Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mopirisaya na'a mangalenya, totok moyakin kon onu inta iharap makow naton, mangalenya oyuíon kotantuaían kon soaáḷ mita inta diaí inontong.
2 Lantaran oyuíon im pirisaya, daí intau mita tungkuḷ intua kinosanang ing gina i Allah.
3 Lantaranbií oyuíon im pirisaya, daí kinota'auandon naton kon dunia na'a pinomiabií i Allah takin singog-Nya. Daí onu inta ko'ontongan naton tua, pinomiabií i inta diaí ko'ontongan tua.
4 Lantaran oyuíon im pirisaya, daí ki Habel noposumbah ko'i Allah ing kurban inta mopia-pia nongkon onu inta pinosumbah i Kain. Lantaran doman pirisayanya tatua, ki Habel sinarima i Allah saḷaku intau inta mopia, bo tua in nonyatadon kon sosumbahnya in sinarima i Allah. Bo lantaran pirisayanya, daí sia nosingogpabií umpakahbií minatoidon.
5 Lantaran oyuíon im pirisaya, daí ki Henok biningkat pinobayak ko'i Allah simbaí diaí matoi in sia. Diaíbií tobatuímai noko'ulií ko'inia sim biningkatdon i Allah in sia. Kom Buk Mosuci pinais nana'a, "Ko wakutu ing ki Henok diaípa sinintak, kobobiagnya mokosanang kong gina i Allah.
6 Aka diaí im pirisaya, daí diaíbií in tobatuímai intau mota'au moposanang kong gina i Allah. Sing ki ine im mamangoi ko'i Allah mustibií mopirisaya kong ki Allah tua in oyuíonbií. Bo intau inta totu-totu'u motayak ko'i-Nia ogoian-Nyabií in onu inta sinayaknya tatua."
7 Lantaran mopirisaya, daí pinogumanandon i Allah ing ki Nuh kon soaáḷ mita inta mobalií kon singgai mo'iduduimai, inta diaíbií ko'ontongannya. Ki Nuh nopirisaya ko'i Allah, daí inindongogannya onu inta pinoguman i Allah ko'inia. Pinomianya ing kapaḷ inta kon singgai no'iduduimai nobogoi ing kasaḷamatan ko'inia bo koluarganya. Dunia na'a i hukum i Allah, ta'e lantaran ki Nuh nopirisaya, daí pinonyatadon i Allah kon intaubií mopia in sia.
8 Lantaran mopirisaya, daí ki Abraham dinumudui ko'i Allah wakutu inoinií i Allah bo pinotabaí minayak im butaí inta pinodandi i Allah ogoi ko'inia. Ki Abraham minayakbií doman umpakahbií diaí kinota'auannya mongo kon onda im bayaían.
9 Takin pirisayanya tatua, sia nogutun saḷaku intau mokokiaíngoi kom butaí inta pinodandi i Allah ko'inia tua. Ki Abraham nomia kong kemah bo nogutun kon tua. Natua doman ki Ishak bo ki Yakub inta notarima doman kon dandi natua nongkon i Allah.
10 Ki Abraham mogoḷat makow kong kotaí inta ironcana i Allah posindogon kom pondasi inta moroton.
11 Lantaran mopirisaya, daí ki Abraham noko'ulií kong katurunan nongkon i Sara umpakah nogoguyangdon in sia bo bantoí doman ing ki Sara ki buḷoinya. Ki Abraham noyakinbií kon totu'uonbií i Allah in dandi-Nya tatua.
12 Umpakah wakutu intua ki Abraham naídon onda bo intau minatoi in awaknya, ta'e nobayongpabií doman in turunannya, diaíbií ko'iapan ing kobayongea sin naídon tundi kon ḷangit bo bungaion kom bingkií im pintad kobayongea.
13 Bayongan intau tatua umuran nopirisaya uma'ai minatoi. Mosia diaíbií notarima kon onu inta pinodandi i Allah, ta'e tongaí noko'ontong bo notamad nongkon noyayuk. Aid monia tua noponyata kom mosia tua in tongaíbií intau mokokiaíngoi inta tongaí doman no'iandupmai kon dunia na'a.
14 Mosia inta nosingog natua nopo'ontongdon kinosilang kom mosia tua yogot motayak kom butaí inta mobaliídon kapunya'an monia tontanií.
15 De'emanbií butaí inta ain sinaḷa'an in umuran raion monia. Sin aka tua in umuran raion monia, daí nobayong bidon ing kasampatan monia nobui kom butaí tatua.
16 Ta'e nonyata magií inta kinotanoban monia tua in tobatuíbií butaí inta totok mopia, tuata im butaí inta kon soroga. Manangka intua diaíbií mo'oyak ing ki Allah tangoion ki Allah monia, sim pinosadia'an bidon i Allah im mosia kon tobatuí kotaí.
17 Lantaran doman mopirisaya, daí ki Abraham nobaranibií in noposumbah ko'i Ishak saḷaku kurban ko'i Allah wakutu inuji i Allah in sia. Ki Abrahambií tua im pinobogoian i Allah kon dandi-Nya, ta'e norelabií in sia noposarahkan ko'i adiínya inta tongaí totobatuí tua.
18 Umpakah nana'a ing guman i Allah ko'i Abraham: "Ki Ishakbií na'a inta mobogoi ing katurunan inta pinodandi-Ku ko'inimu."
19 Ki Abraham in noyakinbií totok kom mokosanggupbií ing ki Allah momiag ko'i Ishak nongkon kinopatoiannya tua, daí mota'aubií tangoion kong ki Abraham notarimadon bui ko'i Ishak nongkon kino'patoiannya.
20 Lantaran oyuíon doman im pirisaya, daí ki Ishak nopodandi doman im barakat mita ko'i Yakub bo ko'i Esau kon soaáḷ kobiagan monia kon singgai mo'iduduimai.
21 Lantaran oyuíon impirisaya, daí wakutu ing ki Yakub diaípa minatoi, binarakatannya ing ki adií mita i Yusup. Kinumadai in sia kon tungkudnya bo nosumbah ko'i Allah.
22 Lantaran oyuíon im pirisaya, daí naonda ing ki Yusup motoyongdon matoi, sia nongonguman kon naonda ing koḷoḷuai intau Israel nongkon Mesir. Sia munadon nongoyow, kon tuḷannya mita diaan aka ḷumuaidon nongkon butaí im Mesir tatua.
23 Lantaran mopirisaya doman, daí gunyanga i Musa nobuni ko'inia toḷu nobuḷan ko'onggotea naonda in no'ilahirdon ing ki Musa. Inontong monia kom moḷunat totok in adií tatua, daí diaíbií no'ondok im mosia noḷawang kom parentah i raja.
24 Lantaran mopirisaya, daí ki Musa naonda in noḷantudon doiíbií tangoion ki adií i putri raja Mesir.
25 Sia mo'ibo-ibogbií mobiag moyoyiga moyotakin in umat mita i Allah, doiíbií in sia nobiag nosanang tongaí umuran kinawasa'an in dosa.
26 Irai Musa kon diaíbií nongonu in singkuleon sim mopirisaya ko'i raja mopoposaḷamat inta pinodandi i Allah daripada moko'ulií kom bayongan kapunya'an kom butaí im Mesir. Sin iharap makow i Musa tua ing kapunya'anbií kon singgai mo'iduduimai.
27 Lantaran mopirisaya doman, daí ki Musa nonaḷaímaidon kom Mesir, diaíbií ondoknya kon toruí i raja. Sia umuran nogaḷow kon tujuannya naonda bo inontongnyadon ing ki Allah inta diaí ko'ontongan tua.
28 Lantaran nopirisaya, daí ki Musa nomia doman kom Paskah bo nokipisik doman in duguí kon ḷolingkop mita im baḷoi intau Israel simbaí diaí limodon im malaekat maut ing ki adií mita monia guya-guyang.
29 Lantaran nopirisaya, daí intau mita Israel nokoḷoḷan kon dagat Teberau, naonda bo minaya-mayak kon tudu im butaí no'ingkag im mosia, ta'e intau mita im Mesir nongoḷomot kon dagat tatua naonda in nonungkuḷ mosia iḷumoḷan.
30 Lantaran nopirisaya, daí norumbunbií doman i intau Israel in dinding Yerikho wakutu in ilibu monia pitu nosinggai.
31 Lantaran oyuíon im pirisaya, daí ki Rahab bobay inta monakaḷ tua diaíbií kinolimodan noyotakin intau mita inta noḷawang ko'i Allah; lantaran nopia totok im pinototomunya kon totabaí mita in intau Israel.
32 Ule, nobayongpabií doman im mota'auku o'umanon, ta'e diaídon i wakutuku mongonguman kon soaáḷ tai Gideon, ki Barak', ki Simson, ki Yepta, ki Daud, ki Samuel bo nabi mita.
33 Lantaran mosia mopirisaya, daí sinaḷowdon monia ing karaja'an mita ibanea. Inaidan monia onu inta totu'u, tuamai no'ulií monia onu inta pinodandi i Allah. Bibig mita in singa pinomponan monia,
34 tuḷu inta noborambang nopiong monia, bo mosia diaí kinotakuḷan. Mosia nolemeí ta'e nobalií noropot, mosia noḷoḷakidon kom pinoparangan sahingga in sinaḷow monia in tontara mita im bangusa ibanea.
35 Lantaran oyuíon im pirisaya monia, daí bobay mita noyodungkuḷ bui in intau mita monia inta aim minatoi, sim mosia biniagdon bui. Oyuíon doman inta norelabií in iroriga nodapot minatoi, bo doiíbií pobebason lantaran mo'ibog bui biagon bo moko'ulií kong kobiagan inta lebe mopira.
36 Oyuíon in irupa-rupamai sinambok, sinogot in rante bo pinobonu kom ponjara.
37 Mosia inandur im batu nodapot im minatoi, oyuíon doman ing ginaragaji, bo oyuíon doman irataí im pitow. Maya-mayak makow mosia mogiḷambu-ḷambung in ḷambung inta nongkon kulit in domba andeka kulit im bembeí; mosia nobiag nobogaí, pinogutuí bo iroriga mangoi.
38 Dunia na'a de'emanbií tampat mopia ko'i monia. Mosia maya-mayak makow kom padang gurun bo kom buḷu-buḷudanea bo mogutun kom bonu ing goa mita kom bubuí mita im butaí.
39 Moḷoben totok ing ka'untungan no'ulií in intau mita tatua lantaran pirisaya monia! Ta'e diaíbií im mosia notarima kon onu inta pinodandi i Allah,
40 sin oyuíonbií in roncana i Allah ko'i naton inta mopia-piabií totok nongkon tua. Na'a in roncana-Nya tua, tongaíbií moyotakin naton, mosia im mobalií mosompurna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA