Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Bahen ma tarompit in hu pamanganmu! Ai adong do songon manuk-manuk sipanoroh i babou ni rumah ni Jahowa; ai iosei sidea do padan-Ku, anjaha ilaosi titah-Ku.
2 Dilo-dilo sidea hu Bangku, ʻHam Naibatangku, hanami halak Israel, itanda hanami do Ham!ʼ
3 Itulak Israel do na madear, halani ai pardakdakon ni munsuh do sidea.
4 Ipabangkit sidea do raja, tapi seng marhitei Ahu. Iangkat kopala-kopala, tapi seng ibagas botoh-Ku. Humbani pirak pakon omas ni sidea ipauli do gana-gana bahen hamagouan ni sidea sandiri.
5 Sogam do uhur-Hu bani anak ni lombumu, ale Samaria. Gara do ringis-Ku dompak sidea. Piga dokah nari nani, ase pitah sidea i Israel?
6 Tukang omas do mambahen anak ni lombu ai, sedo Naibata ai. Tongon, anak ni lombu ni Samaria ai, maningon ropukon do ai.
7 Logou do itidahkon sidea, jadi habahaba ma sabionni. Gandum na i juma seng marbuyur, seng dong dapot topung hunjai. Anggo mambere gogoh ai, halak na legan do mamangani ai.
8 Hona bondut do Israel, domma songon hudon na so marguna sidea bani bangsa-bangsa.
9 Ai laho do sidea hu Assur, sasadasi songon halode liar, igaji-gaji do na mangkaholongisi.
10 Age pe iboli hasoman sariah i tongah-tongah ni bangsa-bangsa, podas ma erapon-Ku sidea. Maronti ma sidea lobei pabangkit raja ampa kopala-kopala.
11 Tongon ipabuei Efraim do anjapanjap bani, gabe mambahen mardousai ai bani sidea.
12 Marlaksa-laksa pe titah-Ku Husuratkon bani, ihira sidea do ai songon podah na ganjil.
13 Marosuh do sidea manggalang; igalangkon sidea do gulei, anjaha ipangan do ai, tapi seng marosuh Jahowa mangidah ai. Idingat do sonari hajahaton ni sidea, anjaha ibalaskon do dousa ni sidea; sai mulak do sidea hu Masir.
14 Lupa do Israel bani na manompasi, anjaha ipauli do panumbahan-panumbahan; ipabuei Juda huta na pinatoguh, tapi tongoson-Ku do apuy bani huta-hutani, jadi bois ma panganonni benteng-bentengni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA