Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Pamonye tandha babaja! Moso nyerrang Tang nagara akantha mano’ ellang nyaop mangsana! Tang ommat ta’ neptebbi Tang parjanjiyan bi’ aba’na, sarta ta’ atoro’ ka sabarang se eajarragi Sengko’.
2 Maske reng-oreng jareya nyebbut Sengko’ Allahna, sarta ngoca’ ja’ aba’na jareya Tang ommat se kennal ka Sengko’,
3 tape ta’ endha’ narema pa-apa se becce’. Daddi reng-oreng jareya bakal eserserra so-mosona.
4 Tang ommat mele rato ta’ kalaban atanya ka Sengko’; ngangkat pamimpin ta’ kalaban amopakat bi’ Sengko’; ngala’ emmas ban salakana, pas ekagabay arcana brahala se andaddiyagi ancorra aba’na dibi’.
5 Sengko’ baji’ ka sape emmas se esemba pandhudhu’ kottha Samaria rowa. Sengko’ ce’ peggella ka reng-oreng jareya. Sampe’ bila reng-oreng jareya se manajjisa aba’na kalaban nyemba brahala jareya?
6 Sape emmas se esemba e Samaria jareya gabayanna pandhi Isra’il! Jareya banne Allah, kodu epaancor!
7 Tang ommat nabur angen, daddi bakal molonga kaleng busbus! Teggalla gandumma ta’ koneng, daddi ta’ bisa ngasellagi teppong se daddiya kakanna. Tape mon teggal jareya sampe’ koneng keya, gandumma bakal epatadha’a bi’ sa-bangsa laen.
8 Isra’il akantha polo’ se bella, la tadha’ gunana, daddi bangsa se biyasa akantha bangsa laenna.
9 Isra’il akantha hemar se cengkal, noro’ sakarebba dibi’; menta bantowan ka Asyur ban melle parsobadan ban sa-bangsa laen.
10 Maske bariya bangsa jareya bi’ Sengko’ epakompola ban eokoma. Sakejja’ aggi’ reng-oreng jareya bakal ngadhudhuwa kasake’an, mon la etendhes bi’ rato Asyur.
11 Sajan bannya’ mezba se epaddek oreng Isra’il kaangguy malebbar dusa, sajan bannya’ keya kennengnganna reng-oreng jareya agabay dusa!
12 Sengko’ noles pangajaran ce’ bannya’na kaangguy reng-oreng jareya, tape kabbi padha nolak polana eanggep pangajaran jareya tadha’ parlona ka aba’na.
13 Reng-oreng jareya dujan ngeba kurban ka Sengko’, ban ngakan dagingnga kurban jareya, tape Sengko’ PANGERAN, ta’ senneng ka ban-kurban jareya. Sateya Sengko’ ngenga’ana sa-dusana reng-oreng jareya ban ngokoma reng-oreng jareya polana sa-dusana jareya; bi’ Sengko’ reng-oreng jareya epabaliya ka Messer pole!
14 Oreng Isra’il maddek ton-karaton, tape loppa ka Panceptana. Oreng Yehuda mabannya’ tha-kotthana se abinteng, tape Sengko’ matorona apoy epangobbara ton-karaton ban tha-kotthana epasampe’a tadha’ karena."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA