Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Edhingngagi, he, babine’an Samaria se atamba lempo akantha sape se po-lempo e Basan! Ba’na nyecce’ oreng se ta’ andhi’ kakowadan, merres oreng se ta’ andhi’, sarta maksa menta ka lakena sopaja ba’na terros esadhiyai nom-enoman kerras!

² Sengko’, GUSTE Allah Se Mahatenggi reya Pangeran se socce, ban Sengko’ la ajanji ja’ pagi’ ba’na bakal eereda bi’ e’-kae’; ba’na kabbi bakal padha’a ban juko’ se ekae’ panceng.

³ Ba’na bakal eereda ka Hermon ban eontallagi ka lowar, lebat e lobang e ke’-lekke’na geddhung se paleng semma’ ka aba’na bang-sebang. Sengko’, PANGERAN, la ngoca’."

⁴ GUSTE Allah Se Mahatenggi adhabu, "He ommat Isra’il! Kassa’ ba’na entar ka kennengnganna kabakteyan e Betel bai, pas agabay dusa e jadhiya! Kassa’ entar ka Gilgal, pas agabay dusa sakarebba ba’na! Mara atorragi kurban sabban gi’ laggu, sarta ngeba saparsapolonna hasella ba’na tello are sakaleyan!

⁵ Mara ngatorragi roti menangka sakalangkongnga ba’na ka Sengko’, sarta mara pas asebbal ja’ ba’na la ngeba tamba’anna tor-ator! Tanto lalakon cara jareya se ekaleburi ba’na!

⁶ Sengko’ se madhateng laep ka sakabbinna kotthana ba’na, tape ba’na ta’ abali ka Sengko’.

⁷ Bi’ Sengko’ ojan ta’ epatoron e bakto men-tamennanna ba’na ce’ parlona ka aeng. Kottha se settong bi’ Sengko’ epadhatengnge ojan dineng kottha settonganna enja’. Teggal se settong kaojanan dineng teggal laenna sampe’ kerreng.

⁸ E pan-barampan kottha, pandhudhu’ se la ta’ andhi’ kakowadan dhari pelka’na, nyare aeng ka kottha laen, tape aeng e jadhiya ta’ cokop. Maske la kantha jareya, ba’na gi’ ta’ abali ka Sengko’ keya.

⁹ Sengko’ madhateng angen panas ban ngerem panyaket se marosak men-tamennan ban bun-kebbunna anggurra ba’na. Ka-bungkana ara, ban ka-bungkana jaitunna ba’na la obus ekakan balang. Tape maske kantha jareya ba’na gi’ ta’ abali keya ka Sengko’.

¹⁰ Sengko’ madhateng wabah panyaket ka ba’na akantha se epadhateng ka Messer bi’ Sengko’. Ngangodhadanna ba’na bi’ Sengko’ epamate e dhalem paperrangan, ban ran-jaranna ba’na erampas. Parkemahanna ba’na bi’ Sengko’ eesse’e babathang se bauna abatthowangan. Maske la kantha jareya, ba’na gi’ ta’ abali ka Sengko’ keya.

¹¹ Sabagiyan dhari ba’na bi’ Sengko’ epamate akantha reng-oreng e Sodom ban Gomora. Se gi’ odhi’ e antarana ba’na padha ban tomperra kaju se ekala’ dhari apoy. Maske la kantha jareya ba’na gi’ ta’ abali ka Sengko’ keya.

¹² Daddi, he, ommat Isra’il, bi’ Sengko’ ba’na eokoma. Daddi, mara ba’na aya-sadhiya se ngadhebbana okoman se bi’ Sengko’ eteba’agiya ka ba’na!"

¹³ Gunong ban angen reya, se nyepta’agi Pangeran; apa se daddi kasokanna enyata’agi ka manossa. Pangeran abadhi seyang ban malem; Salerana alomampa e co’-konco’na bume. PANGERAN, Allah Se Mahakobasa, jareya asmana.

Amos

Video Amos 4

Ikuti Kami:

KONTAK | PARTISIPASI | DONASI