Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ane kita nomparasaya, batuana nisanitamo anu nisarumakata mpuu-mpuu rakavata. Nau dopa nikitata, nariamo katantuna riara ntaita anu haitu mpuu-mpuu majadi.

² Lako ri pomparasaya ntona nggaulu, ira nipodamba nu Alatala.

³ Lako ri pomparasayata, nisanita dunia nipajadi nu Alatala ante TesaNa. Jadi, anu nikita nipajadi lako ri anu ledo nikita.

⁴ Lako ri pomparasaya i Habel, pesomba nikenina ka Alatala nabelopa pade pesomba nikeni ntuakana i Kain. Lako ri pomparasayana haitu, i Habel nitarima nu Alatala mpo tona nanoa apa nalantomo pesombana nipodamba nu Alatala. Bo nau namatemo ia, da nariapa tesana bo jonjo pomparasayana.

⁵ Lako ri pomparasaya i Henokh, ia ledo namate tapi nioretaka nu Alatala lako ri dunia hitu. Ia nielo-elo tapi ledo ria nikava ntona sabana ia niore nu Alatala lako ri dunia hitu. Naria tesa ri Buku Gasa nompakalanto dopame i Henokh niore, katuvuna nipodamba nu Alatala.

⁶ Ledo ria saitoa namala rapodamba nu Alatala ane ledo ria pomparasayana. Apa isema-sema madota metupu nte Alatala, kana raparasayana naria Alatala. Bo kana raparasayana muni Alatala mombadekei belo ka tona nangelo Ia ante rara mpuu-mpuu.

⁷ Lako ri pomparasaya i Nuh, ia natundu nte Alatala. Alatala nompopaisani ka i Nuh maria uve oge ngena mompakagero dunia. Jadi, nau dopa nikitana kajadia haitu, i Nuh nangoseaka parenta nu Alatala bo nipoviana kapala mbaso ala ira sambanua masalama. Lako ri pomparasayana haitu, pura-pura manusia ntanina ri dunia nireke nu Alatala masipato rahuku sabana ira ledo nomparasaya. Tapi i Nuh nireke nu Alatala nanoa sabana pomparasayana.

⁸ Lako ri pomparasaya i Abraham, nioseakana parenta nu Alatala. Alatala nompokio ia bo nituduNa hau ri ngata nakavao. Alatala nojanji ngata haitu majadi bagia i Abraham. Jadi, nau dopa nisanina ri umba ngata rakalauna haitu, nipalaikanamo ngatana mboto nangoseaka parenta nu Alatala.

⁹ Lako ri pomparasayana, ia nonturo mpo topesovo ri ngata nijanji nu Alatala ka ia. Hamai ia da nonturo ri tenda, bo ivesia muni i Ishak bo i Yakub, mulina. Alatala nojanji ngata haitu majadi bagiara, nasimbayu mpo nijanjiNa ka Abraham.

¹⁰ I Abraham nosabara nonturo ri tenda mpo topesovo sabana ia da nantongoraka ponturo ri ngata anu maria sampe ri kasae-saena, ngata niponia bo nibangu nu Alatala.

¹¹ Lako ri pomparasaya i Abraham bo i Sara, ira nanggava kuasa nomuli, naupa i Abraham natuamo bo i Sara nagampa. Haitu najadi sabana nisani i Abraham Alatala namala raparasaya mompakadupa pojanjiNa.

¹² Tempo haitu karo i Abraham domo nompakule momuli sabana ia natua ntotomo. Tapi naupa ivesia, nadea mulina, ledo rapakuleta mobila kadeana. Kadeana nasimbayu mpo kadea nu betue ri langi bo bone ri talinti.

¹³ Ira pura-pura pangane batena nomparasaya sampe namate, nau ledo nitarimara mboto anu nijanji nu Alatala. Namala raulita nikitara nggavao kadupana. Nisanira kadupana da masaepa, tapi naupa ivesia nadamba rarara bo ledo nonggai rarara nantongoraka kadupa nu pojanji nu Alatala. Niulira dunia hitu ledo ponturora nakana, ira aga topesovo bo topanjayo ri dunia hitu.

¹⁴ Tona notesa ivesia nompakalanto ira da nangelo ponturo majadi bagiara mboto.

¹⁵ Ledo ngata nipalaisira bara ipia nipolentorara. Apa ane rapana ngata haitu nipolentorara, nariamo loga ka ira manjili ri ngatara haitu.

¹⁶ Tapi ira nalentoraka ngata anu nabelopa, haitumo ngata ri suruga. Jadi Alatala ledo naeya mataNa ane Ia niuli Tupura apa naria mami ngata nipakasadiaNa ka ira.

¹⁷ Lako ri pomparasaya i Abraham, ia nasadia nombadekei anana i Ishak majadi pesomba ka Alatala tempo pomparasayana niuji nu Alatala. Bara ipia Alatala nojanji ka i Abraham ivei: "Lako ri Ishakmo iko manggava muli nijanjiKu ka iko." Tapi naupa ivesia, i Abraham nasadia mombasambale i Ishak, anana saito-itona, majadi pesomba ka Alatala.

¹⁸ (11:17)

¹⁹ Nipekirina Alatala nompakule mompakatuvu mpanjili tomate. Jadi namala rauli i Abraham nantarima anana mpanjili lako ri kamatena.

²⁰ Lako ri pomparasaya i Ishak, niperapina Alatala mombadekei belo ka anana i Yakub bo i Esau, haitumo niperapina belo rakavara ri tempo makava.

²¹ Bo lako ri pomparasaya i Yakub, tempo damo kamatena, niperapina Alatala mombadekei belo ka ana-ana i Yusuf. Bo ia netidanda ri tokona bo nombasomba Alatala.

²² Lako ri pomparasaya i Yusuf, tempo damo kamatena, ia nanguli Alatala manggeni *toIsrael mesuvu lako ri tana Mesir bara maipia. Bo nitevaina anu rapoviara ka karobatana tempo ira malai lako ri Mesir.

²³ Lako ri pomparasaya ntina tuama i Musa, tempo i Musa nipoanaka, nitabuniakara talu-mbula kasaena sabana nikitara ia ngana nagaya. Nau Magau Mesir nomparenta pura-pura ngana langgai ntoIsrael kana rapatesi, ledo naeka ira nangeva parenta nu magau.

²⁴ Lako ri pomparasaya i Musa, tempo ia nambasomo, ia ledo nadota rauli tupu nu Magau Mesir.

²⁵ Nipokononapa mombarasai kasusa bo kapari mosanggani-nggani ante todea nu Alatala pade mombarasai kasana aga sampalai lako ri katuvu nadosa.

²⁶ Niparasayana Magau Topepakasalama anu nijanji nu Alatala makava bara maipia. Nipekirina nabelopa ia rasalai sabana pomparasayana pade manggava pura-pura kakalumana ri Mesir. Nipekirina ivesia sabana ia bate-batena nanjarumaka belo radekei nu Alatala ka ia bara maipia.

²⁷ Lako ri pomparasaya i Musa, nipalaisina tana Mesir. Ia ledo naeka ka Magau Mesir nau narau mpuu rara Magau. I Musa batena naroo rarana, apa eva nikitana Alatala anu ledo nikita.

²⁸ Lako ri pomparasayana, nituduna toIsrael movia ada Paskah. Niparentana ira mombadika raa ri vambara ala *malaeka anu nanggeni kamatea ledo mompatesi *ana lumbuara mosanggani-nggani ante ana lumbua ntoMesir.

²⁹ Lako ri pomparasaya ntoIsrael, ira nombavote Tasi Lei nasimbayu mpo nolipa ri tana bai. Tapi tempo toMesir nompasimbuku mevote mombaraga toIsrael, ira aga nalodo rantasi.

³⁰ Lako ri pomparasaya ntoIsrael, nilintikura ngata Yerikho pitu-eo kasaena sampe nadungga tembo ngata haitu.

³¹ Bo lako ri pomparasaya i Rahab, mombine bajinga, nitarimana nabelo mata-mata ntoIsrael riara banuana. Jadi ia ledo nipatesi nosinggani-nggani ante toYerikho anu ledo natundu nte Alatala,

³² Sampesuvu-sampesuvuku, da nadeapa jonjo ntanina mamala kutesa, tapi ledo nagana tempoku mantesa pakalanto hanupa pomparasaya i Gideon, i Barak, i Simson, i Yefta, i Daud, i Samuel bo *nabi-nabi ntanina.

³³ Lako ri pomparasayara, sanu ira nombadagi magau-magau. Nipoviara dota nu Alatala jadi nitarimara anu nijanji nu Alatala ka ira. Sanu ira nombaramu nganga nu *singa.

³⁴ Sanu ira nompepaya apu narega mpuu, bo nadea ngganimo ira nikabasaka lako ri tona nasadia mombatimbe ira. Tempo ira nalente, nipakaroso mpanjili. Ira najadi naroso riara posieva sampe nipakulera nombadagi tantara-tantara ntosangatana.

³⁵ Lako ri pomparasayara, mombine-mombine nanggita mpanjili tona-tonara anu nipakatuvu mpanjili lako ri kamatena. Tapi naria muni tona ntanina nompalamba karora nipandasa sampe namate sabana pomparasayara. Ira ledo nadota rakabasaka lako ri kasusa haitu apa ira madota rapakatuvu mpanjili bo manggava katuvua nabelopa.

³⁶ Naria muni tona nipongei-ngeika bo nicambu pakandasa, bo naria tona nibalanggu bo nisuaraka riara ntarunggu.

³⁷ Naria muni tona nirempe vatu sampe namate bo naria tona nigaragaji pakapudu, bo naria tona nipatesi ante guma. Ira nolinja-linja nangelo katuvua, bo pakeara aga kulimba nu bimba bo tovau. Ira mpuu-mpuu napepa, ira nipakasusa bo nipandasa.

³⁸ Ira nolipa-lipa ri karava bai bo ri buluna. Ira aga nonturo ri beka-beka ntana bo ri bolo-bolo vatu. Haitu pura-pura najadi nte ira sabana pomparasayara. Kakanana, dunia nadaa hitu ledo masipato raponturora!

³⁹ Ira pura-pura nipodamba nu Alatala sabana pomparasayara. Nau ivesia, dopa nitarimara pura-pura anu nijanji nu Alatala,

⁴⁰ sabana naria nia nabelopa nipakasadia nu Alatala ka kita pura-pura. PatujuNa ala ira mompopea sampe kita pura-pura mosanggani-nggani rapajadi magasa bo ledo makura nuapa-nuapa.

Ibrani

Video Ibrani 11

Ikuti Kami:

KONTAK | PARTISIPASI | DONASI