¹ Tahunna kim empat-blas enkam damank, dekam zebe Barnabas han Yerusalem san dep song ek. Titus Bak hen man ang gweka.
² Alap mo Enhona man asa gubluka, “Em Yerusalem san dep song gwen– zao de ere mo tawa tabinni insa Kristen zi mo nol-nolak kira gulzimdin hip.” Kristen zi nikon men zen eteipsik, zebe mae en hap zebe anakan srip gulsuzimk, “Ëe kire ol dawemkame Yahudi srem zini tawa tabirida gweꞌan.” Sap dekam ee mese anakan ngalap gweꞌak, “Kristen zi mo nol-nola bap zen anakan asa gublun, ‘Em in waba habe karekkam tawa tabirida gweꞌara.’”
³ Hwena zen hom kirekam asa nenblak. Hen Titus, zen sap Yunani wal, hwena dekam hom desa Yahudi mo epba ol san de ang gwen hap titi dak– to mipsa de blaonsublun hapye.
⁴ Zen mae hap dekam to mip blom tasibin nikon ekeisa-keisa gwe-gwek: Sap nonol Yesussu de taibliblan srem Yahudi zini, zen aningkim Kristen zini neban mae esiri gwek– dekam de neno mae mo lowe hensa hlaulzimdin hip. Kristus mes sap nesa hil ti sonebirki– Musa mo epba titi tabin ola kon. Hwena zini in mae hap ze esiri gwek: Dekam de anakan hlaulzimdin hip, “A kirekam mo Musa mo titi tabin ola insa nulmun gwenanye.” Zen sap man edwam gwek– dekam de etan titi tabin ola insa nebe mae hap nihin dohon-hon makan wei yul sonezimdin hip.
⁵ Hwena ee Kristen zi mo nol-nola ban engka en mae home zeno mae mo dwam gwibin sin ang tak. Sap ee ama anakan edwam gwek, “Yesus hup de ol dawem naban Yahudi mo epba titi tabin ola ban, bap zen siri nen. Dikire ol dawemna in Yahudi srem zini ebe mae hap lalak enkam lwa gwizimk.”
⁶ Hendep men zen Yerusalemk de eKristen gwen zi mo nwenak ewet so kinik, Yakobus, Petrus, hen Yohanis, zen hom asa nenblak– dekam de ano tawa tabinni insa wet gulsun hupye. Zen man ki sap zi mo nwenak emam-mam gwek. Hwena ee home zini nwekam goleake gwenan, “Zen mamna,” ahaksa, “Zen betekna.” Sap Alap hom zisi nwekam anakan goleake gwenda, “Zen mes jematnak mam gweka,” ahaksa, “Zen hom mam gweꞌara.”
⁷ Hwena zini in dekam anakan asa tame dak, “Eiwa, Alap mes ki Paulussu dam tasiki– zen de Yahudi srem zisi engaya gwen hap de ol dawemkam tawa tabin hipye, men kirekam hen Petrussu dam tasikike, Yahudi zisi de tawa tabin hip.”
⁸ Sap dekam man anakan dam gwesik: Petrussu men kirekam hen Alap dam tasikike, zen de Yahudi zisi beyakam halen ora san golewet so gwe-gwen hap, Zen hen kirekam asa dam tasiki– ee de hen Yahudi srem zisi beyakam halen ora san golewet so gwe-gwen hapye.
⁹ Men zen dekam Kristen zinik enol gwek, zen dekam zep anakan asa dam nososuk, “Eiwa, Alap mes Kristus mo kwasang-kwasang nakon Paulus ne Barnabas nikip syala wei yul sonezimki.” Zen dekam zep tahana asa nitowank– dekam de anakan asa ziaha-en gun hup, “Ëe asa Yahudi zisi syal eibir. Em Yahudi srem zisi syal eibir.”
¹⁰ Mae en hap asa abe nosok: Tahalha zisi de eititi eibirida gwen srem hap– men desa aena hen hohle gwibiꞌikke.
¹¹ Hwena Petrus kim Antiokiak hata zaka, ee ama damnak dei yul gubluk, sap zen man karek gweka.
¹² Zen aha zi de yaing gwezan sremnak, dekam man Yahudi srem zi niban apdekam goletembane ta gweꞌanka. Hwena Yakobus man Yahudi Kristen zisi Yerusalem kon lup gul soneka. Zen kim yaing gwezak, dekam hwena zen hom Yahudi srem zini etan golek de tabirki. Zen man anakan airika, “Ëye Yahudi srem Kristen zini an han Yahudi zini an mo nwenak goletembane taꞌak, zen sa hwena asa husus neblal.”
¹³ Hendep ahakore Yahudi zi ausu nakore Kristen zini hen Petrus mo kim egwek. Hendep aumwa hap, Barnabas Bak hen kirekam ang gweka. Zen kitak Yahudi srem zisi langa dasibik, hwena ek enkam nama anakan nenbirida gwek, “Em in ano Kristen bose wal.”
¹⁴ Hwena ee kime tame guk, “An hom Yesus hup de ol dawem naban dakastiꞌin– kirekam de esiri gwen sremkamye,” ee dekam zebe Petrussu damnak anakan dei yul gubluk, “Em sap Yahudi wal, hwena em kime ner hom Yahudi srem zi niban goletembane ta gweꞌanka, em ema Yahudi srem zi niban golesiri gwe-gweꞌanka. Angkam hwena ba habe Yahudi zi ensa ang gwibirida nasenꞌara? – men zen edwam gwe-gwenan, Yahudi mo epba titi tabin olsa de Yahudi srem Kristen zi hip wei yul sone gwizimdin hip.”
¹⁵ Aya-wal oso-wal, zini men zen Yahudi mo ausu nakon esaltik, an ki hen aena, ee home menkam Yahudi srem zi niban olesiri gwe-gwek. Sap emsa man Yahudi zini nenbirida gwenan, “Zen karek gulin hana gwen zi ausu.”
¹⁶ Hwena sap kirekam, ee Yahudi zini mese anakan dam ulsuk, “Zini toton bejen Musa mo titi tabin ola sul sonen– dekam de Alap mo nwenak edakastin hipye. Nen kitak ema ngip ul gwenan.” Diki angkam an kim Alap nebe mae hap ora esena zertreizimki, dekam zebe anakan tame uꞌin, “Diki Kristus Yesus ensa de taibliblankam esa Alap mo nwenak edakastil gwer– ba maesa de syal gwibin sremkam.” Ëe Yahudi zini menkam ama ekil gil gwek, “Are mae mo syal en nakon asa Alap mo nwenak edakastil gwer.” Hwena zini toton bejen titi tabin ol san de ang ta gwenkam Alap mo nwenak edakastin.
¹⁷ Hwena ee de Musa mo titi tabin ola insa Yesus ensa de blol gweblan hap hli yunkum, dekam Yahudi zini anakan sa asa nenblal, “Em in mese Yahudi srem zi hip jowera– karek gulin hana gwen zi.” Zep Yahudi Kristen gwen srem zini Yahudi Kristen zisi anakare hap husus neibirida gwenan, “Zen Kristussu de ang gweblankam karek gulin hana gwen zi hip kim ejowe gweꞌan.” Hwena kirekam boton!
¹⁸ Diki eiwa dena zen a kirekam mo: Nen bejen nen Musa mo titi tabin ol san de ang ta gwenkam Alap mo nwenak edakastin. Zen in zebe angkam Yesus ensa blol eblaꞌan– dekam de edakastin hip. Hwena nen de etan anakan egunkum, “Nen etan lwan dahan– Musa mo titi tabin ola insa de hen mas gun hup,” dekam mese ekarek gwenan. Sap dekam mese Yesussu hli lanan.
¹⁹ Aena hen kime Kristen gwe srem gweꞌak, dekam hen ama sap Musa mo titi tabin ol san de ang gwen hap alp gwe-gwek. Hwena dekam anakare habe enlalana dowe hana gwek, “Ëe an toton molye dekon en ngaya gwek.” In zebe angkam Yesus ensa anakan blol gweblaꞌan, “Zen de abe hap syal gwibir-blin sremkam, ee toton bejene ngaya gwen.” Angkam zebe hwena Alap mo dwam gwibin sin Yesus ensa anakan taibliblaꞌan, “Asa mes Deban te-lidak sonnak makan nosoink.
²⁰ Zep angkam ee e-en home gweꞌan. Hwena Kristus ano enhonak gwe gwenda. Ano okamanak de gwenna angkam, zen Alap mo Tane ensa de taibliblan en nakon lwaꞌan. Sap Zen asa kwasang gweblaka, zep hendep asa de ngaya tan hap Zenaka sosok taka.”
²¹ Zep ora esena insa Alap nebe mae hap de kwasang-kwasang hap kles tyasizimki, bap nen dekon etan Yahudi mo titi tabin sin dep lwan dahan. Hwena zi de anakan gunnu, “Ëe Musa mo titi tabin ol en san de ang gwe-gwenkam asa Alap mo nwenak dakastil,” zen hen ki man anakan de gun nuban nwe-mase gweꞌan, “Yesus Zen Zen ki tilki.”