Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pilangngeri, he sikamma bai’-bainea ri Samaria pila’ co’moka rapang sapi-sapi co’moka ri Basan! Nujallakkangi tau tenaya pakkullena, nupaccoki tu kasi-asia, siagang nutuntuki bura’nennu sollanna tuli napasadiangko inungang terasa’!
2 INakke, Batara Kaminang Tinggia, iamintu Batara matangkasa’, siagang le’ba’Ma’ a’janji angkanaya lanire’resangko sallang siagang pakkai’; lasinrapang ngasengko juku’ ri mata pekanga.
3 Lanire’resangko mange ri Hermon siagang nipasambilako assulu’, massing ri alla’na tembo’ kaminang ambania. INakke, Batara, anne akkana."
4 Nakana Batara Kaminang Tinggia, "He umma’ Israel! A’lampa lalo mako mange ri tampa’ ibadaya ri Betel, siagang gaukammi dosaya anjoreng! A’lampako mange ri Gilgal siagang gaukammi dosaya situru’ pangngainnu! Assare mako koro’bang tunggala’ bari’basa’, siagang angngerang bage sampulona battu ri sikontu alle polenu lalang tunggala’ tallungalloa!
5 Assare mako roti salaku sukkuru’nu mae ri Nakke, siagang a’bicara kosong mako angkanaya le’ba’ mako angngerang tambana passarenu! Tantu iaminjo nungai ngaseng nugaukang!
6 INakkemi ampitujui kotanu bala kacipurang, mingka tammoterako mae ri Nakke.
7 INakke ampisangkai turung bosia ri wattu paralluna ri je’ne’ lamung-lamunnu. INakke appaturung bosi mae ri kota se’rea siagang tena ri kota maraenga. Koko se’rea anggappai bosi, nampa koko maraenga kalotoroki.
8 Ri siapa area kota pandudu’na lammami napakamma turere, a’boya je’ne’ ri kota maraenga, mingka tanggannakkai je’neka anjoreng. Mingka manna nakamma, tena tongijapa nuero’ ammotere’ mae ri Nakke.
9 Kupammiriki anging bambanga siagang akkiringA’ olo’ untu’ ampanraki lamung-lamunnu kammayatompa koko-koko anggoro’nu. Poko’-poko’ aranu siagang poko’-poko’ zaitunnu la’busu’mi nakanre katimbang. Mingka manna nakamma tena tongija nummotere’ mae ri Nakke.
10 AppabattuA’ garring mae ri kau sangkamma Kupabattua mae ri Mesir. Sikamma tau rungkanu Kubunoi lalang pa’bundukang, siagang sikamma jarannu Kurampasaki. Kubonei pakkemaannu siagang bakke-bakke sa’genna sanna’ botto’na nuara’. Mingka manna pole nakamma, tena tongijapa nummotere’ ri Nakke.
11 Sipa’gang battu ri kau laKupanrakiko sangkamma Kupanrakinna kota Sodom siagang Gomora. Ia niaka ija attallasa’ battu ri kau rapangi cappa’ kayu tunuang niallea battu ri pepeka. Mingka manna nakamma tena tongijapa nummotere’ mae ri Nakke.
12 Lanri kammana anjo, he umma’ Israel, laKuhukkungko. Jari, sadia-sadia mako andallekangi hukkungang laKupabattua mae ri kau!"
13 Moncong siagang anging, Batara ampareki; rancanaNa Napa’nyatai mae ri rupataua. Napareki alloa siagang bangngia; iratei ri coppo’-coppo’ buttaya a’jappa. Karaeng Allata’ala Kaminang Koasaya, iaminjo arenNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA