Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Punna mannurukiko ri Karaeng Allata’alanu siagang tamamminrayai pa’mai’nu anggaukangi sikontu parenta kupassareanga mae ri kau anne alloa, laNapa’jariko Batara bansa masahoro’ ri anne linoa.
2 Mannurukiko mae ri Karaeng Allata’alanu, na Nasare ngasengko barakka’ kammaya anne:
3 Nibarakkaki kota-kotanu siagang koko-kokonnu.
4 Nibarakkakiko, sa’genna jai ana’nu, jai wassele’ kattoannu, siagang a’jari jai sapinu kammayatompa gimbala’nu.
5 Nibarakkaki kattoang gandunnu siagang sikamma kanre-kanreang nupareka battu ri gandung.
6 Nibarakkaki sikontu usahanu.
7 Punna nibundukiko, Batara lambetai musunnu. Bajiki batena angngatoroki pa’bakkana ke’nanga, mingka lari ke’nanga nipasimbung.
8 LaNabarakkaki Karaeng Allata’alanu usahanu siagang laNabonei sikamma pammolikannu siagang gandung. LaNabarakkakiko ri pa’rasangang Napassareanga mae ri kau.
9 Punna mannurukiko ri Batara Allata’alanu siagang nugaukang sikontu parentaNa, laNapa’jariko umma’ KalenNa, sangkamma le’baka Napa’janjiang.
10 Jari sikontu bansaya ri anne linoa lanaciniki angkanaya ikaumi bansa Napilea Batara, siagang langngali’mi ke’nanga mae ri kau.
11 Lanisareko ana’ majai. La’jari jai olo’-olo’ piaranu siagang lalla’bi-la’bi wassele’ kattoannu ri pa’rasangang Napa’janjianga Batara mae ri boe-boenu untu’ Napassareang mae ri kau.
12 Lappaturungi bosi Batara punna narapi’ wattunna battu ri pammolikang alla’biNa ri langika. LaNabarakkaki sikontu usahanu, sa’genna akkulleko assarei angnginrang jaia bansa, mingka tena nuparallu angnginrang manna pole battu ri nai.
13 LaNapa’jariko Karaeng Allata’alanu pamimping ri alla’na bansa-bansaya, siagang teaiko tau ammina’-minawang. Punna tamamminrayako mannuruki mae ri sikontu parentaNa Batara kupassareanga mae ri kau anne alloa, pila’ lasalewangangko siagang tena nule’ba’ lammono’boko.
14 Mingka tea sikaliko kaluppai anjo parenta-parentaya, manna pole antekamma. Tea tongko anynyombai siagang teako pare’ atai kalennu mae ri rewata-rewata maraenga."
15 "Mingka punna taerokako mannuruki ri Karaeng Allata’alanu, siagang tamajarrekai pa’mai’nu anggaukangi sikontu parentaNa siagang hukkunNa kupassareanga mae ri kau anne alloa, sikontu anne pattunra kammaya lanatujuko:
16 Nitunrai kota-kotanu siagang koko-kokonnu.
17 Nitunrai wassele’ kattoang gandunnu siagang kanre-kanreang nupareka battu ri gandung.
18 Nitunraiko, sa’genna a’jari sike’de’ji ana’nu, wassele’ kattoannu, sapinnu siagang gimbala’nu.
19 Nitunrai sikontu usahanu.
20 Punna a’gau’ ja’dalakko siagang nutollaki Batara, lappabattui bala, karicuang siagang kasukkarrang lalang sikontu apa nugaukanga, sa’genna lalang wattu sinampe’ duduji naniancuru’ taba sikaliko.
21 Sabattu-battuna garringa antujuko, sa’genna kala’busanna manna sitau battu ri kau tena lammantang tassesa ri anjo pa’rasangang nupammantangngia.
22 LaNahukkungko Batara siagang garring-garring a’lette’-letteka, garring akkambang-kambanga siagang rammusuka. Lappabattui timoro’ karring siagang anging appakamutunga sa’genna panra’ lamung-lamunnu. Anjo balaya tulusu’ lania’na battu antujuko sa’gennu panra’.
23 Talabattuai bosia, siagang la’jari terasaki buttanu sangkamma batu.
24 Talappaturungai bosi je’ne’ Batara, passangalinna bosi limbu’bu’ siagang kassi’ sa’gennu cappu’ nipanraki.
25 Punna tena numannuruki mae ri Karaeng Allata’alanu, laNalappassangko nibeta ri musu-musunnu. Lanuatoro’ bajiki batenu a’bundu’, mingka lalariko tassimbung-simbung. Sikontu bansa-bansaya lamalla’-malla’ ngasengi anciniki cilaka antujuako.
26 Punna mateko, maya’nu la’jari kanrenai jangang-janganga siagang olo’-olo’ sekkeka, siagang tena manna sitau ambongkai anjo olo’-oloka.
27 LaNahukkungko Batara siagang garring lattang, sangkamma le’baka Nagaukang mae ri tu Mesir. Larassi kalennu siagang puru lompo siagang puru katala’, nampa tena pa’ballena.
28 LaNapa’jari pongorokko Batara, siagang napa’jari buta kammayatompa a’lingu-lingu.
29 Angngosalakko sangkamma tau buta ri tangngallo sassa’na alloa, mingka tena nubuntuluki oloanga. Sikontu usahanu lasala ngasengi. Tuli lanijallakkangko siagang tuli niellakko, nampa tena manna sitau akkulle antulungko.
30 Punna tena numannuruki ri Karaeng Allata’alanu, anne kammaya lantujuko: La’bayuangko, mingka tau maraeng lambuntingi bayuannu. Lambangungko balla’, mingka tena nanupammantangngi. Lanulamungi koko anggoro’nu, mingka tanukanreai rapponna.
31 Lanisamballei sapinu ri dallekanna matannu, mingka tena nanukanrei dagenna. Laniembai a’lampa keledai-keledainu, nampa ammantang jako anciniki, siagang tena nalanipoterang. Lanipassareangi gimbala’-gimbala’nu mae ri musu-musunnu, nampa tena tau antulungko.
32 Lanipassareangi ri dallekanna matannu sikamma ana’nu salaku ata mae ri bansa maraenga. Allo-allona pacce matannu amboyai anjo ana’-ana’nu, mingka tena matu-matunna usahanu, nasaba’ tenamo nalammotere’ ke’nanga.
33 Lanaalle ngasengi bansa maraeng sikontu wassele’ nugappaya lanri anjama terasa’nu, nampa ikau tena apa-apa nugappa pantaranganna nijallakkanga situlusu’na siagang panggaukang nikapallakkia.
34 La’jari pongorokko lanri sikamma anjo apa nukasiaka.
35 LaNapirassi Batara anjo bangkennu siagang puru lompo siagang pa’risika, tenaya nakkulle ammolle; battu ri bangkennu sa’genna tompo’na ulunnu larassi siagang lattang.
36 Punna tena numannuruki ri Batara Allata’alanu, ikau siagang karaennu laNaerangko Batara mange ri pa’rasanganna bansa maraeng tenaya nanuassengi, siagang tena todong nanaassengi boe-boenu. Anjoreng lanupare’ atai kalennu mae ri rewata-rewata nipareka battu ri kayu siagang batu.
37 Ri pa’rasangang-pa’rasangang tampa’nu nipasisa’la’-sa’la’ ri Batara, lata’bangka ngasengi taua ancinikko; lanicau-cauko siagang lanikakkaliko ri ke’nanga.
38 Jai bine nupakioro’, mingka sike’de’ji wassele’ nugappa, lanri la’busuki lamung-lamunnu nikanre ri katimbang.
39 Lanulamungi siagang lanuparakai koko-koko anggoro’nu, mingka tena nanugappai rappo anggoro’na yareka je’ne’ anggoro’na, lanri anjo poko’-poko’ anggoroka la’busuki nakanre olo’.
40 Attimboi poko’ zaitunga ri sikontu pa’rasangannu, mingka lalelasaki runang sikamma rapponna, sa’genna tena nunggappa minynya’.
41 Langgappako ana’-ana’ bura’ne siagang baine, mingka niallei ke’nanga salaku tunitahang lalang ri bunduka, sa’genna tappela’mi ke’nanga battu ri kau.
42 Sikontu poko’-poko’nu siagang lamung-lamunnu lala’busuki nikanre ri olo’.
43 Bansa maraeng niaka ammantang ri pa’rasangannu lapila’ makoasai, nampa ikau pila’ lakurangi koasanu.
44 Nia’ doe’na ke’nanga untu’ nappinrangngang ri kau, mingka ikau tena apa-apannu akkulle nupappinrangngang mae ri ke’nanga. Kale’bakkanna nakoasai mako ke’nanga.
45 Sikontu anjo balaya lanatujuko siagang latuli nia’na battu anggangguko sa’gennu ancuru’, lanri tenana numannuruki mae ri Karaeng Allata’alanu siagang tena nugaukangi hukkung-hukkung Napassareanga mae ri kau.
46 Anjo sikamma balaya a’jari butti battu ri hukkunganNa Batara mae ri kau siagang jari-jarinu sa’genna satunggu-tungguna.
47 Le’ba’ mako nibarakkaki ri Karaeng Allata’alanu lalang ri sikontu passala’, mingka tena nuero’ ampa’jari atai kalennu mae ri Ia siagang ati matulusu’nu kammayatompa rannu nyawanu.
48 Lanri kammana minjo namusti nupare’ ata kalennu mae ri musu-musunnu Nakiringa Batara untu’ angngewako. Lanaalleko cipuru’, turere, siagang lassolarakko kammayatompa lakakurangangko lalang sikontu passala’. Lanikapallakkiko nijallakkang ri Batara sa’gennu ancuru’.
49 Nia’ se’reang bansa tenaya nuassengi bicaranna laNapabattu Batara battu ri cappa’na buttaya anne untu’ angngewako. Rapang jangang-jangang rajawali labattui antamberoko.
50 Sekkeki ke’nanga siagang manna inai talanakamaseangi, baji’ tau toa kammayatompa tau rungka.
51 Lanapaccappuki ke’nanga olo’-olo’ piaranu siagang kattoannu. Battu ri gandung, je’ne’ anggoro’, minynya’ zaitun, sapi, bembe, sa’genna gimbala’nu tena manna sike’de’ lanabolikangko, sa’gennu mate naalle cipuru’.
52 Lanabunduki ngasengi sikamma kota niaka ri pa’rasangang Napassareanga Karaeng Allata’alanu mae ri kau. Anjo tembo’-tembo’ kalli’ tinggia siagang nukanaya kassa’ siagang nupattoanga laruntung ngasengi.
53 Lalang nilipunna kota-kotanu ri musu-musunnu, latappu’ minasa mako lanri cipuru’nu, sa’genna nukanremo ana’ kalennu, iamintu ana’-ana’ Napassareanga Karaeng Allata’alanu mae ri kau.
54 Ba’lalo tubija karaeng kaminang bajika pa’mai’na latappu’ minasa tongi lalang nilipunna anjo kota-kotanu, sa’genna nakanremo siapa area ana’ kalenna lanri tenanamo maraeng lanakanre. Tena manna sike’de’ anjo kanrea napassareang mae ri sari’battanna yareka bainenna nangaia yareka ana’-ana’na attallasaka ija.
55 (28:54)
56 Ba’lalo manna baine bija karaenga siagang kaminang baji’ pa’maika kammayatompa sannaka kalumanynyanna sa’genna tale’bakai a’jappa bangkeng, lappanggaukang kamma todong. Ri wattunna nalipung musua kotaya, latappu’ minasami anjo bainea lanri cipuru’na, sa’genna nakanre cokko-cokkomo ana’na beru lassuka siagang campugina. Tena manna sike’de’ napassareang mae ri bura’nenna nangaia yareka mae ri ana’-ana’na.
57 (28:56)
58 Punna tena namajarre’ pa’mai’nu anturuki sikontu hukkunNa Karaeng Allata’alanu niaka tattulisi’ lalang ri anne kittaka, siagang tena nupakala’biriki Karaeng Allata’alanu mala’birika siagang mappakalannasaka,
59 lappabattui Batara mae ri kau siagang mae ri jari-jarinu sikamma garring tenaya nakkulle niballei kammayatompa garring-garring tenaya nakkulle nipamari.
60 Sikamma anjo garring appakamallaka nucini’ ri Mesir lanatujuko, nampa takkulleako ammolle.
61 Lappabattu tongi Batara sangka’ rupa garring tenaya nipaui lalang ri anne kittaka, kitta’ HukkunNa Batara. Nampa laniancuru’ mako.
62 Manna katambammo jainu sanrapang bintoenga ri langi’, mingka sike’de’ mami ri kau lammantang attallasa’, lanri tenana numannuruki mae ri Karaeng Allata’alanu.
63 Sangkamma sannanna nyawaNa Batara assareko kakalumanynyangngang siagang ampa’jari jai bilannu, lasannang tongi ampanrakiko siagang ampaccappukko. Lanialleko battu ri pa’rasangang tenayamo nasallo nanupammantangngi.
64 LaNapasisa’la’-sa’lakko Batara ri alla’na bansa-bansaya ri sikontu linoa. Anjoreng lanynyombako mae ri rewata-rewata nipareka battu ri batu siagang kayu, rewata-rewata tenaya nanuassengi siagang tenaya todong nanaassengi boe-boenu.
65 Manna kemaeko tena nulanggappa kasannangngang, tena tampa’ lakkulle nukana ikau pata; laNapa’jari lussa’ sikaliko Batara siagang laNapa’jari tappu’ minasako natena panrannuannu.
66 Latuli nireppesi ri bahaya katallassannu. Allo bangngiko lannekkere’ siagang malla’ mate.
67 Manna poro apa-apa mamo nucini’ a’dumba’-dumba’ji barambannu napakamma malla’. Punna bari’basaki nukellai sollanna linta’ bangngi, nampa punna bangngi nukellai sollanna linta’ bari’basa’.
68 LaNakiringko ammotere’ Batara mange ri Mesir siagang kappala’, manna pole nale’ba’mo angkana angkanaya tenamo nulammotere’ mange anjoreng. Anjoreng lanubalukangi kalennu a’jari ata mae ri musunnu, mingka manna sitau tania’ ero’ amballiko."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA