Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Songon bah na bani bondar do uhur ni raja ibagas tangan ni Jahowa; ibobai do ai dompak ja rosuh ni uhur-Ni.
2 Haganup dalanni, pintor do ai ninuhur ni halak, tapi Jahowa do siuji uhur.
3 Na mandalankon hapintoron pakon uhum, rosuhan do uhur ni Jahowa bani ai humbani na mangidah galangan.
4 Mata na mangenjeng pakon uhur hagijangon, ai ma suluh bani parjahat, dousa do ai.
5 Uhur haponguton mambahen halak marlobih-lobih, tapi halak na tarolos-olos marhahurangan do.
6 Halak na patumpu arta marhitei sahap ladung, na marleilei logou anjaha na mangindahi hamatean do ai.
7 Panokohon ni halak parjahat, ai do na parseda sidea sandiri, ai manjua do sidea mangkorjahon hasintongan.
8 Mareluk-eluk do dalan ni halak parjahat, tapi pintor do dalan ni halak siparuhur na pitah.
9 Rahanan do marianan bani suhi-suhi ni tayub, ase rap marianan i rumah ampa naboru sipartinggil.
10 Uhur ni halak parjahat marosuh bani na masambor, gari hasomanni seng harga bani.
11 Anggo hona uhum sipanrisai, gabe maruhur do halak na oto, anggo iajari halak na pentar, jumpahan habotohon do ia.
12 Mangkawah do halak parpintor hu rumah ni parjahat; hona dabuh do parjahat ai hu hamagouan.
13 Halak na manutup pinggolni dompak doruh-doruh ni halak na masombuh, ia pe, anggo dilo-dilo holi, seng dong na mambalosi.
14 Sibere-bere na ponop pahombun ringis, anjaha siluah na buni mangampogi gila na parah.
15 Malas ni uhur bani halak parpintor, ai ma na mandalankon uhum; tapi habiaran do ai bani halak sihorjahon na masambor.
16 Jolma na kahou humbani dalan hapentaran, bani urung habeguon do ia marianan.
17 Gabe marhahurangan do halak na marosuh marpesta-pesta, anjaha halak na rosuh bani anggur ampa minak, seng anjai bayak.
18 Tobus bani halak parpintor do halak parjahat, anjaha sipangosei-osei do gantih ni halak sibujur uhur.
19 Dearan do marianan i halimisan, ase rap sajabu pakon parinangon sipartinggil ampa sipargila-gila.
20 Arta na maharga pakon minak, adong do i rumah ni halak na maruhur, tapi halak na bodoh mintor do iparbois-bois.
21 Halak siparayak hapintoron pakon habasaron, dapotan hagoluhan ampa hamuliaon do.
22 Huta ni puanglima pe ipanangkih halak na pentar do, irumbakkon do benteng, hatengeran ni uhurni ai.
23 Halak na manjaga pamanganni ampa dilahni, iramotkon do goluhni humbani parmaraan.
24 Halak sigijang uhur ampa sipangenjeng, margoran do ai sipanrehei, tarlobih do jungkat ni parlahouni.
25 Hisap-hisap ni siparrayoh do hamatean bani, ai marayoh do tanganni marlahoan.
26 Ganup ari do halak parjahat marsura-surai, tapi halak parpintor layak do, seng maruhur haut.
27 Galangan ni halak parjahat, hagigi do ai, tarlobih anggo manggalang ia, hape laho mambahen na jahat do.
28 Saksi parladung maningon magou do, tapi na sinahapkon ni na manangar totap do.
29 Halak parjahat pajingar-jingar bohini, tapi anggo halak parpintor totap do parlangkahni.
30 Seng dong hapentaran, seng dong hauhuron, anjaha seng dong riah, na totap i lobei ni Jahowa.
31 Pinasirsir pe huda bani panorang porang, tapi anggo hamonangan humbani Jahowa do.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA