Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo marsahap Efraim, mabiar do halak, timbul do ia i Israel; tapi halani mardousa ia marhitei Baal, gabe matei ma ia.
2 Sonari pe, sai inunut sidea do mardousa, ipauli sidea do bani sidea gana-gana tinuang humbani pirak ni sidea, tubuh-tubuh ni uhur ni sidea, jadi-jadian ni tukang do ganupan ai. Nini sidea pasal ai, ʻManggalang ma hujai! Anak ni lombu do isummah jolma.ʼ
3 Halani ai gabe songon hombun sogod-sogod ma sidea, atap songon namur na podas habang; tongon, songon lamlam na hinabangkon ni logou humbani pardogeian, atap songon timus na luar humbani jandela.
4 Ahu do Jahowa Naibatamu hun tanoh Masir nari; seng dong Naibata sobali Ahu itanda ho, anjaha sobali Ahu seng dong Sipaluah.
5 Ahu do na mananda ho i halimisan, bani tanoh na horah-horah;
6 Dob dapotan panggagatan sidea Hubahen, jadi bosur ma sidea; dob bosur sidea, gijang ma uhurni, gabe lupa ma sidea Bangku.
7 Halani ai, songon singa ma Ahu dompak sidea, songon begu na manggompangi i dalan.
8 Songon gipul na magouan anak do Ahu manoroh bani sidea, parribakon-Ku do tonton ni sidea; anjaha songon singa boru-boru do Ahu mamondut sidea ijai, binatang panoroh na i talun do mamparsilbak sidea.
9 Anggo Ahu sipangagou bam, ale Israel, ise ma na boi paluahkon ho?
10 Ija do nuan rajamu, na boi mangurupi ho? Ija do nuan kopala-kopalamu na mamintori ho? Hubani sidea do ihatahon ho, ʻBere bangku raja pakon kopala-kopala!ʼ
11 Hubere do bam sada raja ibagas ringis-Ku, anjaha Hubuat use ibagas gilang-Ku.
12 Domma hona lak hajahaton ni Efraim, domma hona simpan dousani.
13 Pangarouon ni na sihol tubuhan anak do na roh hu bani, tapi anak na so maruhur do ia, age pe roh panorangni seng ra luar ia hun partapaan.
14 Tapi paluahon-Ku do sidea humbani kuasa ni nagori toruh, anjaha tobuson-Ku do sidea humbani hamatean. Ale hamatean, ija do sorodmu? Ale nagori toruh, ija do pangarsik-arsikonmu? Pambalason ponop do humbani matang-Ku.
15 Age marbuahi Efraim i tongah-tongah ni saninani, roh ma logou hapoltakan, ai ma logou humbani Jahowa, naik hun halimisan; gabe horah ma parigini anjaha marsik bah tubuhni; rampason ni ai ma arta-artani, sagala ugas-ugasni na maharga.
16 Maningon manaron do Samaria halani salahni, ai manlawan do ia dompak Naibata. Rasei do sidea bahenon ni podang, hona ropukan na etek-etek ni sidea, anjaha ibolahi boltok ni na boratan rumah.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA