Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Riolo nipakalompoi suku Efraim sa’genna punna nia’ parenta battu ri anjo sukua, malla’ ngasengi suku-suku maraenga ri Israel. Mingka dorakami suku Efraim lanri anynyombana ri Rewata Baal, lanri kammana anjo lalanynyaki.
2 Sa’genna ri kamma-kammaya anne anjo tu Efraim tulusu’ a’gau’ dosana ija; appareki ke’nanga patung-patung pera’ untu’ nasomba — iamintu patung nirancanakanga ri akkala’ rupataua siagang nipareka ri limanna rupataua. Nakana ke’nanga, "Assareko koro’bang mae ri anne patung-patunga!" Appakalannasa’na, rupataua ambaui patunna ana’ sapia!
3 Lanri kammana anjo lalanynya’ kabusuki anjo taua rapang allung yareka saliuka ri wattu bari’basa’na alloa. Lasanrapangi ke’nanga limbu’bu’ niri’bakang ri anging ri panggilingang gandunga, siagang sanrapang umbu assuluka battu ri rateanna pattunuanga.
4 Nakana Batara, "INakke Karaeng Allata’alanu, le’baka angngerangko assulu’ battu ri Mesir. Tena Allata’ala maraeng pantaranganna iNakke. INakkemi se’re-se’rea ampasalamakko.
5 Ri butta kalotoroka ri parang lompoa, iNakke anjagaiko.
6 Mingka ri nia’numo ri pa’rasangang bajika, siagang bassoro’ mako kammayatompa sukku’mi nusa’ring, a’jari tampo mako siagang takkaluppa mako mae ri Nakke.
7 Lanri kammana anjo laKubakkaiko rapang singa a’bakkaya. RapangA’ macang langngadangko ri aganga.
8 SanrapangA’ beruang tappelaka ana’na lambakkaiko. LaKukae-kaeko. RapangA’ singa lambakkaiko ri tampa’nu, siagang rapangA’ olo’-olo’ sekke’ laKukae-kaeko.
9 LaKuancuru’ kabusukko, he bansa Israel! Nampa inai kutadeng akkulle antulungko?
10 Appalakko karaeng siagang pamimping, mingka kemaemi ke’nanga kamma-kamma anne? Maka akkullei ke’nanga ampasalamaki ra’ya’nu?
11 LarroA’ naKusareko karaeng, nampa lanri sanna’ nassuKu naKupasinta’ ke’nanga ammotere’."
12 Nakana Batara, "Nicata’mi dosana siagang kasalanna Israel, nampa niboli’ catatanna.
13 Nia’ kasampatanna Israel untu’ attallasa’, mingka sanna’ dongo’na sa’genna tena napa’matu-matui anjo kasampatanga. Rapangi ana’ lolo lalang battang; tasalloami nalassu’ mingka takkulleai assulu’ battu ri pammanakkanna amma’na.
14 Anne bansaya tena nalaKupasalamaki battu ri linona tau matea. He kamateanga, pa’la’bammi racunnu! Gaukammi anjo jama-jamannu angngancuruka! Tenamo naKukamaseangi anne bansaya.
15 Manna pole coppong bansa Israel rapang ruku’ coppong, mingka lappabattuA’ anging bambang battu iraya ri parang lompoa. Anjo anginga lampakalotoroki sikontu timbuseng je’neka siagang bungunga, sa’genna lanynya’ kabusu’mo apa-apa niaka anggaranna.
16 (14-1) Samaria musti nihukkungi lanri angngewana ri Nakke. Lamatei ra’ya’na lalang pa’bundukanga; ana’-ana’ lolona lanilissaraki, siagang bai’-baine tiananga lanipuei battanna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA