Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mara pasabbar, edhingngagi sakejja’ aggi’, gi’ badha se ekoca’agiya sengko’ bit asmana Se Mahatenggi.

² (36:1)

³ Tang pangataowan lebar; bi’ sengko’ eangguya abukteyagi ja’ tang Pancepta reya adil.

⁴ Tang caca tadha’ se palsu; se badha e adha’na ba’na reya oreng se bicaksana onggu.

⁵ Allah reya ce’ kowadda, ta’ ya-nyeya oreng; tadha’ barang se ta’ epahame.

⁶ Oreng se dusa ta’ epaabit odhi’na, kaadilan eparengngagi ka oreng se nyangsara.

⁷ Oreng jujur ejaga ban epeyara, epakobasa akantha to-rato, ehormat oreng salanjangnga.

⁸ Tape mon oreng ekalenthong ban rantay besse, nanggung sangsara polana kasala’anna dibi’,

⁹ tanto dusa ban kasombonganna ebukka’ tor esengkap bi’ Allah.

¹⁰ Allah makon reng-oreng jareya ngedhingngagi parengeddanna, ban ambu dhari kajahadanna.

¹¹ Mon reng-oreng jareya atoro’ ban abakte ka Allah, tanto odhi’na taremtem ban ma’mor sampe’ matena.

¹² Tape mon ta’ ngedhingngagi dhabuna, reng-oreng jareya bakal mateya e dhalem kabudhuwanna.

¹³ Oreng se ta’ andhi’ Pangeran peggel ros-terrosan, maske eokom Pangeran ta’ endha’ menta bantowan.

¹⁴ Reng-oreng jareya mate kalessowen e bakto ngodhana, polana odhi’na se juba’ tengkana.

¹⁵ Allah ngajar manossa kalaban kasangsara’an, kasossa’an epadhateng sopaja manossa enga’a.

¹⁶ Dhari kamalaradan ba’na epabebas bi’ Allah, sampe’ ba’na arassa’agi kobassana kataremtemman, meja makanna possa’ ban kakanan.

¹⁷ Tape sateya ba’na narema okomanna Allah, satembang ban kajahadanna.

¹⁸ Te-ngate, ja’ sampe’ tagiyur polana pesse go’-sogo’; ja’ sampe’ sala jalan polana dunnya.

¹⁹ Parcoma ba’na atharat menta bantowan, tadha’ gunana ngettokkagi kakowadanna.

²⁰ Ja’ rep-ngarep malem se petteng, sa’adda sa-bangsa elang mosna.

²¹ Senga’ te-ngate, ja’ sampe’ abiluk ka kajahadan; ba’na eparenge kasangsara’an sopaja ambuwa alako jahat.

²² Kaenga’e, Allah reya ce’ rajana kobasana; Allah reya guru raja se tadha’ bandhinganna.

²³ Sapa se bisa nantowagi jalanna otabana se bangal ngoca’ Salerana sala?

²⁴ Allah reya ealem polana se elampa’agi Salerana, bariya keya ba’na kodu amolja’agi Salerana keya.

²⁵ Oreng nangale kabbi ka se elampa’agi Salerana; tape tadha’ settonga se ngarteya.

²⁶ Ba’na ban sengko’ ta’ kera ngarte onggu parkara kamolja’anna, otabana ngetong saapa bannya’na taonna.

²⁷ Allah naja’ aeng dhari bume epadaddi ondhem e langnge’ pas eoba epadaddi aeng ojan se benneng.

²⁸ Aeng ojan epatoron dhari ondhem e tenggina, eserammagi ka ommat manossa.

²⁹ Tadha’ oreng se ngarteya gulina ondhem e tenggina, ban monyena galudhuk e langnge’ kalenggiyanna.

³⁰ Langnge’ sabalattrana etera’e ban dhap-keddhap, tape dhasarra tase’ paggun petteng calemodan.

³¹ Kantha jareya carana Allah apareng odhi’ ka sa-bangsa, ban apareng kakanan se ta’ sakera-kera.

³² Kelap epega’ ban astana, epakon nappor sasaranna.

³³ Monyena galudhuk nandha’agi kaleng busbus bakal dhatengnga, ebin tao keya angen barat la para’.