Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Adi sekalak dilaki ngempoi sekalak diberu, dungna isirangkenna atena, erkiteken ndeharana e ngelakoken lagu langkah si man kemelanken, isuratkenna surat mulih, iberekenna man ndeharana e, jenari isuruhna ia lawes.
2 Kenca kalak ndai sirang diberu si ndai sereh ka man dilaki si deban,
3 tapi dilaki si e ka pe isirangkenna ka atena ia, emaka ibahanna ka surat mulih, iberekenna man diberu e, emaka isuruhna ia lawes i bas rumahna nari. Ntah pe umpamaken dilakina si peduaken e mate.
4 I bas soal si dua enda, lanai banci iempoi dilakina si pemena ndai ka diberu e. Arus maka ianggapna diberu e nggo cemar. Adi iempoina denga ka diberu e, perbahanenna e nggo ncurnaken TUHAN. La banci ibanndu dosa si bage belinna i bas negeri si ibereken TUHAN Dibatandu man bandu."
5 "Sekalak si mbaru erjabu la banci ipaksa jadi tentera ntah ndahiken dahin guna jelma si nterem. Arus maka ia bebas sada tahun dekahna, gelah banci ia tading i rumah dingen mereken kemalemen ate man ndeharana.
6 Adi kai-kai gia ipinjamkenndu man kalak, ula buatndu kudinna jadi jaminen, sabap adi bage nggo ibuatndu kegeluhenna jadi jaminen.
7 Ise si nculik temanna sapih-sapih bangsa Israel, jenari ijadikenna budakna, ntah idayakenna jadi budak la banci la iukum mate. Alu bage ibersihkenndu me kejahaten si bagenda.
8 Adi kam kena penakit kulit si banci langket, arus maka payo-payo ilakokenndu kai si iperentahken imam-imam Lewi man bandu. Ikutken perentah-perentah si nggo kubereken man bana.
9 Inget kai si ibahan TUHAN Dibatandu man si Miriam sanga kam reh i Mesir nari.
10 Adi kai-kai gia ipinjamkenndu man kalak, ula kam bengket ku rumahna muat paken si iberekenna atena man bandu jadi jaminen;
11 timai i darat; pelepas maka ia jine merekenca man bandu.
12 Adi ia kalak musil ula sempat keberngin paken e i bas kam.
13 Ulihkenlah man bana tep-tep karaben maka banci ipakena medem. Emaka ngataken bujur ia man bandu, janah meriah ukur TUHAN Dibatandu ngenehen kam.
14 Ula tipundu kalak upahen si musil dingen mesera akapna, subuk ia sapih-sapih kam bangsa Israel, ntah pe bangsa si deban si tading i bas kutandu.
15 Galarilah upahna tep-tep wari ope matawari sundut. Perlu kal ia duit e janah nggo iarapkenna kal. Adi la igalarindu upahna e, erlebuh ia ngadu man Dibata kerna kam; janah kam erdosa kerna si e.
16 Orang tua la banci iukum mate erkiteken kejahaten anak-anakna, bage pe anak-anak la banci iukum mate erkiteken kejahaten orang tuana. Sekalak jelma banci iukum mate erdandanken si ibanna jine saja ngenca.
17 Ula rampas hak-hak kalak pertandang ras hak anak-anak melumang; bage pe ula buat uis diberu balu-balu jadi jaminen pinjamenna.
18 Inget maka budak kap kam nai i Mesir, janah TUHAN Dibatandu si mbebasken kam; eme sabapna maka kubereken man bandu perentah enda.
19 Adi kam rani, kenca bage adi tading bandu deba gandum si nggo isabindu, ula legindu mulihi si tading e; si e man kalak pertandang, anak melumang, ras diberu balu-balu, maka ipasu-pasu TUHAN Dibatandu kam i bas kerina pendahinndu.
20 Adi nggo iperanindu sekali buah saitunndu, ulanai legindu mulihi si tading e; si e man kalak pertandang, anak-anak melumang, ras man diberu balu-balu.
21 Adi nggo iperanindu sekali buah anggurndu, ulanai legi sekali nari, buah anggur si tading-tading e man kalak pertandang, anak-anak melumang, ras man diberu balu-balu.
22 Ula ndigan pe ilupakenndu maka nai kam jadi budak i Mesir. Eme sabapna maka kubereken man bandu perentah enda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA