Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba’ taowa ba’na bila embi’ gunong elahirragi korbina? Ba’ taowa ba’na ngabassagi manjangan alas se teppa’ rembi’a?
2 Ba’ taowa ba’na barampa abidda burun alas jareya se ngandhung, ban ngetong bila baktona se rembi’a?
3 Ba’ taowa ba’na bila korbina molae arendhu, pas rembi’ kalowar budhu’na?
4 Dhu’-budhu’na atamba raja ban kowat e ra-ara; pas nyengla ta’ abali pole ka korbina.
5 Sapa se ngocol mar-hemar e alas, se mokka’ talena, aberri’ kabebasan berka’ man-dha’emman?
6 Mar-hemar jareya bi’ Sengko’ eberri’ sagara beddhi menangka bengkona, ban gal-teggal buja menangka kennengnganna.
7 Keban jareya ajauwi tha-kottha se ramme, tadha’ oreng se bisa manotot otaba malalakon.
8 Lon-talon ban nong-gunong kennengnganna nyare pakan, bu-tombuwan se gi’ biru daddi kakanna.
9 Apa sape alas endha’ alako ka ba’na, endha’ tedhung e kandhang andhi’na ba’na?
10 Ba’ bisa’a ba’na nale’e sape jareya, epaksa nyalaga ban agarap tanana ba’na?
11 Ba’ bisa’a ba’na ngandellagi kakowadanna, massra’agi lakona ba’na se berra’ ka sape jareya?
12 Ba’ bisa’a ba’na parcaja passra ka sape jareya esoro makompol hasella gandumma, esoro ngeba ka kennengnganna pagebba’anna?
13 Ceppet onggu pakebba’na kalembangnga mano’ onta! Tape pangabberra ta’ nandhinge pangabberra dalko’.
14 Mano’ onta atellor e tana, saellana pas edina; daddi beddhi se manase tellor jareya.
15 Mano’ jareya loppa ja’ tellorra bisa edidda’ manossa otaba enyek-enyek burun alas.
16 Katonna budhu’na eanggep banne andhi’na, ta’ parduli ja’ ehteyarra tadha’ ollena.
17 Sengko’ se mabudhu mano’ jareya, ta’ eberri’i hekmat ban akkal.
18 Tape mon mano’ jareya la kare berka’, jaran ban oreng se nompa’ ta’ kera mennang.
19 He Ayyub, apa ba’na, ya, se aberri’ kakowadan ka jaran ban bulu se bagus se bay-kerbayan e le’er budhina?
20 Ba’na se mabisa jaran bisa alonca’ akantha balang, monyena adherreng nako’e manossa?
21 Kaperagen ngarkar cora ngangguy kokodda, ce’ samangadda sasat ngabber ka medan perrang.
22 Jaran jareya ta’ tao artena marenges otaba tako’, maske ngadhebbi konco’na peddhang ta’ kera nyorot.
23 Sanjata se epekol oreng se nompa’, saleng pakermang ban agalirap ekenneng sonarra are.
24 Samangadda rabbang, jaran jareya berka’; mon tarompet amonye, sokona ta’ bisa ambu.
25 Jaran jareya adherreng mon monyena tarompet ekaedhing e kopengnga, bauna perrang la ekaedhing dhari jauna; bariya keya sowarana para parwira, se ra’-era’an aberri’ parenta.
26 Apa ba’na se ngajari ngabber mano’ ellang, bila entar dha’ lao’, kalembangnga epamekkar?
27 Apa mano’ rajabali noro’ parentana ba’na, sabellunna agabay lebun e gunong se ce’ tenggina?
28 Lebunna ekagabay e co’-konco’na gunong bato, abinteng konco’na to-bato se tajem co’-nyoco’, daddi bengkona ta’ gampang emaso’e moso.
29 Dhari jadhiya matana ngabas ka man-dhimman, nyendhemme mangsa se ekakana.
30 Mon badha se mate, bi’ mano’ jareya esanderri, dharana eenom budhu’na ekambuli’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA