Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sabar kam lebe, dengkehken kentisik nari saja.

² (Ayb 36:1)

³ Pemetehku melala, janah kupake ateku lako encidahken maka bujur kap si Nepa aku.

⁴ Kai si kukataken bandu la lit la tuhu, janah tuhu-tuhu kal kalak pentar si tedis i lebe-lebendu.

⁵ Dibata mbelin tuhu-tuhu! Kerina IetehNa. Amin bage gia, la ise pe IakapNa la terpake.

⁶ Kalak jahat la IpelepasNa gedang umurna; nandangi kalak mesera, bujur PerbahanNa.

⁷ Kalak bujur IkawaliNa IbahanNa erkuasa desken raja-raja, janah IbereNa kalak bujur asa lalap ipehaga.

⁸ Tapi adi kalak teriket alu rante, ngenanami kiniseran erkiteken perbahanenna jine,

⁹ arah kiniseranna e icidahken Dibata dosa-dosa ras ganjang ukurna.

¹⁰ Ipedengkehken Dibata bana pertenget, gelah itadingkenna si jahat.

¹¹ Adi ikutken ras isembahna Dibata, emaka dame ras senang me geluhna.

¹² Tapi adi la iikutkenna Dibata, i bas kinimotun, mate me ia.

¹³ Kalak si la erdibata lalap merawa, janah aminna iukum Dibata pe ia, la ia erlebuh man BaNa.

¹⁴ Mate ia paksa nguda denga, kesahna peltep arah dalan si njuruken.

¹⁵ Si tuhuna, Dibata ngajarken manusia arah kiniseranna, janah ipake Dibata kesusahenna gelah medak matana.

¹⁶ Dibata mulahi kam bas kiniseran nari; IbereNa kam nggeluh alu senang; panganndu melala, kai pe la kurang.

¹⁷ Tapi sue ras kejahatenndu, IukumNa kam genduari.

¹⁸ Metengetlah maka ula kam tertipu erkiteken sogok, tah pe kebayaken mabai kam papak.

¹⁹ Banci kin kebayakenndu nampati kam? Kerina gegehndu pe la banci mulahi kam.

²⁰ Ula arapken kerehen berngi si gelap, i ja bangsa-bangsa kerina masap.

²¹ Metengetlah maka ula kam erkusur kempak kejahaten. Sabap kiniserandu ibereken gelah itadingkenndu kejahaten.

²² Ingetlah uga belinna kuasa Dibata; i ja kin lit guru bagi Ia beluhna?

²³ Ise ngasup ngajarken Ia? Ise pang nalahken perbahanen Dibata?

²⁴ Ia tetap ipuji erkiteken PerbahanenNa; dage, kam pe pujilah Ia.

²⁵ Kerina kalak nggo ngidah kai si IlakokenNa, tapi la ise pe ngangkasa kerinana.

²⁶ Labo tersipati kita uga belinna kemulian Dibata, janah tahun-TahunNa pe la terkira kita.

²⁷ Dibata kap si pepulung lau i doni nari ku das embun, jenari IsalihkenNa jadi taktak udan.

²⁸ IbereNa udan naktak i bas embun nari, IsiramkenNa ku manusia i doni.

²⁹ La ise pe metehsa uga perkimbangna embun, dingen persora lenggur i langit i ja Dibata ringan.

³⁰ IkilapkenNa kilap si terang arah langit i das, tapi tetap gelap i bas kelbung lawit si mbages.

³¹ Bage me bangsa-bangsa IbereNa nakan, janah IsikapkenNa simpar pangan.

³² ItangkapNa perkas salu TanNa, jenari IperentahkenNa ndumpang si man dumpangenna.

³³ Sora lenggur meritaken kerehen Dibata, si merangi kerina kejahaten manusia.