Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Inai tulusu’ tappilangngeria nipakainga’, lapanraki ri se’reang wattu, na takkullea nipakabaji’ poleang.
2 Punna tau adele’ ammarenta, rannui ra’yaka. Mingka punna tau ja’dala’ koasa, sessai ra’yaka.
3 Inai angngai kacara’dekanga, napakasannangi pa’mai’na manggena. Inai sileporang siagang baine salaya, napa’laboangi doe’na.
4 Punna naparhatikang pamarentaya kaadelanga, lakassaki pa’rasanganna. Mingka punna doe’ bawang naparalluang, laruntungi pa’rasanganna.
5 Inai ampalecei paranna tau, attannangi sikko’ untu’ kalenna.
6 Tau ja’dalaka niallei ri sikko’ lanri dosana, tau lambusuka sannangi nakasia’ siagang mate’nei.
7 Tau bajika naassengi ha’na tau lammaya, mingka tau ja’dalaka tanapahangai.
8 Tau pacalla-callaya akkullei nakaco kotaya, mingka tau cara’deka napakasannangi katallassanga.
9 Punna akkara-kara tau cara’deka siagang tau toloa, anjo tau toloa a’jallo’ji bawang siagang ammakkala’ sa’genna appaumba karicuang.
10 Tau lambusu’ pa’maika lanikabirisi ri tau pabuno-bunoa, mingka nijagai ri tau bajika.
11 Tau toloa napappicini’-cinikangi larrona, mingka tau cara’deka sa’baraki siagang natahangi larrona.
12 Punna naparhatikang pamarentaya kabara’ balle-ballea, la’jari ja’dala’ ngasengi sikontu pagawena.
13 Tu kasi-asia siagang tau manjallakkanna nia’ sangkammanna: para nisarei mata ri Batara untu’ anciniki cayana katallassanga.
14 Punna naalleangangngang karaeng ha’na tau lammaya, lattaung-taungi lammarenta.
15 Pangngajaranga siagang pappasailea napa’jari taua cara’de’. Ana’ tuli niturukianga ero’na lanapakasiriki amma’na.
16 Punna tau ja’dalaka koasa, pila’ katambangi gau’ salaya. Mingka lanaciniki tau lambusuka kapanrakanna tau ja’dalaka.
17 Ajaraki ana’nu, nanasareko kasannangngang, siagang a’jari panynyaleori ri kau.
18 Bansa tenaya Nipimpingi ri Batara a’jari bansa tuli rassi karicuang. Mate’nei taua ia mannurukia ri hukkunNa Batara.
19 Ataya takkulleai niajara’ siagang poro kana-kana bawang. Napahangi, mingka tena naparhatikangi.
20 Jaiangngangi panrannuanna tau dongoka, kala tau jaia bicaranna natappikkira la’bi riolo.
21 Ata tuli nipalecea battu ri rungkana, kale’bakkanna la’jari tamappilangngeriai.
22 Tau lintaka larro napa’jari taua jai a’besere’ siagang doraka.
23 Tau tampoa lanipakatunai; tau tuna pa’maika lanipuji.
24 Tau assamaturuka siagang palukka’, sangkamma nakabirisi kalenna. Punna a’bicarai silambusu’na ri pangadelang, lanipitabai hukkungang. Mingka punna a’merekiji bawang, lanitunrai ri Allata’ala.
25 Mallaka ri panggappana taua, angngerangi kasusaang. Tappakko ri Batara, na nulaamang.
26 Jai tau nangai a’boya-boya pa’mai’ ri tukoasaya, mingka assarea kaadelang, Bataraji bawang.
27 Tau bajika tena nasannang mae ri ja’dalaka; tau ja’dalaka nakabirisi tau bajika.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA