia andrõ. Ba torõi Gaberahamo ba da'õ bakha ba nose'osenia. Si manõ gõi Giza'aki ba Yakobo si no manema amabu'ula li andrõ soroi Lowalangi.
10 Bõrõ me idõnadõna Aberahamo mbanua si no ifakhoi ba I'otomosi Lowalangi faoma danedane saro.
11 Bõrõ wamati, wa tola lasõndra nga'õtõ ira Aberahamo ba Sara, hew̃a'ae no numalõ wa'atua Gaberahamo, ba Sara samõsa lõ mo'ono. Ba aro dõdõ Gaberahamo wa Ifatõrõ'õ Lowalangi zi no Ifabu'u li.
12 Hew̃a'ae Aberahamo ba ginõtõ da'õ no si mane niha si lõ hadõi tanõmõ niha sa'ae, ba moroi khõnia samõsa sa'atõ no tumbu nga'õtõ sato si tebai mu'erai wa'oya -- hulõ si mane fa'oya ndrõfi ba dalumbanua ba ene ba mbewe nasi.
13 Fefu niha da'õ lõ si tebulõ wamati irugi wa'amate. Ba lõ nasa nitemara zi no Ifabu'u li Lowalangi. Ha la'ila manõ ia moroi ba zarõu faoma tõdõ sanõtõna. Ba zi manõ da'õ no la'oroma'õ ba gulidanõ wa ya'ira ha niha si fatewu ba sikoli ba gulidanõ andre.
14 Niha sanguma'õ si manõ ba la'oroma'õ wa ya'ira sangalungalui banua si tobali tanõ okhõtara dania.
15 Ba tenga sa'ae banua si no larõi andrõ ni'angeragõra. Bõrõ na si manõ, no oya ginõtõ khõra wangawuli ba mbanua andrõ.
16 Ba soromania, no humulu sibai dõdõra ba mbanua sabõlõ sõkhi, ya'ia mbanua si so ba zorugo. Da'õ mbõrõ wa lõ aila Lowalangi na latõtõi Ia Lowalangira, bõrõ me no Ihõnagõ Lowalangi sambua mbanua khõra.
17 Bõrõ wamati gõi, wa ibe'e Giza'aki Aberahamo, ono andrõ khõnia tobali sumange Lowalangi me Itandraigõ ia. No khõ Gaberahamo Ibe'e wawu'usa li-Nia Lowalangi, ba aoha gõlõ Gaberahamo wame'e ononia si ha sambua andrõ.
18 No Iw̃a'õ Lowalangi khõ Gaberahamo, "Moroi khõ Giza'aki andre õsõndra dania nga'õtõ si no Ufabu'u li khõu."
19 Bõrõ iw̃a'õ tõdõnia Aberahamo, wa Lowalangi tola I'orifi mangawuli Giza'aki moroi ba wa'amate -- tobali, tola tamane, no itema Aberahamo mangawuli Giza'aki moroi ba wa'amate.
20 Bõrõ wamati, wa ifabu'u Iza'aki howuhowu khõ ndra Yakobo ba Ezau ba ginõtõ si so fõna.
21 Bõrõ wamati, wa fatua lõ mate Yakobo -- fao wa itendro'õ ia ba mbõrõ zi'onia ba mangalulu khõ Lowalangi -- ifahowu'õ nono Yosefo.
22 Bõrõ wamati wa Yosefo -- me arakhagõ irõi gulidanõ -- ifahuhuosi zanandrõsa ba wangeheta niha Gizera'eli moroi ba Miserai. Awena i'oroi'õ Yosefo goroisania, hadia zi lõ tola lõ lafalua ba dõlania.
23 Bõrõ wamati, wa labini'õ Moze ira satuania tõlu waw̃a wa'ara me no aefa tumbu Moze. Me la'ila wa ya'ia samõsa iraono si sõkhi, ba lõ ata'u ira wolaw̃a fareta razo.
24 Bõrõ wamati, wa Moze me no ebua ia, lõ omasi latõtõi khõnia ono nono alawe razo Miserai.
25 Abõlõ omasi ia itaõgõ wamakao awõ mbanua Lowalangi andrõ moroi na i'omusoi'õ dõdõnia, fa'ohahau dõdõ ba horõ, si lõ arara.
26 Iw̃a'õ tõdõnia Moze wa no abõlõ ebua mbõli wanaõgõ fango'aya bõrõ Razo Sangorifi si no amabu'ula li Lowalangi andrõ, moroi ba wanõndra fefu harato danõ Miserai; bõrõ me nidõnadõna Moze ya'ia mbõli gõlõnia ba luo safuria.
27 Bõrõ wamati, wa irõi Moze danõ Miserai awõ wa lõ i'ata'ufi razo si no mofõnu sibai. Lõ awuwu Moze wanaw̃a saw̃atõ, hulõ na no i'ila Lowalangi si lõ oroma andrõ.
28 Bõrõ wamati, wa i'a'asogõ Moze Wasa andrõ ba ibe'e wareta, wa niha Gizera'eli lõ tola lõ latefe'õ ndro ba mbawa ndruhõ nomora, ena'õ Mala'ika wa'amate andrõ bõi ibunu ndraono sia'a khõra.
29 Bõrõ wamati wa niha Gizera'eli tola la'õtõ Nasi Soyo, hulõ zofanõ ba danõ sabe'e ira, ba niha Miserai sa ba itõlõ ira asi andrõ, me latandraigõ wangõtõ gõi.
30 Bõrõ wamati, me no aefa lafasui niha Gizera'eli gõli kara Yerikho fitu ngaluo wa'ara, ba adudu gõli kara andrõ.
31 Bõrõ wamati gõi, wa Rakhaba, ira alawe sohorõhorõ andrõ, lõ fao tebunu awõ niha solaw̃a Lowalangi; bõrõ me itema'õ si fao fa'asõkhi li zamauze niha Gizera'eli.
32 Tola lõ manõ mo'aetufa fahuhuo ndra'o, tobali ambõ ginõtõ khõgu. Bõrõ lõ nasa nitõtõigu Gideono, Baraki, Simesono, Yefita, Dawido, Samueli, awõ ndra sama'ele'õ andrõ.
33 Bõrõ wamati, wa no la'alani gamatõrõw̃a andrõ. Me ya'ira lafalua hadia zindruhu, irege latema hadia zi no Ifabu'u Lowalangi. No laduhõ mbawa zingo.
34 No labunu wa'abõlõ galitõ. No aefa ira moroi ba mbawa wõda. Si lõ abõlõ ira, ba tobali abõlõ; ma na'i itugu abõlõ ira bakha ba wasuwõta irege la'alani zaradadu soi bõ'õ.
35 Bõrõ wamati, wa ira alawe lasõndra mangawuli niha khõra si no mate. So gõi zanehegõ ya'ia nifakao irugi mate, ba sanimba fangefa, bõrõ me omasi ni'orifi mangawuli ba wanema fa'auri sabõlõ sõkhi.
36 So ni'o'aya'aya, nifakao, nibõbõ faoma rate ba labe'e bakha ba gurunga.
37 Latebu kara ira irugi mate, so nitaba faoma garagazi, ba nibunu faoma bawa wõda. Latõrõi danõ ba ha uli mbiribiri ba uli nambi nukhara; numana ira, nifakao ba nibe'e ba wa'afõkhõ ira.
38 Ulidanõ andre tenga sa'ae naha si sõkhi khõra. Latõrõi danõ si mate ba ba hilihili misa, awõ wa torõi ira bakha ba dõgi gara ba ba dõgi danõ.
39 Ba ha wa'ebua wemõna nikhamõ ndra niha da'õ fefu bõrõ wamatira. Ba hew̃a'ae si manõ lõ nitemara hadia ia zi no Ifabu'u Lowalangi,
40 bõrõ me so nikhoi dõdõ Lowalangi sabõlõ sõkhi khõda. Nikhoi dõdõ-Nia andrõ ya'ia wa ha na fao ita, tobali mo'ahonoa ira.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA