Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jelma-jelma sai nutuk Isa makin saka makin betambah lamon. Pada waktu seno ulun-ulun Yahudi sai bebahasa Yunani, jadi mak senang tehadap ulun-ulun Yahudi asli. Sai bebahasa Yunani udi cawa, "Bebai-bebai sekam sai radu randa mak kebagian bantuan biaya serani-rani sai dibagi-bagiko jama ulun-ulun."

² Mani ulihni seno, kerua belas rasul-rasul udi ngumpulko sunyinni jelma sai nutuk udi rik cawa jama tian, "Mak mebetik kik sekam taru nyiarko cawani Allah, mani musti ngurus soal-soal kanikan.

³ Jadi, helauni Puari-puari milih jak hantara keti pitu jelma sai ngedok gelar betik rik dikuasai Ruh Allah rik bijaksana, sai dapok sekam tugasko ngurus soal-soal sinji;

⁴ mani sekam haga bedua rik nyiarko cawa Allah gaoh."

⁵ Sunyinni ulun udi setuju jama usul jak rasul-rasul udi. Raduni tian milih Stefanus, sai jelma sai percaya nihan jama Isa rik dikuasai ulih Ruh Allah. Juga tepilih: Filipus, Prokhorus, Nikanor, Timon, Parmenas, rik Nikolaus jak Antiokhia; ia lain ulun Yahudi kidang radu kuruk agama Yahudi.

⁶ Kepitu jelma udi diusulko jama rasul-rasul, raduni rasul-rasul udi bedua rik ngiluko berkat Tuhan untuk tian.

⁷ Injuk rejido kabar jak Allah semakin tesebar rik jelma-jelma sai nutuk Isa di Yerusalem pun makin betambah lamon. Rik lamon muneh imam-imam sai percaya jama Isa.

⁸ Stefanus diberkati nihan ulih Allah, sehingga ia nyani lamon keajaiban rik hal-hal luar biasa di hantara masyarakat.

⁹ Kidang wat jelma-jelma sai nantang ia; tian ano anggota-anggota lamban ibadah sai disebut Lamban Ibadah Ulun-ulun Bebas. Anggota-anggota lamban ibadah ano yakdo ulun-ulun Yahudi jak Kirene rik Aleksandria. Tian rik ulun-ulun Yahudi jak Kilikia rik Asia bedebat jama Stefanus.

¹⁰ Kidang tian mak dapok ngebantah api sai diucakko ulih Stefanus, mani Ruh Allah ngeniko jama ia kebijaksanaan untuk cawa.

¹¹ Ulihni seno tian nyugok pira-pira jelma untuk cawa, "Sekam ngedengi jelma ano ngehina Musa rik Allah!"

¹² Injuk renodo tian ngehasut jelma-jelma, rik jelma-jelma sai mimpin Yahudi, rik guru-guru agama. Raduni tian mik nangkok Stefanus, kak raduni ngusung ia ngehadap Mahkamah Agama.

¹³ Rik tian ngehadapko juga saksi-saksi sai ngeni keterangan-keterangan sai mak benor tentang Stefanus. Saksi-saksi udi cawa, "Jelma inji selalu ngehina Lamban Ibadah sai suci rik ngehina perintah-perintah Allah sai disampaiko ulih Musa.

¹⁴ Sekam radu ngedengi ia cawa, bahwa Isa jak Nazaret udi haga ngeruntuhko Lamban Ibadah inji, raduni ngubah sunyinni adat istiadat sai diturunko Musa jama ram!"

¹⁵ Sunyinni jelma sai hadir delom sidang Mahkamah Agama udi ngeliak Stefanus. Rik waktu seno juga pudak Stefanus keliakan injuk pudak malaikat.

Kisah Para Rasul

Video Kisah Para Rasul 6

Ikuti Kami:

KONTAK | PARTISIPASI | DONASI