Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kasae-sae kadea-dea topangoseaka i Yesus. Tempo haitu topangoseaka i Yesus deanapa *toYahudi. Sanu ira nobasa Yunani, bo sanu nobasa basara mboto. Tempo haitu topobasa Yunani ledo nadamba nte topobasa Yahudi. Topobasa Yunani nanguli, "Timbala-timbala kami ledo nanggava doi balanja eo-eo eva anu nipalele ka timbala-timbala ntanina."

² Sabana haitu, suro-suro sapulu randua haitu nompasiromu pura-pura topangoseaka i Yesus bo nanguli ka ira, "Ledo nabelo ane menonto kami mompatolele tesa nu Alatala aga mompakasiayu kandeamiu.

³ Jadi aginapa rapelisimiu papitu tona lako nte komiu mboto radekeika bago haitu. Pelisimo tona nabelo sangana, nanoto, bo nikuasai Nosa Gasa nu Alatala, bo pura-pura bago haitu radekei kami ka ira.

⁴ Bo ivesiamo kami suro-suro mamala mombatui bago kami mboto, haitumo mosambaya ka Alatala bo mompatolele tesaNa."

⁵ Naupu nangepe tesa nu suro-suro pangane, nasituju puramo topangoseaka i Yesus ante tesa haitu. Jadi nipelisiramo i Stefanus, saito tona naroso pomparasayana i Yesus bo muni ia nikuasai nu Nosa Gasa nu Alatala. Nipelisira muni i Filipus, bo i Prokhorus, i Nikanor, i Timon, i Parmenas, bo i Nikolaus lako ri ngata Antiokhia. Ia ledo toYahudi, tapi ia nesua agama Yahudi.

⁶ Tona papitu haitu nikenikara ka suro-suro bo naupu nosambaya, suro-suro nombadika palera ri balengga ntona haitu mombalanti ira majadi topotulungi suro-suro.

⁷ Ivesiamo kareba nu Alatala nipatolele njuu bo kadea ntopomparasaya i Yesus ri ngata Yerusalem nantambai mpuumo. Bo nadea muni topanggeni pesomba nangoseaka i Yesus.

⁸ I Stefanus mpuu-mpuu nipobelo nu Alatala. Bo naria kuasa nu Alatala nte ia sampe nadea kabaraka bo tanda nipokumaaka nipoviana ri ngayo ntodea.

⁹ Tapi naria muni tona nangeva ia. Ira haitu toYahudi anu nosambaya ri banua petupu niuli Banua Petupu nu Batua-Batua Nikabasaka. Ira toYahudi ntanina lako ri ngata Kirene bo ngata Aleksandria. Ira bo toYahudi lako ri propinsi Kilikia bo lako ri propinsi Asia nangeva bo nosisanai nte i Stefanus.

¹⁰ Tapi ledo nipakulera nombasapu anu niuli i Stefanus, sabana Nosa Gasa nu Alatala nombadekei kapande ka ia notesa.

¹¹ Jadi nidekeira doi pepe ka bara sako-ndua tona ala raulira, "Niepe kami tona haitu nanjalai Nabi Musa bo Alatala."

¹² Ivesiamo ira nompakapane rara ntodea bo totua-totua ntoYahudi bo *guru-guru agama sampe narau rarara nte i Stefanus. Jadi hau ira nombasaka i Stefanus, pade nikenira ratangara ri ngayo Polibu Mbaso Agama Yahudi.

¹³ Nikenira muni sabi-sabi mpodava ri ngayo ntoPolibu haitu mombatesa i Stefanus anu ledo nakana-kanaka. Sabi-sabi haitu nanguli, "I Stefanus nasaro nanjalai Banua nu Alatala anu nagasa, bo nasaro muni nisalaina Atura-atura nu Alatala anu nipapola Nabi Musa ka kita.

¹⁴ Niepe kami ia nanguli i Yesus toNazaret mombagerosi Banua nu Alatala bo mombabaliki pura-pura ada anu nidekei i Musa ka kita."

¹⁵ Pura-pura tona ri Polibu Mbaso haitu nangganotosi i Stefanus. Bo nikitara lenje i Stefanus nasimbayu mpo lenje nu *malaeka.

Kisah Para Rasul

Video Kisah Para Rasul 6

Ikuti Kami:

KONTAK | PARTISIPASI | DONASI