Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Itehndu katawari kambing kerangen nubisna? Nggo kin iperdiatekenndu belkih nubisken anakna?

² Itehndu kin dekahna ia ngkawali bana? Itehndu katawari paksana ia nubisken anakna?

³ Itehndu kin katawari ia ngerendukken nahena guna petubuhken anakna ku doni enda?

⁴ Reh gegehna anakna e i bas kerangen, jenari lawes ia, lanai mulihken.

⁵ Ise mulahisa kalde si meliar i kerangen? Ise ngosari tinalina maka banci ia rate-rate erdalan-dalan?

⁶ Kubereken gurun pasir man inganna, janah taneh masin jadi perjalangenna.

⁷ Kota-kota si meriah ndauh itadingkenna janah ise pe la ngasup pelemuksa ras nenggalakenca.

⁸ Deleng-deleng man ingan gagatenna, ingan bulung-bulung meratah si man panganenna.

⁹ Nggit kin banteng man si erdahinndu? Nggit kin ia erberngi i bas karang lembundu?

¹⁰ Ngasup kin kam namaken tinalina jenari nenggalakenca? Ngasup kin kam maksa ia ngerintak roka?

¹¹ Banci kin kam erpenalem man gegehna si mesangat, janah ngarapken ia ndahiken dahinndu si mberat?

¹² Banci kin iarapkenndu banteng si naruhi panganndu, tah pe pepulungsa ku pengerikenndu?

¹³ Seh kal pedasna perik unta ngkepekken kabengna! Tapi la lit perik unta si banci bagi ondan perkabangna.

¹⁴ Perik unta nadingken tinaruhna i babo taneh; emaka abu taneh me ngelaskenca seh naper.

¹⁵ La isadarina maka tinaruhna banci terdedeh, tah pe iperjak rubia-rubia si meliar seh perper.

¹⁶ La atena keleng tinaruhna, tempa-tempa la ia empuna, janah la iukurina amin sia-sia pe kelatihenna.

¹⁷ Maka bodoh pe ia, Aku nge erbahanca, perban la Kubereken kepentaren man bana.

¹⁸ Tapi adi kiam kenca ia, kuda ras si ngersaksa pe talu ibahanna.

¹⁹ O Jop, kam kin si mereken gegeh man kuda, janah namaken jambi-jambi si miap-iap i bas kudukna?

²⁰ Kam kin mahanca maka ia banci lompat bagi labang, janah gentar kalak megi sorana ngengkus si megang?

²¹ Ikaisina taneh i bas baluren, asa gegehna kiam ia ku pertempuren.

²² La itehna mbiar, la ia gentar, la lit pedang si banci mahanca ia mundur.

²³ Tagan anak panah, lembing ras tombak si ngersaksa, erdetar-detar ras erndilap i babona.

²⁴ Isangkilina taneh perban rawana, janah la terbanca kem, kenca sora terompet ibegina.

²⁵ Tiap kali terompet erkata, ngengkus ia, ndauh denga pe, bau pertempuren nggo teranggehsa, janah sora puanglima mereken perentah ibegina.

²⁶ Kam kin ngajarisa kuliki kabang, tupung ikirbangkenna kabengna kempak Selatan?

²⁷ Itimai rajawali kin lebe perentahndu, maka ibahanna asarna i bas deleng si meganjang?

²⁸ Ibahanna asarna i bas batu si meganjangna, janah ancuk-ancuk deleng jadi bentengna.

²⁹ I jenari ipernehenna pangan si man bunuhenna, ndauh denga pe nggo idahna.

³⁰ Kenca bage pulung ia ngkeleweti bangkena janah anak-anakna ngincep darehna.