Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas paksa si nggo lepas, adi ngerana kenca suku Eperaim, mbiar kerina suku-suku Israel si debanna. Kerina kalak pehagaken Eperaim. Tapi erdosa ia erkiteken nembah man Baal, emaka arus mate ia.
2 Tetap denga ia erbahan dosa alu mahan gana-gana pirak jadi sembah-sembahenna, si ibahan rikutken perukuren manusia, janah si erbahanca pe tan manusia. Janah kenca bage nina, "Persembahkenlah persembahen man bana!" Kuga banci manusia ngema gana-gana e, gana-gana si tempasna bagi lembu?
3 Erkiteken si e masap me bangsa enda desken remang erpagi-pagi, bagi namur si nggo kerah erpagi-pagi. Bali kap ia ras nggala si iembusken angin i bas ingan pengeriken, bagi cimber i bas dapur nari.
4 Nina TUHAN, "Aku kap TUHANDibatandu, si mabai kam ndarat i Mesir nari. La lit Dibatandu si deban seakatan Aku. Aku ngenca si ngkelini kam.
5 Kupekena-kena kam i bas gurun pasir, taneh si kerah e.
6 Tapi kenca kam seh i bas taneh si mehuli e, nggo kam besur dingen puas, janah kenca bage meganjang ukurndu dingen ilupakenndu Aku.
7 Emaka Kujerngem me kam desken singa. Desken arimo, Kugempangi kam i bas dalanndu.
8 Desken beruang kebenen anak, Kurigep me kam, jenari Kucaing-caing tentenndu seh talang. Desken sada singa, Kutelen me kam i je; desken rubia-rubia si merawa Kucaing-caing kam seh melumat.
9 Kukernepken me kam, o Israel! Ise nari ngasup nampati kam?
10 Ipindondu raja ras peminpin-peminpin, tapi kuga banci ia nampati bangsa e?
11 Perban rawangKu nggo Kubereken bana raja-raja, janah perban gara ateKu nggo ka ia Kubuat.
12 Dosa ras kesalahen Israel nggo isuratken, janah suratna e nggo sikap kal ibuniken.
13 Situhuna lit nge kesempaten man bana lako nggeluh, tapi si e la ibuatna perban motuna, bali ras sekalak anak si nandangi tubuh tapi la nggit luar i bas bertin nari.
14 La Aku nggit engkelini bangsa enda i bas doni kematen nari, la Aku nggit mulahisa i bas kuasa kematen nari. O kematen, marilah baba penakit laya-laya; o doni kematen, marilah baba bisa kecedanndu! Lanai ateKu mekuah nandangi bangsa enda.
15 Aminna pe Israel mehuli perturahna bagi dukut-dukut, Kusuruh angin Timur si melas i gurun pasir nari, maka kerah ibahanna sumbul-sumbul ras sumurna. Ibuatna kerina si meherga.
16 Samaria arus iukum erkiteken ilawanna Aku. Pendudukna la banci la mate i bas perang; danak-danak idampesken ku taneh, diberu-diberu si mehuli kulana irikrak."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA